Five-Minute Call, 80 Jobs Gone: ୫ ମିନିଟ୍‌ର Google Meet କଲ୍‌; ୮୦ ଭାରତୀୟଙ୍କୁ ଚାକିରିରୁ ବାହାର କଲା ଆମେରିକା କମ୍ପାନୀ

ଆମେରିକାର ଏକ ଫାଇନାନ୍ସିଆଲ୍ କମ୍ପାନୀ ତା’ର ଭାରତୀୟ କଷ୍ଟମର୍ ସପୋର୍ଟ ଟିମ୍‌ର ପ୍ରାୟ ୮୦ ଜଣ କର୍ମଚାରୀଙ୍କୁ ହଠାତ୍ ଚାକିରିରୁ ବାହାର କରିଦେଇଥିବା ଅଭିଯୋଗ ହୋଇଛି। ସବୁଠାରୁ ଚମକପ୍ରଦ କଥା ହେଲା, ଏହି ନିଷ୍ପତ୍ତି କେବଳ ୫ ମିନିଟ୍‌ର ଏକ Google Meet କଲ୍‌ରେ ଘୋଷଣା କରାଯାଇଥିଲା ବୋଲି ଜଣେ ପ୍ରଭାବିତ କର୍ମଚାରୀ Redditରେ ଦାବି କରିଛନ୍ତି।

‘ପ୍ରଥମେ WFH କରାଇଲେ, ପରେ ଛାଟିଦେଲେ’

r/IndianWorkplace ଫୋରମ୍‌ରେ ଜଣେ କର୍ମଚାରୀ ନିଜ ଅନୁଭବ ସେୟାର୍ କରି କହିଛନ୍ତି ଯେ, ଘଟଣା ଦିନ ‘operational reasons’ ଦର୍ଶାଇ କର୍ମଚାରୀମାନଙ୍କୁ ଅଫିସ୍ ନଆସି ଘରୁ କାମ କରିବାକୁ କୁହାଯାଇଥିଲା।

କର୍ମଚାରୀଙ୍କ ଦାବି ଅନୁସାରେ, ସେମାନେ ସନ୍ଧ୍ୟା ୬ଟା ୩୦ରୁ ନିଜ ଶିଫ୍ଟରେ କାମ କରୁଥିଲେ। ରାତି ପ୍ରାୟ ୯ଟା ୩୦ରେ ସମସ୍ତଙ୍କୁ ହଠାତ୍ Google Meet କଲ୍‌ରେ ଯୋଗଦେବାକୁ କୁହାଯାଇଥିଲା। ସେହି କଲ୍‌ରେ ପ୍ରାୟ ୫ ମିନିଟ୍‌ ମଧ୍ୟରେ ସମଗ୍ର ଭାରତୀୟ କଷ୍ଟମର୍ ସର୍ଭିସ୍ ଟିମ୍‌କୁ ବିଦା କରାଯାଉଥିବା ଘୋଷଣା ହୋଇଥିଲା ବୋଲି ସେ ଲେଖିଛନ୍ତି।

କମେଣ୍ଟରେ କମ୍ପାନୀର ନାଁ କହିଲେ କର୍ମଚାରୀ

Reddit ୟୁଜରମାନେ କମ୍ପାନୀର ନାଁ ପଚାରିବା ପରେ ସମ୍ପୃକ୍ତ କର୍ମଚାରୀ ଏହାକୁ ଆମେରିକୀୟ ଡିଜିଟାଲ୍ ବ୍ୟାଙ୍କିଂ ଓ ଫାଇନାନ୍ସିଆଲ୍ ଫର୍ମ Bluevine ବୋଲି ଉଲ୍ଲେଖ କରିଥିଲେ।

ପୋଷ୍ଟରେ କର୍ମଚାରୀ ଦାବି କରିଛନ୍ତି ଯେ, ଭାରତୀୟ ଟିମ୍‌ରୁ ଆଶାନୁରୂପ output ମିଳୁନଥିବାକୁ ଛାଟେଇର କାରଣ ଭାବେ କୁହାଯାଇଥିଲା। ତେବେ ସେ ଏହି ଦାବିକୁ ଖଣ୍ଡନ କରି କହିଛନ୍ତି ଯେ ଭାରତୀୟ ଟିମ୍ ଅଧିକ ଚାପ ମଧ୍ୟରେ କାମ କରୁଥିଲା ଓ ଭଲ performance ଦେଉଥିଲା।

‘ଏତେ ପରିଶ୍ରମ କରିଥିଲି, ଏବେ ଅନୁତାପ ହେଉଛି’

ଛଟେଇ ପରେ କର୍ମଚାରୀ ନିଜ ଅସନ୍ତୋଷ ବ୍ୟକ୍ତ କରି ଲେଖିଛନ୍ତି ଯେ, ଏତେ ବର୍ଷ ଧରି କମ୍ପାନୀ ପାଇଁ ଅଧିକ ପରିଶ୍ରମ କରିବା ପରେ ଏଭଳି ହଠାତ୍ ଚାକିରି ଯିବା ତାଙ୍କୁ ମାନସିକ ଭାବେ ଆଘାତ ଦେଇଛି। ଏବେ ନୂଆ ଚାକିରି କେମିତି ମିଳିବ, ସେନେଇ ମଧ୍ୟ ସେ ଚିନ୍ତା ପ୍ରକାଶ କରିଛନ୍ତି।

ସୋସିଆଲ୍ ମିଡିଆରେ ତୀବ୍ର ପ୍ରତିକ୍ରିୟା

ପୋଷ୍ଟଟି ଭାଇରାଲ୍ ହେବା ପରେ ଅନେକ Reddit ୟୁଜର୍ କମ୍ପାନୀର ଛାଟେଇ ପ୍ରକ୍ରିୟାକୁ ସମାଲୋଚନା କରିଛନ୍ତି। କେହି କର୍ମଚାରୀମାନଙ୍କୁ କିଛି ଦିନ ବିରତି ନେଇ ନୂଆ ଚାକିରି ପାଇଁ ଆବେଦନ କରିବାକୁ, ପୁରୁଣା ସହକର୍ମୀ ଓ ପରିଚିତମାନଙ୍କ ସହ ଯୋଗାଯୋଗ କରିବାକୁ ପରାମର୍ଶ ଦେଇଛନ୍ତି।

ତେବେ ଏହି ସମସ୍ତ ବିବରଣୀ ଜଣେ Reddit ୟୁଜରଙ୍କ ଦାବି ଉପରେ ଆଧାରିତ। କମ୍ପାନୀ ପକ୍ଷରୁ ଏହି ଅଭିଯୋଗ ଓ ଛାଟେଇ ସମ୍ପର୍କରେ କୌଣସି ସ୍ୱତନ୍ତ୍ର ଆଧିକାରିକ ସ୍ପଷ୍ଟୀକରଣ ଏହି ତଥ୍ୟରେ ଉପଲବ୍ଧ ନାହିଁ।