ମହଙ୍ଗା ପଡ଼ିଲାଣି ଇରାନ ବିରୋଧୀ ଯୁଦ୍ଧ

ନନ୍ଦିଘୋଷ ବ୍ୟୁରୋ :ମହଙ୍ଗା ପଡ଼ିଲାଣି ଇରାନ ବିରୋଧୀ ଯୁଦ୍ଧ। ୬ ମାସରେ ଆମେରିକାର କ୍ଷତି ହେଲାଣି ୩୩.୪ ବିଲିୟନ ଡଲାର। ଭାରତୀୟ ମୁଦ୍ରାରେ ଏହି ପରିମାଣ ହେବ ୩ ଲକ୍ଷ ୨୧ ହଜାର କୋଟି ଟଙ୍କା।  ସେଥିରେ ରହିଛି ୨୨ ବିଲିୟନ ଡଲାରର ଯୁଦ୍ଧାସ୍ତ୍ର। କେବଳ ଏତିକି ନୁହେଁ ୨୪ରୁ ଅଧିକ ବିମାନ ଧ୍ବଂସ ହେବା ସହ ବିଭିନ୍ନ ସ୍ଥାନରେ ଥିବା ଶତାଧିକ ସାମରିକ ବେସ ବି ନଷ୍ଟ ହେଲାଣି। ଏହି ଯୁଦ୍ଧ ଯୋଗୁ ଆମେରିକାର ଯୁଦ୍ଧାସ୍ତ୍ର ପରିମାଣ ହ୍ରାସ ପାଇଛି। ପ୍ରତିରକ୍ଷା ଇନ୍ସପେକ୍ଟର ଜେନେରାଲ ବିଭାଗ ପକ୍ଷରୁ ଏହି ସୂଚନା ଦିଆଯାଇଛି। ୨୨ ବିଲିୟନ ଡଲାରର ଯୁଦ୍ଧାସ୍ତ୍ର ମଧ୍ୟରେ ରହିଛି ୩.୭ ବିଲିୟନ ଡଲାରର ଯନ୍ତ୍ରାଂଶ ଓ ୭.୪ ବିଲିୟନ ଡଲାରର ବିଭିନ୍ନ ଖର୍ଚ୍ଚ। ନଷ୍ଟ ହୋଇଥିବା ବିମାନ ମଧ୍ୟରେ ରହିଛି ଅନେକ ଫାଇଟର ଜେଟ, ଏରିଆଲ ରିଫୁଏଲିଂ ଟ୍ୟାଙ୍କର, ହେଲିକପ୍ଟର ଓ ମାନବବିହୀନ ସାମରିକ ବିମାନ। ୪ଟି F-15E ଲଢୁଆ ଜେଟକୁ ଗତ ମାର୍ଚ୍ଚ ୧ରେ କୁଏତରେ ଖସାଇ ଦିଆଯାଇଥିଲା। ସେହି ମାର୍ଚ୍ଚରେ ଗୋଟିଏ F-35A ଷ୍ଟେଲଥ ଫାଇଟର ଜେଟକୁ ଖସାଇଦେଇଥିଲା ଇରାନ। ସେହିପରି ଇରାନ ଆକ୍ରମଣରେ ନଷ୍ଟ ହୋଇଛି ଗୋଟିଏ A-10 ଗ୍ରାଉଣ୍ଡ ଆଟାକ ଏୟାରକ୍ରାଫ୍ଟ। ୭ଟି KC-135 ଏରିଆଲ ରିଫୁଏଲିଂ ଟ୍ୟାଙ୍କର, ଗୋଟିଏ E-3 ସେଣ୍ଟ୍ରି ଏୟାରବର୍ନ ଅର୍ଲିୱାର୍ଣ୍ଣିଂ ଏୟାରକ୍ରାଫ୍ଟ ବି ନଷ୍ଟ ହୋଇଛି। ସେହିପରି ଗୋଟିଏ HH-60W ହେଲିକପ୍ଟର, ଗୋଟିଏ MQ-4C ଟ୍ରାଇଟନ ସର୍ଭେଲାନ୍ସ ଏୟାରକ୍ରାଫ୍ଟ, ଗୋଟିଏ AH-64 ଆପାଚେ ଆଟାକ ହେଲିକପ୍ଟର, ୪ଟି AH-6 ହେଲିକପ୍ଟର ନଷ୍ଟ ହୋଇଥିବା ରିପୋର୍ଟ ମିଳିଛି। କୁଏତ, ବାହାରିନ, କତାର, ୟୁଏଇ, ସାଉଦିଆରବ, ଇରାକ, ଓମାନ ଓ ଜୋର୍ଡାନରେ ଥିବା ଆମେରିକାର ସାମରିକ ପ୍ରତିଷ୍ଠାନର କ୍ଷତି ଘଟିଛି। ବର୍ତ୍ତମାନ ସୁଦ୍ଧା ଆମେରିକାର ୧୧ଜଣ ସାମରିକ କର୍ମଚାରୀଙ୍କ ପ୍ରାଣହାନି ହୋଇଥିବା କୁହାଯାଇଛି।…

ସେପଟେ ମହଙ୍ଗା ପଡ଼ିପାରେ ରୁଷିଆରୁ ତୈଳ କ୍ରୟ। ଭାରତ ସମେତ କିଛି ରାଷ୍ଟ୍ର ଉପରେ ୧୦୦ ପ୍ରତିଶତ ଟାରିଫ ଲଦିବା ଲାଗି ପଥ ପରିଷ୍କାର କଲା ଆମେରିକା ପ୍ରତିନିଧି ସଭା। ଗୃହୀତ ପ୍ରସ୍ତାବରେ ରାଷ୍ଟ୍ରପତି ଟ୍ରମ୍ପଙ୍କୁ ଏହି କ୍ଷମତା ପ୍ରଦାନ କରିବା ଲାଗି ଉଦ୍ଦିଷ୍ଟ ବିଲକୁ ମଞ୍ଜୁରୀ ଦିଆଯାଇଛି।