Big Blow to Drug Network: UAEରୁ ଭାରତ ଫେରିଲା ଡ୍ରଗ୍ସ ମାଫିଆ, ୬୦୦୦ କୋଟି ମାମଲାରେ ବଡ଼ ଆକ୍ସନ

ଟପ୍ ଡ୍ରଗ୍ସ ସିଣ୍ଡିକେଟ୍ ମାଫିଆ ବୀରେନ୍ଦ୍ର ବୈସୋୟାକୁ UAEରୁ ଭାରତ ଫେରାଇ ଅଣାଯାଇଛି । ଏହା ଦେଶର ନିଶାଦ୍ରବ୍ୟ ବିରୋଧୀ ଅଭିଯାନରେ ଏକ ବଡ଼ ସଫଳତା। ବୈସୋୟା ନିଶା ମାଫିଆ ସନ୍ଦୀପ ଧୁନିଆର ଘନିଷ୍ଠ ସହଯୋଗୀ ଏବଂ ୬,୦୦୦ କୋଟି ଟଙ୍କାର ପୁଣେ ଡ୍ରଗ୍ସ ମାମଲାରେ ଜଣେ ଅଭିଯୁକ୍ତ।

୬,୦୦୦ କୋଟି ଟଙ୍କାର ପୁଣେ ଡ୍ରଗ୍ସ ମାମଲାରେ ଅଭିଯୁକ୍ତ ଟପ୍ ଡ୍ରଗ୍ସ ସିଣ୍ଡିକେଟ୍ ମାଫିଆ ବୀରେନ୍ଦ୍ର ବୈସୋୟାକୁ ସଂଯୁକ୍ତ ଆରବ ଏମିରେଟସରୁ ଭାରତ ଫେରାଇ ଅଣାଯାଇଥିବା ଶୁକ୍ରବାର ଅଧିକାରୀମାନେ କହିଛନ୍ତି। ଦୁବାଇରେ ତାକୁ ଗିରଫ କରାଯିବା ପରେ ଏହି ପଦକ୍ଷେପ ନିଆଯାଇଛି। ତାକୁ ଏୟାର ଇଣ୍ଡିଆର ଇଓ ୪୩୧୦ ବିମାନରେ ଭାରତ ଅଣାଯାଇଥିଲା।

ବୈସୋୟା ମୁଖ୍ୟ ଅଭିଯୁକ୍ତ ସନ୍ଦୀପ ଧୁନିଆର ଘନିଷ୍ଠ ସହଯୋଗୀ। ଧୁନିଆ ଦୁବାଇରୁ ପାକିସ୍ତାନ ପଳାଇବାରେ ସଫଳ ହୋଇଥିବା ଜଣାପଡ଼ିଛି। ବୈସୋୟା ଭାରତୀୟ ଏଜେନ୍ସିଗୁଡ଼ିକର ନଜରରେ ଥିଲା ଏବଂ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (NCB) ପୂର୍ବରୁ ତା ବିରୋଧରେ ରେଡ୍ କର୍ଣ୍ଣର ନୋଟିସ୍ ଜାରି କରିଥିଲା।

ତାର ପ୍ରତ୍ୟର୍ପଣ ଭାରତ ପାଇଁ ଏକ ବଡ଼ ସଫଳତା। କେନ୍ଦ୍ର ସରକାର ସାରା ଦେଶରେ ଡ୍ରଗ୍ସ ବିରୋଧରେ ବ୍ୟାପକ ଅଭିଯାନ ଆରମ୍ଭ କରିଛନ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହି ପଦକ୍ଷେପକୁ ସ୍ୱାଗତ କରି କହିଛନ୍ତି ଯେ ବିଦେଶରେ ଲୁଚିଥିବା ଡ୍ରଗ୍ସ ଚାଲାଣକାରୀଙ୍କୁ ମୋଦି ସରକାର ନିରନ୍ତର ଭାବେ ଖୋଜି ବାହାର କରୁଛି ଏବଂ କଠୋର ଆଭିମୁଖ୍ୟ ନେଇ ସେମାନଙ୍କ ସମଗ୍ର ନେଟୱର୍କକୁ ଧ୍ୱଂସ କରୁଛି।

ଶାହ Xରେ ଏକ ପୋଷ୍ଟରେ କହିଛନ୍ତି, ନିଶାଦ୍ରବ୍ୟ ବିରୋଧରେ ଜିରୋ-ଟଲେରାନ୍ସ ନୀତିରେ ଏକ ନୂଆ ମାଇଲଖୁଣ୍ଟ ସୃଷ୍ଟି କରି ପଳାତକ ଡ୍ରଗ୍ସ କିଙ୍ଗପିନ୍ ବୀରେନ୍ଦ୍ର ସିଂହ ବୈସୋୟାକୁ UAEରୁ ଭାରତ ଫେରାଇ ଆଣିଛି।
ସେ ଆହୁରି କହିଛନ୍ତି, ଟପ୍-ଟୁ-ବଟମ୍ ଏବଂ ବଟମ୍-ଟୁ-ଟପ୍ ଆଭିମୁଖ୍ୟରେ ଅପରାଧୀଙ୍କୁ ଟ୍ରାକ୍ କରି ଆମ ଏଜେନ୍ସିଗୁଡ଼ିକ ପୁଣିଥରେ ପ୍ରମାଣ କରିଛନ୍ତି ଯେ ଡ୍ରଗ୍ସ ଚାଲାଣକାରୀମାନେ ଯେଉଁଠି ଲୁଚିଲେ ମଧ୍ୟ ଭାରତୀୟ ଆଇନର ଲମ୍ୱା ହାତରୁ ଖସିପାରିବେ ନାହିଁ।

ବୈସୋୟାକୁ ଅଣାଯିବାର ଏକ ସପ୍ତାହରୁ ଅଧିକ ସମୟ ପୂର୍ବରୁ ୮୮ କୋଟି ଟଙ୍କାର ଠକେଇର ମାଷ୍ଟରମାଇଣ୍ଡ ଅବିନାଶ ରାଠୋଡର ପତ୍ନୀ ତଥା ୱାଣ୍ଟେଡ ପଳାତକ ବିଶାଖା ରାଠୋଡଙ୍କୁ UAEରୁ ଭାରତ ଅଣାଯାଇଥିଲା। ବିଶାଖା ଇଣ୍ଟରପୋଲ ରେଡ୍ ନୋଟିସ୍ ରେ ଥିଲା ଏବଂ ଅଗଷ୍ଟ ୩ ତାରିଖରେ ତାକୁ ମହାରାଷ୍ଟ୍ରର ପୁଣେକୁ ଅଣାଯାଇଥିଲା।

କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ପୂର୍ବରୁ ଏକ ବିବୃତିରେ କହିଥିଲା ଯେ ନିଶ୍ଚିତ ମାସିକ ରିଟର୍ଣ୍ଣ ଦେବାର ପ୍ରତିଶ୍ରୁତି ଦେଇ ବିଭିନ୍ନ ଯୋଜନାରେ ନିବେଶକମାନଙ୍କୁ ଟଙ୍କା ଜମା କରିବାକୁ ପ୍ରଲୋଭିତ କରିବାର ଅପରାଧିକ ଷଡ଼ଯନ୍ତ୍ରରେ ବିଶାଖା ଜଣେ ଅଭିଯୁକ୍ତ।

ତାର ଡିପୋର୍ଟେସନ ପାଇଁ କେନ୍ଦ୍ରୀୟ ତଦନ୍ତ ଏଜେନ୍ସି ବୈଦେଶିକ ବ୍ୟାପାର ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ ଏବଂ UAE କର୍ତ୍ତୃପକ୍ଷଙ୍କ ସହ ଘନିଷ୍ଠ ଭାବେ କାମ କରିଥିଲା। ଏହା ପରେ ଇଣ୍ଟରପୋଲ ତା ବିରୋଧରେ ରେଡ୍ କର୍ଣ୍ଣର ନୋଟିସ୍ ଜାରି କରିଥିଲା । ଫଳରେ ତାକୁ ଗିରଫ କରାଯାଇଥିଲା। ବର୍ତ୍ତମାନ ସେ ମହାରାଷ୍ଟ୍ର ପୋଲିସର ହେପାଜତରେ ଅଛି।