ମଧ୍ୟପ୍ରଦେଶ ରାଜ୍ୟସଭା ଉପନିର୍ବାଚନ ପାଇଁ କେନ୍ଦ୍ରମନ୍ତ୍ରୀ ହରଦୀପ ପୁରୀଙ୍କୁ ପ୍ରାର୍ଥୀ କଲା ବିଜେପି

ଭୋପାଳ : ବିଜେପି ଆସନ୍ତା ନଭେମ୍ବର ୧୨ ତାରିଖରେ ମଧ୍ୟପ୍ରଦେଶରେ ହେବାକୁ ଥିବା ରାଜ୍ୟସଭା ଉପନିର୍ବାଚନ ପାଇଁ କେନ୍ଦ୍ରମନ୍ତ୍ରୀ ହରଦୀପ ସିଂହ ପୁରୀଙ୍କୁ ନିଜର ପ୍ରାର୍ଥୀ ଭାବେ ଚୟନ କରିଛି। ଏହାର କିଛି ସପ୍ତାହ ପୂର୍ବରୁ ଉତ୍ତର ପ୍ରଦେଶର ରାଜ୍ୟସଭା ପ୍ରାର୍ଥୀ ତାଲିକାରୁ ତାଙ୍କୁ ବାଦ୍‌ ଦିଆଯାଇଥିଲା। ଆସନ୍ତା କିଛି ସପ୍ତାହ ମଧ୍ୟରେ କେନ୍ଦ୍ର କ୍ୟାବିନେଟ୍‌ରେ ଅଦଳବଦଳ ହୋଇପାରେ ବୋଲି ଚାଲିଥିବା ଚର୍ଚ୍ଚା ମଧ୍ୟରେ ହରଦୀପ ପୁରୀଙ୍କୁ ପ୍ରାର୍ଥୀ କରାଯିବା ରାଜନୈତିକ ମହଲରେ ଗୁରୁତ୍ୱ ବହନ କରୁଛି। ବୁଧବାର ବିଜେପି ଘୋଷଣା କରିଛି ଯେ, କେନ୍ଦ୍ର ପେଟ୍ରୋଲିୟମ୍‌ ଓ ପ୍ରାକୃତିକ ଗ୍ୟାସ୍‌ ମନ୍ତ୍ରୀ ହରଦୀପ ସିଂହ ପୁରୀ ମଧ୍ୟପ୍ରଦେଶର ରାଜ୍ୟସଭା ଉପନିର୍ବାଚନରେ ଦଳର ପ୍ରାର୍ଥୀ ହେବେ। ଏହି ନିର୍ବାଚନ ନଭେମ୍ବର ୧୨ ତାରିଖରେ ଅନୁଷ୍ଠିତ ହେବ। ପୂର୍ବତନ କେନ୍ଦ୍ରମନ୍ତ୍ରୀ ଏଲ୍‌. ମୁରୁଗନ୍‌ ଅକ୍ଟୋବର ୧୪ ତାରିଖରେ ରାଜ୍ୟସଭା ସଦସ୍ୟ ପଦ ଓ କେନ୍ଦ୍ର ମନ୍ତ୍ରିପରିଷଦରୁ ଇସ୍ତଫା ଦେଇଥିଲେ। ତାମିଲନାଡୁରେ ବିଜେପିର ସାଂଗଠନିକ ଶକ୍ତି ବଢ଼ାଇବା ଉପରେ ଧ୍ୟାନ ଦେବା ପାଇଁ ସେ ଏହି ପଦକ୍ଷେପ ନେଇଥିଲେ। ତାଙ୍କ ଇସ୍ତଫା ପରେ ଖାଲି ପଡ଼ିଥିବା ଆସନ ପୂରଣ ପାଇଁ ଏହି ଉପନିର୍ବାଚନ ହେଉଛି। ବିଜେପି ଏକ ବିବୃତିରେ କହିଛି ଯେ, ଦଳର କେନ୍ଦ୍ରୀୟ ନିର୍ବାଚନ କମିଟି ଉପନିର୍ବାଚନ ପାଇଁ ପୁରୀଙ୍କ ପ୍ରାର୍ଥିତ୍ୱକୁ ଅନୁମୋଦନ କରିଛି। ୭୪ ବର୍ଷୀୟ ହରଦୀପ ସିଂହ ପୁରୀ ବର୍ତ୍ତମାନ ଉତ୍ତର ପ୍ରଦେଶରୁ ରାଜ୍ୟସଭା ସଦସ୍ୟ ଅଛନ୍ତି। ରାଜ୍ୟସଭାରେ ତାଙ୍କର ବର୍ତ୍ତମାନ କାର୍ଯ୍ୟକାଳ ନଭେମ୍ବର ୨୫ ତାରିଖରେ ଶେଷ ହେବାର ଥିଲା। ଅନ୍ୟପକ୍ଷରେ, ଏଲ୍‌. ମୁରୁଗନ୍‌ଙ୍କ ରାଜ୍ୟସଭା କାର୍ଯ୍ୟକାଳ ଏପ୍ରିଲ୍‌ ୨, ୨୦୩୦ ପର୍ଯ୍ୟନ୍ତ ରହିବାର ଥିଲା।। ରାଜ୍ୟସଭା ସଦସ୍ୟମାନଙ୍କୁ ରାଜ୍ୟ ବିଧାନସଭାର ନିର୍ବାଚିତ ସଦସ୍ୟମାନେ ଚୟନ କରନ୍ତି। ମଧ୍ୟପ୍ରଦେଶରେ ବିଜେପି ସରକାର କ୍ଷମତାରେ ଥିବାରୁ ଦଳର ପ୍ରାର୍ଥୀଙ୍କ ପାଇଁ ଏହି ଉପନିର୍ବାଚନ ସହଜ ହେବ ବୋଲି ଆଶା କରାଯାଉଛି। ନଭେମ୍ବର ୧୨ ତାରିଖରେ ମତଦାନ ଶେଷ ହେବା ପରେ ସେହିଦିନ ସନ୍ଧ୍ୟାରେ ଭୋଟ୍‌ ଗଣତି କରାଯିବ। ଚଳିତ ମାସ ଆରମ୍ଭରେ ଉତ୍ତର ପ୍ରଦେଶ ପାଇଁ ବିଜେପିର ରାଜ୍ୟସଭା ପ୍ରାର୍ଥୀ ତାଲିକାରୁ ବାଦ୍‌ ପଡ଼ିଥିବା ସାତ ଜଣ ବିଦାୟୀ ସାଂସଦଙ୍କ ମଧ୍ୟରେ ହରଦୀପ ସିଂହ ପୁରୀ ମଧ୍ୟ ଥିଲେ। ଏହା ପରେ ଆଗାମୀ ଦିନରେ କେନ୍ଦ୍ର କ୍ୟାବିନେଟ୍‌ରେ ଅଦଳବଦଳ ହୋଇପାରେ ବୋଲି ଚର୍ଚ୍ଚା ଜୋର୍‌ ଧରିଥିଲା। ଏବେ ତାଙ୍କୁ ମଧ୍ୟପ୍ରଦେଶରୁ ରାଜ୍ୟସଭା ଉପନିର୍ବାଚନ ପାଇଁ ପ୍ରାର୍ଥୀ କରାଯିବା ପରେ ଏହି ଚର୍ଚ୍ଚା ଆହୁରି ଗୁରୁତ୍ୱ ପାଇଛି। ତେବେ କେନ୍ଦ୍ର କ୍ୟାବିନେଟ୍‌ରେ ଅଦଳବଦଳ ନେଇ ବିଜେପି ପକ୍ଷରୁ କୌଣସି ଆନୁଷ୍ଠାନିକ ଘୋଷଣା କରାଯାଇନାହିଁ।