First Female Baloch Rebel Unit Attacks Pakistani Military Convoy: ବାଲୋଚ ବିଦ୍ରୋହୀଙ୍କ ପ୍ରଥମ ମହିଳା ୟୁନିଟ୍‌ର ଆକ୍ରମଣ, ୯ ପାକ୍ ସୈନିକ ନିହତ !

ବାଲୋଚିସ୍ତାନ ଲିବରେସନ୍ ଫ୍ରଣ୍ଟ୍ (BLF) ନିଜର ନୂଆ ଗଠିତ ମହିଳା ୟୁନିଟ୍ ‘କରିମା ଆର୍ମଡ୍ ଆସଲ୍ଟ ଡିଭିଜନ୍’ (KAAD)ର ପ୍ରଥମ ସଶସ୍ତ୍ର ଅପରେସନ୍‌ର ଭିଡିଓ ଜାରି କରିଛି। ଏଥିରେ ମହିଳା ଯୋଦ୍ଧାମାନେ ଏକ ସଶସ୍ତ୍ର ଯାନ ସମେତ ପାକିସ୍ତାନୀ ସାମରିକ କନଭୟ ଉପରେ ଗୁଳି ଚଳାଉଥିବା ଦେଖାଯାଇଛି। ବିଚ୍ଛିନ୍ନତାବାଦୀ ସଶସ୍ତ୍ର ଗୋଷ୍ଠୀ BLF ଦାବି କରିଛି ଯେ ଏହି ଆକ୍ରମଣରେ ୯ ଜଣ ପାକିସ୍ତାନୀ ସାମରିକ କର୍ମଚାରୀ ନିହତ ହୋଇଛନ୍ତି।

ଭିଡିଓରେ ପ୍ରଥମ ବ୍ୟକ୍ତିଙ୍କ ଦୃଷ୍ଟିକୋଣରୁ ଟର୍ବାଟରେ ହୋଇଥିବା ଏକ ଅପରେସନ୍‌ର ଦୃଶ୍ୟ ରହିଛି। ସେପ୍ଟେମ୍ବର ୨୨ରେ ବାଲୋଚିସ୍ତାନ ପ୍ରଦେଶର ଚୀନ୍-ପାକିସ୍ତାନ ଇକୋନୋମିକ୍ କରିଡର୍ ହାଇୱେରେ ତିନିଟି ଗାଡ଼ି ଥିବା କୁଇକ୍ ରେସ୍ପନ୍ସ ଫୋର୍ସ କନଭୟ ଉପରେ ରାଇଫଲ୍ ଧରିଥିବା KAAD ଯୋଦ୍ଧାମାନେ ଗୁଳି ଚଳାଇଥିବା ଦେଖାଯାଇଛି।

ଭିଡିଓରେ ଜଣେ ମହିଳା କମାଣ୍ଡର ଅପରେସନ୍‌ ସମ୍ପର୍କରେ ବ୍ରିଫିଂ ଦେଉଥିବା ଦେଖାଯାଇଛି। ଏହାପରେ ଯୋଦ୍ଧାମାନେ ଅତି ନିକଟରୁ ଆକ୍ରମଣ କରିଥିବା ଦୃଶ୍ୟ ରହିଛି। ଏହି ଗୋଷ୍ଠୀର ଯୋଦ୍ଧାମାନଙ୍କ ତାଲିମ ସମ୍ପର୍କରେ ଦାବି କରାଯାଇଛି।

ଗୋଷ୍ଠୀର ମୁଖପାତ୍ର ମେଜର ଗ୍ୱାହରାମ ବାଲୋଚ୍ ଏକ ବିବୃତିରେ କହିଛନ୍ତି ଯେ, ଆକ୍ରମଣରେ ପାକିସ୍ତାନୀ ସେନାର ଅନେକ ଗାଡ଼ି ଗୁରୁତର ଭାବେ କ୍ଷତିଗ୍ରସ୍ତ ହୋଇଛି। ମହିଳା ୟୁନିଟ୍‌କୁ ଗୋଷ୍ଠୀର ‘କୁର୍ବାନ୍ ୟୁନିଟ୍’ ସହାୟତା କରିଥିଲା ଏବଂ ଘେରାଉ କରିବାକୁ ଚେଷ୍ଟା କରିଥିବା ପାକିସ୍ତାନୀ ସେନା ସହ ଲଢ଼ି ସେମାନଙ୍କ ପ୍ରତ୍ୟାବର୍ତ୍ତନ ପାଇଁ ରାସ୍ତା ସୁଗମ କରିଥିଲା ବୋଲି ସେ ଦାବି କରିଛନ୍ତି।
ତାଙ୍କ କହିବା ଅନୁସାରେ, ଆକ୍ରମଣ ସମୟରେ କୁର୍ବାନ୍ ୟୁନିଟ୍‌ର ଯୋଦ୍ଧା ଚକର ମୁରାଦ ଓରଫ ଦିଲୀପ ଜନ୍ ନିହତ ହୋଇଥିଲେ।

ଭିଡିଓର ଅନ୍ୟ ଏକ ଦୃଶ୍ୟରେ KAAD ସଦସ୍ୟମାନେ କାଲାଟ୍‌ର ମାଙ୍ଗଚର ଅଞ୍ଚଳରେ ଗାଡ଼ିଗୁଡ଼ିକର ହଠାତ୍ ଯାଞ୍ଚ କରୁଥିବା ଦେଖାଯାଇଛି।
ଅନ୍ୟ ଏକ ଘଟଣାରେ ବାଲୋଚ୍ ରିପବ୍ଲିକାନ୍ ଆର୍ମି (BRA) ବାଲୋଚିସ୍ତାନର ଡେରା ବୁଗ୍ଟି ଅଞ୍ଚଳର ବେହ୍ ଲୋଟିରେ ଥିବା ମାରି ଏନର୍ଜିଜ୍ ଲିମିଟେଡ୍‌ର ଏକ ସାଇଟ୍‌ ଉପରେ ରକେଟ୍ ଓ ଭାରୀ ଅସ୍ତ୍ର ବ୍ୟବହାର କରି ଆକ୍ରମଣ କରିଥିବା ଖବର ମିଳିଛି।

ଗୋଷ୍ଠୀର ମୁଖପାତ୍ର ସରବାଜ ବାଲୋଚ୍ ଦାବି କରିଛନ୍ତି ଯେ, ଏହି ଆକ୍ରମଣରେ କମ୍ପାନୀର ୩ ଜଣ କର୍ମଚାରୀ ନିହତ ଏବଂ ଅନେକ ଆହତ ହୋଇଛନ୍ତି।
ସରବାଜଙ୍କ କହିବା ଅନୁସାରେ, ମାରି ଏନର୍ଜିଜ୍ ଲିମିଟେଡ୍‌ର ସାଇଟ୍‌ ଉପରେ ଆକ୍ରମଣ ପରେ ପାକିସ୍ତାନୀ ସେନା ଓ ଗୋଷ୍ଠୀ ମଧ୍ୟରେ ଗୁଳି ବିନିମୟ ହୋଇଥିଲା।

ବିବୃତି ଅନୁସାରେ, ଏହି ଆକ୍ରମଣରେ ୯ ଜଣ ପାକିସ୍ତାନୀ ସାମରିକ କର୍ମଚାରୀ ଏବଂ ସଶସ୍ତ୍ର ଗୋଷ୍ଠୀର ୩ ଜଣ ସଦସ୍ୟ ନିହତ ହୋଇଛନ୍ତି। ‘ଦ ବାଲୋଚିସ୍ତାନ ପୋଷ୍ଟ’ ଅନୁସାରେ, BRA ଆହୁରି ଦାବି କରିଛି ଯେ ଗୋଷ୍ଠୀର ୬ ଜଣ ଯୋଦ୍ଧା ମଧ୍ୟ ଏହି ଘଟଣାରେ ପ୍ରାଣ ହରାଇଛନ୍ତି।

ଏହି ଘଟଣାକୁ ନେଇ ପାକିସ୍ତାନ ସେନା ମୁଖ୍ୟ ଅସିମ ମୁନିରଙ୍କ ଟେନ୍ସନ୍ ବଢ଼ିଥିବା କୁହାଯାଉଛି ।