ଗଣପତି ବିସର୍ଜନରେ ଆପାର୍ଟମେଣ୍ଟରୁ ମାଂସ ଖଣ୍ଡ ଫିଙ୍ଗି ଅଶାନ୍ତି ସୃଷ୍ଟି କରିବାକୁ ଉଦ୍ୟମ, ୩ ଗିରଫ

ନନ୍ଦିଘୋଷ ବ୍ୟୁରୋ: ତେଲେଙ୍ଗାନାର ରାଜଧାନୀ ହାଇଦ୍ରାବାଦରେ ରବିବାର ଗଣପତି ବିସର୍ଜନ ବେଳେ ମାଂସ ଖଣ୍ଡ ଫିଙ୍ଗି ଅଶାନ୍ତି ସୃଷ୍ଟି କରିବାକୁ ଉଦ୍ୟମ । ଏକ ଆପାର୍ଟମେଣ୍ଟର ୭ମ ମହଲାରୁ ଏହି ମାଂସ ଖଣ୍ଡ ଫିଙ୍ଗାଯାଇଥିଲା । ଅଭିଯୋଗ ପରେ ପୋଲିସ ତ୍ବରିତ ପଦକ୍ଷେପ ନେଇ ୩ ଜଣଙ୍କୁ ଉଠାଇ ନେଇଛି ।

ରବିବାର ଅପରାହ୍ନ ପ୍ରାୟ ୩ଟାରେ ଘଟଣା ଘଟିଛି । ସ୍ଥିତି ବିଗିଡ଼ାବ ଆଶଙ୍କାରେ ହାଇଦ୍ରାବାଦ ପୋଲିସ ତୁରନ୍ତ ଘଟଣା ସ୍ଥଳରେ ପହଞ୍ଚି ସ୍ଥିତିକୁ ନିୟନ୍ତ୍ରଣ କରିଥିଲା । ଖବର ପାଇବା ପରେ ଚାରମୀନାର ଜୋନ ଡିସିପି ପୋଲିସ ପ୍ଲାଟୁନ ସହ ଘଟଣା ସ୍ଥଳରେ ପହଞ୍ଚି ଯାଇଥିଲେ । ପ୍ରାରମ୍ଭିକ ତଦନ୍ତ ଅନୁସାରେ, ସନ୍ଦିଗ୍ଧ ଆପାର୍ଟମେଣ୍ଟରୁ ୩ ଜଣଙ୍କୁ ପୋଲିସ ଗିରଫ କରି ପଚରାଉଚରା କରୁଛି । ସମସ୍ତଙ୍କୁ କୋର୍ଟରେ ହାଜର କରାଯିବା ପରେ ରିମାଣ୍ଡରେ ନେଇ ଅଧିକ ତଦନ୍ତ କରାଯିବ ବୋଲି ପୋଲିସ ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।

ମିଳିଥିବା ସୂଚନା ଅନୁସାରେ, ମାଂସ ଖଣ୍ଡ ଫିଙ୍ଗାଯିବା ପରେ ଗଣେଶ କମିଟି କର୍ମକର୍ତ୍ତା ପୋଲିସକୁ ଖବର ଦେବା ସହ ଥାନାରେ ଲିଖିତ ଅଭିଯୋଗ କରିଥିଲେ । ଏଥିରେ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରାଯାଇଛି ।

ଘଟଣା ପରେ ପୋଲିସ ପ୍ରଶାସନ ପକ୍ଷରୁ ତ୍ବରିତ ପଦକ୍ଷେପ ନିଆଯିବା ସହ ଦୁଇ ପକ୍ଷଙ୍କ ବରିଷ୍ଠ ବ୍ୟକ୍ତିଙ୍କ ସହଯୋଗରେ ସ୍ଥିତିକୁ ନିୟନ୍ତ୍ରଣକୁ ନେଇଥିଲା । ସାମାଜିକ ଗଣମାଧ୍ୟମରେ ଅପପ୍ରଚାରକୁ ଭରସା ନକରିବାକୁ ପରାମର୍ଶ ଦେଇଛନ୍ତି । ଏହାସହ ଜାଣିଣୁଣି ଅସାମାଜିକ ପୋଷ୍ଟ କରି ସାମ୍ପ୍ରଦାୟିକ ଭାଇଚାରା ବିଗାଡିବାକୁ ଚେଷ୍ଟା କଲେ ଦୃଢ଼ କାର୍ଯ୍ୟାନୁଷ୍ଠାନ ନିନିଆଯିବାକୁ ଚେତାବନୀ ଦିଆଯାଇଛି ।