ରାଜଧାନୀରେ ଲୁଟେରାଙ୍କ ଆତଙ୍କ, ATMରୁ ଟଙ୍କା ଉଠାଉଥିବା ଯାତ୍ରୀ ଟାର୍ଗେଟ

ନନ୍ଦିଘୋଷ ବ୍ୟୁରୋ : ନୂଆ ପର୍ବଣ ଆରମ୍ଭରୁ ରାଜଧାନୀରେ ଲୁଟେରାଙ୍କ ଆତଙ୍କ। ରେଲୱେ ଷ୍ଟେସନ ଅଞ୍ଚଳରେ ସକାଳୁ ସକାଳୁ ଦୁଇ ଯାତ୍ରୀଙ୍କୁ ମାଡ଼ ମାରି ୫୦ ହଜାରରୁ ଅଧିକ ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ବିଶେଷ କରି ATMରୁ ଟଙ୍କା ଉଠାଉଥିବା ଲୋକଙ୍କୁ ଲୁଟେରାମାନେ ଟାର୍ଗେଟ କରୁଥିବା ଅଭିଯୋଗ ଆସିଛି। ସକାଳୁ ସକାଳୁ ଦୁଇ ଦୁଇଟି ଲୁଟ୍ ଘଟଣା ପରେ ରେଲୱେ ଷ୍ଟେସନ ଅଞ୍ଚଳର ସୁରକ୍ଷା ବ୍ୟବସ୍ଥାକୁ ନେଇ ଉଠିଛି ବଡ଼ ପ୍ରଶ୍ନ। ଅଭିଯୋଗ ଅନୁସାରେ, ପର୍ଶୁରାମ କରଣ ନିଜ ଝିଅକୁ ରେଲୱେ ଷ୍ଟେସନରେ ଛାଡ଼ିବାକୁ ଆସିଥିଲେ। ଏହି ସମୟରେ ସେ ATMରୁ ଟଙ୍କା ଉଠାଉଥିବା ବେଳେ ଲୁଟେରାଙ୍କ ଟାର୍ଗେଟରେ ପଡ଼ିଥିଲେ। ତାଙ୍କୁ ମାଡ଼ ମାରିବା ସହ ଟଙ୍କା ଲୁଟିନେଇଥିବା ଅଭିଯୋଗ ହୋଇଛି। ସେହିପରି ଗଣେଶ୍ୱର ମହନ୍ତ ମେଡିକାଲ କାମ ପାଇଁ ATMରୁ ଟଙ୍କା ଉଠାଉଥିବା ବେଳେ ଲୁଟେରାଙ୍କ ଶିକାର ହୋଇଥିଲେ। ତାଙ୍କୁ ମଧ୍ୟ ମାଡ଼ ମାରି ଟଙ୍କା ଲୁଟିନେଇଥିବା ଅଭିଯୋଗ ରହିଛି।

ଯାତ୍ରୀଙ୍କ ଗହଳି, ରେଲୱେ ଷ୍ଟେସନରେ ଭିଡ଼ ଏବଂ ଏହାରି ଭିତରେ ଲୁଟେରାଙ୍କ ଖେଳ। ATMରୁ ଟଙ୍କା ଉଠାଉଥିବା ଲୋକଙ୍କ ଉପରେ ନଜର ରଖି ଲୁଟେରାମାନେ ଟାର୍ଗେଟ କରୁଥିବାରୁ ଯାତ୍ରୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ଘଟଣାକୁ ନେଇ ଖାରବେଳ ନଗର ଥାନାରେ ଅଭିଯୋଗ ହୋଇଛି। ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ରେଲୱେ ଷ୍ଟେସନ ଭଳି ଜନଗହଳିପୂର୍ଣ୍ଣ ଅଞ୍ଚଳରେ ଏଭଳି ଘଟଣା ଯାତ୍ରୀଙ୍କ ସୁରକ୍ଷାକୁ ନେଇ ଚିନ୍ତା ବଢ଼ାଇଛି।