2 Terrorists Killed in Gunfight: ସୁରକ୍ଷାକର୍ମୀଙ୍କୁ ବଡ଼ ସଫଳତା; ଦୁଇ ଆତଙ୍କବାଦୀ ନିପାତ, ସର୍ଚ୍ଚ ଅପରେସନ ଜାରି

ଜମ୍ମୁ ଓ କାଶ୍ମୀରର ଉଧମପୁର ଜିଲ୍ଲାରେ ବିଳମ୍ବିତ ରାତିରେ ସୁରକ୍ଷାକର୍ମୀ ଏବଂ ଆତଙ୍କବାଦୀଙ୍କ ମଧ୍ୟରେ ବଡ଼ ଧରଣର ଗୁଳିବିନିମୟ ହୋଇଛି। ଏଥିରେ ଦୁଇ ଜଣ ଆତଙ୍କବାଦୀ ନିହତ ହୋଇଛନ୍ତି। ନିହତ ଆତଙ୍କବାଦୀମାନେ ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦର ଏକ ଶାଖା 'କାଶ୍ମୀର ଟାଇଗର୍ସ' ସହ ଜଡିତ ଥିବା ଅନୁମାନ କରାଯାଉଛି।

ଉଧମପୁର ଜିଲ୍ଲାର ମଜାଲ୍ଟା ଅଞ୍ଚଳର ଏକ ଜଙ୍ଗଲରେ ଆତଙ୍କବାଦୀଙ୍କ ସନ୍ଦିଗ୍ଧ ଗତିବିଧି ନେଇ ଗୁଇନ୍ଦା ସୂଚନା ମିଳିଥିଲା। ଏହାପରେ ସୁରକ୍ଷାକର୍ମୀମାନେ ସେଠାରେ ଏକ ବଡ଼ଧରଣର କର୍ଡନ୍ ଏବଂ ସର୍ଚ୍ଚ ଅପରେସନ୍ ଆରମ୍ଭ କରିଥିଲେ। ସୁରକ୍ଷାକର୍ମୀମାନେ ଘେରାବନ୍ଦୀ କରିବା ପରେ ଆତଙ୍କବାଦୀମାନେ ଗୁଳିଚାଳନା କରିଥିଲେ, ଯାହାଫଳରେ ଉଭୟ ପକ୍ଷରୁ ପ୍ରବଳ ଗୁଳିବିନିମୟ ହୋଇଥିଲା।

ଗୁରୁବାର ଭୋର ସମୟରେ ସୁରକ୍ଷାକର୍ମୀମାନେ ଦୁଇ ଜଣ ଆତଙ୍କବାଦୀଙ୍କ ମୃତଦେହ ଉଦ୍ଧାର କରିଛନ୍ତି। ସେମାନେ ବିଦେଶୀ ନାଗରିକ ବୋଲି ସନ୍ଦେହ କରାଯାଉଛି। ସେମାନଙ୍କ ନିକଟରୁ ବହୁ ପରିମାଣରେ ଅସ୍ତ୍ରଶସ୍ତ୍ର ଏବଂ ଗୋଲାବାରୁଦ ଜବତ କରାଯାଇଛି। ଜଙ୍ଗଲରେ ଆହୁରି ଆତଙ୍କବାଦୀ ଲୁଚି ରହିଥିବା ଆଶଙ୍କାରେ ଅତିରିକ୍ତ ଯବାନଙ୍କୁ ମୁତୟନ କରାଯାଇ ସର୍ଚ୍ଚ ଓ କମ୍ବିଂ ଅଭିଯାନ ଜାରି ରହିଛି। 

ସୂଚନାଯୋଗ୍ୟ, ଉଧମପୁର ଗୁଳିବିନିମୟର କିଛି ଦିନ ପୂର୍ବରୁ, ଗତ ସେପ୍ଟେମ୍ବର ୫ ତାରିଖରେ ମଧ୍ୟ କାଶ୍ମୀରର ବାଡଗାମ ଜିଲ୍ଲାରେ ପାକିସ୍ତାନୀ ଲସ୍କର-ଇ-ତୈବାର ଜଣେ ପ୍ରମୁଖ କମାଣ୍ଡର ନିହତ ହୋଇଥିଲା। 'ୟାସିର' ନାମକ ଏହି ଆତଙ୍କବାଦୀ ଜଣକ ଲସ୍କରର ବଡ଼ ସୁଲେମାନ ମୁସା ଗ୍ରୁପ୍ ସହ ଜଡିତ ଥିଲା, କିନ୍ତୁ ପ୍ରାୟ ଏକ ବର୍ଷ ପୂର୍ବେ ସେହି ଗୋଷ୍ଠୀରୁ ଅଲଗା ହୋଇ ସ୍ୱାଧୀନ ଭାବରେ କାର୍ଯ୍ୟ କରୁଥିଲା।