ଆକାଉଣ୍ଟଧାରୀ ସାବଧାନ! ୨୫ ସେପ୍ଟେମ୍ୱର ସୁଦ୍ଧା ସାରନ୍ତୁ ବ୍ୟାଙ୍କ୍‌ କାମ, ନହେଲେ ଉଠାଇପାରିବେନି ଟଙ୍କା?

ନୂଆଦିଲ୍ଲୀ,୨୨।୮: ଯଦି ଆପଣଙ୍କର ବ୍ୟାଙ୍କ ସହିତ ଜଡ଼ିତ କୌଣସି ଜରୁରୀ କାର୍ଯ୍ୟ ବାକି ଅଛି, ତେବେ ତାହାକୁ ଯଥାଶୀଘ୍ର ସାରିଦେବା ହିଁ ଆପଣଙ୍କ ପାଇଁ ଲାଭଦାୟକ ହେବ। ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ଗ୍ରାହକମାନଙ୍କୁ ପରାମର୍ଶ ଦେଇଛି ଯେ, ୨୮ ରୁ ୩୦ ସେପ୍ଟେମ୍ୱର ୨୦୨୬ ମଧ୍ୟରେ ପ୍ରସ୍ତାବିତ ତିନିଦିନିଆ ଦେଶବ୍ୟାପୀ ବ୍ୟାଙ୍କ ଧର୍ମଘଟକୁ ଦୃଷ୍ଟିରେ ରଖି ୨୫ ସେପ୍ଟେମ୍ୱର ସୁଦ୍ଧା ଶାଖା ସହିତ ଜଡ଼ିତ ସମସ୍ତ ଗୁରୁତ୍ୱପୂର୍ଣ୍ଣ କାମ ଶେଷ କରିନିଅନ୍ତୁ। ବ୍ୟାଙ୍କ ନିଜର ଅଫିସିଆଲ ’ଏକ୍ସ’ (X) ହ୍ୟାଣ୍ଡେଲରେ ଏକ ପୋଷ୍ଟ ମାଧ୍ୟମରେ ସୂଚନା ଦେଇଛି ଯେ, ଏହି ଧର୍ମଘଟ ସମୟରେ ବ୍ୟାଙ୍କ ଶାଖାଗୁଡ଼ିକରେ ବ୍ୟାଙ୍କିଙ୍ଗ ସେବା ପ୍ରଭାବିତ ହୋଇପାରେ।

ତଥାପି, ଏଟିଏମ (ATM), ମୋବାଇଲ ବ୍ୟାଙ୍କିଙ୍ଗ, ଇଣ୍ଟରନେଟ ବ୍ୟାଙ୍କିଙ୍ଗ, ୟୁପିଆଇ (UPI) ଏବଂ ବିଜନେସ କରେସପଣ୍ଡେଣ୍ଟ ଭଳି ଡିଜିଟାଲ ସେବାଗୁଡ଼ିକୁ ଚାଲୁ ରଖିବାକୁ ଚେଷ୍ଟା କରାଯିବ। ୨୮ ରୁ ୩୦ ସେପ୍ଟେମ୍ୱରର ଏହି ଧର୍ମଘଟ ପୂର୍ୱରୁ ୨୬ ସେପ୍ଟେମ୍ୱରରେ ଚତୁର୍ଥ ଶନିବାର ଏବଂ ୨୭ ସେପ୍ଟେମ୍ୱରରେ ରବିବାର ପଡୁଛି। ଏପରି ସ୍ଥିତିରେ, ଯଦି ଆପଣଙ୍କର ଏପରି କିଛି କାମ ଅଛି ଯାହା ପାଇଁ ବ୍ୟାଙ୍କ ଶାଖାକୁ ଯିବା ଜରୁରୀ, ତେବେ ତାହା ପୂର୍ୱରୁ ହିଁ ଶେଷ କରିନିଅନ୍ତୁ।

PNB ଗ୍ରାହକମାନଙ୍କୁ କ’ଣ ପରାମର୍ଶ ଦେଇଛି?

* ୨୫ ସେପ୍ଟେମ୍ୱର ୨୦୨୬ ସୁଦ୍ଧା ଶାଖା ସହିତ ଜଡ଼ିତ ସମସ୍ତ ଜରୁରୀ ବ୍ୟାଙ୍କିଙ୍ଗ କାମ ଶେଷ କରିନିଅନ୍ତୁ।
* ଟଙ୍କା ଜମା କିମ୍ୱା ନଗଦ ଉଠାଣ ଭଳି ଜରୁରୀ କାର୍ଯ୍ୟ ସମୟ ଥାଉ ଥାଉ ସାରିଦିଅନ୍ତୁ।
* ଆବଶ୍ୟକୀୟ କାଗଜପତ୍ର ଦାଖଲ କରିବା କିମ୍ୱା ଶାଖା ସମ୍ପର୍କିତ ଅନ୍ୟାନ୍ୟ କାର୍ଯ୍ୟକୁ ଶେଷ ମୁହୂର୍ତ୍ତ ପର୍ଯ୍ୟନ୍ତ ସ୍ଥଗିତ ରଖନ୍ତୁ ନାହିଁ।
* ଧର୍ମଘଟ ସମୟରେ ଶାଖାଗୁଡ଼ିକରେ କାର୍ଯ୍ୟ ପ୍ରଭାବିତ ହେଲେ ଆପଣଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ।

PNB ପକ୍ଷରୁ କୁହାଯାଇଛି ଯେ, ଧର୍ମଘଟ ସମୟରେ ଗ୍ରାହକଙ୍କ ଆବଶ୍ୟକତା ପୂରଣ ପାଇଁ ATM, ମୋବାଇଲ ବ୍ୟାଙ୍କିଙ୍ଗ, ଇଣ୍ଟରନେଟ ବ୍ୟାଙ୍କିଙ୍ଗ ଏବଂ UPI ଭଳି ଡିଜିଟାଲ ସେବାଗୁଡ଼ିକୁ ଉପଲବ୍ଧ ରଖିବାକୁ ପ୍ରୟାସ କରାଯିବ। ତେଣୁ ଯେଉଁ କାମ ଅନଲାଇନ ମାଧ୍ୟମରେ ହୋଇପାରିବ, ସେଥିପାଇଁ ଗ୍ରାହକମାନେ ଡିଜିଟାଲ ବ୍ୟାଙ୍କିଙ୍ଗ ବ୍ୟବହାର କରିପାରିବେ।

ୟୁନାଇଟେଡ ଫୋରମ ଅଫ ବ୍ୟାଙ୍କ ୟୁନିଅନ୍ସ (UFBU) ଏବଂ ଏହାର ସହବନ୍ଧିତ ସଂଗଠନଗୁଡ଼ିକ ପକ୍ଷରୁ ୨୮ ରୁ ୩୦ ସେପ୍ଟେମ୍ୱର ପର୍ଯ୍ୟନ୍ତ ତିନିଦିନିଆ ଦେଶବ୍ୟାପୀ ଧର୍ମଘଟ ଡାକରା ଦିଆଯାଇଛି। ବ୍ୟାଙ୍କ କର୍ମଚାରୀ ୟୁନିଅନ୍ର ପ୍ରମୁଖ ଦାବି ମଧ୍ୟରେ ବ୍ୟାଙ୍କଗୁଡ଼ିକରେ ’ସପ୍ତାହକୁ ପାଞ୍ଚ ଦିନ କାର୍ଯ୍ୟଦିବସ’ (୫-ଡେ ୱାର୍କ ୱିକ) ଲାଗୁ କରିବା ଅନ୍ତର୍ଭୁକ୍ତ। ଏଥିସହିତ ସରକାରଙ୍କ ପକ୍ଷରୁ ଧର୍ମଘଟକୁ ସ୍ଥଗିତ ରଖିବା ଏବଂ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ନିବେଦନ ମଧ୍ୟ କରାଯାଇଛି।