Fund Misappropriation: ୧୦ ବର୍ଷ ଧରି ସରକାରୀ ଟଙ୍କା ହଡ଼ପ ଅଭିଯୋଗ! ୬୫.୯୦ ଲକ୍ଷ ଟଙ୍କା ମାମଲାରେ ୩ ଗିରଫ
ସରକାରୀ କର୍ମଚାରୀଙ୍କ ଦରମା ଓ ପେନସନ୍ ଟଙ୍କାରେ ହେରଫେର! ଜଣେ କି ଦୁଇ ଜଣ ନୁହେଁ, ଏହି ଘଟଣାରେ ତିନି ଜଣଙ୍କ ସମ୍ପୃକ୍ତି ଥିବା ଅଭିଯୋଗ ଆସିଛି। ଦୀର୍ଘ ୧୦ ବର୍ଷ ଧରି ୬୫.୯୦ ଲକ୍ଷ ଟଙ୍କା ସରକାରୀ ଅର୍ଥ ହଡ଼ପ ଅଭିଯୋଗରେ ଢେଙ୍କାନାଳ ଜିଲ୍ଲାରେ ବଡ଼ କାର୍ଯ୍ୟାନୁଷ୍ଠାନ ନେଇଛି ଭିଜିଲାନ୍ସ। ଢେଙ୍କାନାଳ ଡିଏଫ୍ଓ କାର୍ଯ୍ୟାଳୟର ଜଣେ ବରିଷ୍ଠ କିରାଣିଙ୍କ ସମେତ ତିନି ଜଣଙ୍କୁ ଗିରଫ କରାଯାଇଛି।
ଦରମା ଓ ପେନସନ୍ ଟଙ୍କା ହଡ଼ପ ଅଭିଯୋଗ
ଭିଜିଲାନ୍ସ ଦ୍ୱାରା ଗିରଫ ହୋଇଥିବା ବ୍ୟକ୍ତିମାନେ ହେଲେ ଢେଙ୍କାନାଳ ଡିଏଫ୍ଓ କାର୍ଯ୍ୟାଳୟର ବରିଷ୍ଠ କିରାଣି ସୁଜିତ ଜେନା, ତାଙ୍କ ସମ୍ପର୍କୀୟ ଭାଇ ରଶ୍ମିରଞ୍ଜନ ସ୍ୱାଇଁ ଏବଂ ଏଲିଫ୍ୟାଣ୍ଟ ସ୍କ୍ୱାଡ୍ର ସଦସ୍ୟ ସୌମ୍ୟରଞ୍ଜନ ବେହେରା।
ଅଭିଯୋଗ ଅନୁସାରେ, ୨୦୧୬ ମସିହାରୁ ଦୀର୍ଘ ୧୦ ବର୍ଷ ଧରି ସରକାରୀ ଅର୍ଥରେ ହେରଫେର କରାଯାଇଥିଲା। ବନ ବିଭାଗର କର୍ମଚାରୀଙ୍କ ଦରମା ଓ ପେନସନ୍ ଟଙ୍କାକୁ ହଡ଼ପ କରି ବିଭିନ୍ନ ବ୍ୟାଙ୍କ୍ ଆକାଉଣ୍ଟକୁ ପଠାଯାଉଥିବା ଅଭିଯୋଗ ହୋଇଛି।
କିରାଣିଙ୍କ ମାଆଙ୍କ ଆକାଉଣ୍ଟକୁ ଯାଇଥିଲା ୮.୭୨ ଲକ୍ଷ!
ଏହି ଅର୍ଥ ହେରଫେର ମାମଲାରେ ଆଉ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି। ସୂଚନା ଅନୁସାରେ, ବରିଷ୍ଠ କିରାଣି ସୁଜିତ ଜେନାଙ୍କ ମାଆଙ୍କ ବ୍ୟାଙ୍କ୍ ଆକାଉଣ୍ଟକୁ ମଧ୍ୟ ୮ ଲକ୍ଷ ୭୨ ହଜାର ଟଙ୍କା ପଠାଯାଇଥିବା ଜଣାପଡ଼ିଛି।
ତେବେ ଏହି ଟଙ୍କା କେଉଁ କେଉଁ ଆକାଉଣ୍ଟକୁ ଯାଇଛି, ଏହାର ପ୍ରକୃତ ଉତ୍ସ କ’ଣ ଏବଂ ଏଥିରେ ଆଉ କାହାର ସମ୍ପୃକ୍ତି ରହିଛି, ସେନେଇ ତଦନ୍ତରୁ ଅଧିକ ତଥ୍ୟ ସାମ୍ନାକୁ ଆସିପାରେ।
୬୫.୯୦ ଲକ୍ଷ ଟଙ୍କା ହଡ଼ପ ମାମଲାରେ ତଦନ୍ତ ଜାରି
ପ୍ରାଥମିକ ଅଭିଯୋଗ ଅନୁସାରେ, ଏହି ମାମଲାରେ ମୋଟ ୬୫.୯୦ ଲକ୍ଷ ଟଙ୍କାର ସରକାରୀ ଅର୍ଥ ହଡ଼ପ ହୋଇଥିବା ସନ୍ଦେହ କରାଯାଉଛି। ଦରମା ଓ ପେନସନ୍ ପରି କର୍ମଚାରୀଙ୍କ ପ୍ରାପ୍ୟ ଅର୍ଥରେ କିପରି ହେରଫେର ହେଲା, ତାହା ଏବେ ତଦନ୍ତର ମୁଖ୍ୟ ବିଷୟ।
ତିନି ଜଣଙ୍କ ଗିରଫ ପରେ ଏହି ଅର୍ଥ ହେରଫେରର ଚେର କେତେ ଦୂର ଲମ୍ବିଛି ଏବଂ ଅନ୍ୟ କେହି ଏଥିରେ ସମ୍ପୃକ୍ତ ଅଛନ୍ତି କି ନାହିଁ, ତାହା ଜାଣିବାକୁ ତଦନ୍ତ ଉପରେ ନଜର ରହିଛି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ ODISHA TV - ଓଡିଶା ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ODISHA TV - ଓଡିଶା ଟିଭି ଦେଖନ୍ତୁ।
