ଚନ୍ଦକାରେ ଭାଇ ଭାଇ ଭିତରେ ରକ୍ତାକ୍ତ ସଂଘର୍ଷ ।

ନନ୍ଦିଘୋଷ ବ୍ୟୁରୋ :ରାଜଧାନୀ ଉପକଣ୍ଠ ଚନ୍ଦକା ଥାନା ଅଞ୍ଚଳରେ ଅଭାବନୀୟ ଘଟଣା। ସାମାନ୍ୟ ବଚସାକୁ ନେଇ ଭାଇ ଭାଇ ଭିତରେ ରକ୍ତାକ୍ତ ସଂଘର୍ଷ। ବୋମାମାଡ଼ରେ ଜଣେ ମୃତ , ଜଣେ ଗୁରୁତର ହୋଇଛନ୍ତି। ସାମାନ୍ୟ କଥାକୁ ନେଇ ପ୍ରଥମେ ବଚସା ହୋଇଥିଲା, ପରେ ତାହା ଉଗ୍ର ରୂପ ନେଇଥିଲା। ବଚସା ପରେ ହାତ ତିଆରି ବୋମା ପକାଇ ଆକ୍ରମଣ କରାଯାଇଛି। ଏଥିରେ ଜଣେ ଭାଇର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ଚନ୍ଦକା ଥାନା ଅଙ୍ଗାରପଡ଼ା ପଞ୍ଚାୟତ ମହୁଲ ଗାଁରେ ଘଟିଛି ଏଭଳି ଘଟଣା। ସୂଚନା ଅନୁସାରେ ପାରିବାରିକ କଳହକୁ କଥା କଟାକଟି ପରେ ଜଣେ ଭାଇ ଉତକ୍ଷିପ୍ତ ହୋଇ  ବାରାହା ଶିକାର କରିବାକୁ ପାଖରେ ରଖିଥିବା ହାତ ତିଆରି ବୋମା ପକାଇ ଆକ୍ରମଣ କରିଥିଲା। ବୋମାମାଡ଼ରେ ମଝିଆ ଭାଇ ମୋହନ ପାଢ଼ୀଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି। ସାନ ମଝିଆ ଭାଇ ମଦନ ପାଢ଼ୀ  ଗୁରୁତର ଭାବେ ଆହତ ହୋଇଛନ୍ତି। ତାଙ୍କୁ ପ୍ରଥମେ ନିକଟସ୍ଥ ହସ୍ପିଟାଲ ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ଘଟଣା ପରେ ଗାଁରେ ଉତ୍ତେଜନା ପ୍ରକାଶ ପାଇଛି। ଖବର ପାଇ ଚନ୍ଦକା ଥାନା ପୋଲିସ ,ଜୋନ ଏସିପି ,ସାଇଣ୍ଟିଫିକ୍ ଟିମ୍ ଓ ଭୁବନେଶ୍ବର ଡିସିପି କ୍ରାଇମ୍ ସ୍ପଟ୍ ରେ ପହଞ୍ଚି ବିଭିନ୍ନ ନମୁନା ସଂଗ୍ରହ କରିବା ସହ ତଦନ୍ତ ଆରମ୍ଭ କରିଛନ୍ତି ।  ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି। ଏହି ବୋମା କେଉଁଠୁ ଆସିଲା ଏବଂ ଏହା ପଛର ପ୍ରକୃତ କାରଣ କଣ, ସେନେଇ ପୋଲିସ ତଦନ୍ତ ଜାରି ରଖିଛି..।