Bargarh Child Murder Case: ମାଛ ଧରିବା ବେଳେ ମହାଭାରତ ! ୭ ବର୍ଷର ଶିଶୁକୁ ଗାମୁଛାରେ ତଣ୍ଟି ଚିପି ହତ୍ୟା ଅଭିଯୋଗ

କଅଁଳ ବୟସରେ ହତ୍ୟା।

ମାଛ ପାଇଁ ୭ ବର୍ଷର ବାଳକକୁ ମର୍ଡର।୧୩ ବର୍ଷ ବୟସରେ ହତ୍ୟାକାରୀ ସାଜିଲା ନାବାଳକ।

ଏଠି ଉଭୟ ହତ୍ୟାକାରୀ ଓ ହତ୍ୟାର ଶିକାର ଦୁହେଁ ଏତେ କମ ବୟସର।

ମାରିଥିବା ପିଲାକୁ ମାତ୍ର ୧୩ ବର୍ଷ ।

ଆଉ ଯାହାକୁ ହତ୍ୟା କରାଯାଇଛି ତା ବୟସ ଜମାରୁ ୭ ।

ଜଣେ ଜୀବନ କଣ ବୁଝିବା ପୂର୍ବରୁ ମରିଯାଇଛି ତ ଅନ୍ୟ ଜଣେ ଏବେ ସ୍କୁଲ କ୍ଲାସ ରୁମରେ ବସିବା ବୟସରେ ବାଳ ସୁଧାର ଗୃହରେ ବନ୍ଦୀ ।

ଆଉ ଏତେ ସବୁ କାଣ୍ଡ ଘଟିଯାଇଛି ସାମାନ୍ୟ ଗୋଟିଏ ଛୋଟିଆ ମାଛ ପାଇଁ ।

ଘଟଣାଟି ଘଟିଛି ବରଗଡ଼ ଜିଲ୍ଲା ବିଜେପୁର ଥାନା ଅଞ୍ଚଳରେ ।

Advertisment ଗାଁରେ ଥିବା ପୋଖରୀକୁ ମାଛ ଧରିବାକୁ ଯାଇଥିଲେ ଗାଁର କିଛି କୁନି କୁନି ପିଲା ।

ସେମାନଙ୍କ ମଧ୍ୟରେ ଉଭୟ ଅଭିଯୁକ୍ତ ଓ ମୃତ ନାବାଳକ ଦୁହେଁ ବି ଥିଲେ ।

ପୋଖରୀରେ ବନିଶୀ ପକାଇ ଉଭୟ ମାଛ ଧରୁଥିଲେ ।

ପାଖାପାଖି ବସି ମାଛ ଧରିବା ବେଳେ ଉଭୟଙ୍କ ମଧ୍ୟରେ କଳି ଝଗଡ଼ା ହୋଇଥିଲା ।

କିଛି ସମୟ ପରେ ଉଭୟ ଝଗଡ଼ା ବନ୍ଦ କରି ମାଛ ଧରିବାରେ ଲାଗିଥିଲେ ।

ଏହା ପରେ ମୃତକର ବଡ଼ ଭାଇ ଏବଂ ଆଉ ଜଣେ ଘରକୁ ଖାଇବାକୁ ପଳାଇଥିବା ବେଳେ ମୌକା ଦେଖି ୭ ବର୍ଷର ବାଳକକୁ ହତ୍ୟା କରିଥିଲା ୧୩ ବର୍ଷର ନାବାଳକ ।

ବେକକୁ ଗାମୁଛାରେ ଚାପି ଧରି ମାରିବା ପରେ ମୃତଦେହକୁ ଏକ ବୁଦାମୂଳେ ପକାଇ ପଳାଇ ଯାଇଥିଲା ।

ଦୀର୍ଘ ସମୟ ପର୍ଯ୍ୟନ୍ତ ପୁଅ ଘରକୁ ନଫେରିବାରୁ ପରିବାର ଲୋକ ଥାନାରେ ଏତଲା କରିଥିଲେ ।

ପରଦିନ ଗାଁ ପାଖ ବୁଦାରୁ ମିଳିଥିଲା ମୃତ ନାବାଳକର ଶବ ।

ଅନ୍ୟପକ୍ଷରେ ଅଭିଯୁକ୍ତ ନାବାଳକକୁ ହେପାଜତକୁ ନେଇ ପୋଲିସ ପଚରାଉଚରା କରୁଥିବା ବେଳେ ଘଟଣାରେ ଆଉ କିଛି ଲୋକଙ୍କର ସଂପୃକ୍ତି ଥାଇପାରେ ବୋଲି ଅଭିଯୋଗ କରିଛନ୍ତି ପରିବାର ଓ ସଂପର୍କୀୟ ।

ଉଚିତ ତଦନ୍ତ କରି ସମସ୍ତ ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରି ଗ୍ରାମବାସୀ ବିଜେପୁର ଥାନା ଆଗରେ ମୃତଦେହ ରଖି ବିକ୍ଷୋଭ କରିଛନ୍ତି ।

ଅଭିଯୁକ୍ତମାନଙ୍କୁ ଫାଶି ଦେବାକୁ ମୃତକଙ୍କ ମା' ଦାବି କରିଥିବା ବେଳେ ତଦନ୍ତ ଜାରି ରହିଥିବା କହିଛନ୍ତି ଏସଡିପିଓ ।

ସାମାନ୍ୟ ମାଛଟିଏ ପାଇଁ ଦୁଇ ନାବାଳକଙ୍କ ମଧ୍ୟରେ ଝଗଡ଼ା ଏବଂ ଜଣେ ଅନ୍ୟ ଜଣକୁ ହତ୍ୟା କରିବା ଘଟଣା ସାରା ବରଗଡ଼ ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି କରିଛି ।