ଚିଲିକା ମଝିରେ ଅଟକିଲା ଡଙ୍ଗା: ଭୟରେ ଥରିଲେ ଯାତ୍ରୀ, ଆଉ ତା’ପରେ…
କୃଷ୍ଣପ୍ରସାଦ,୭।୧୦(କୈଳାଶ ଚନ୍ଦ୍ର ପଟ୍ଟନାୟକ):ପୁରୀ ଜିଲା କୃଷ୍ଣପ୍ରସାଦ ବ୍ଲକ ସାତପଡ଼ା- ଜହ୍ନିକୁଦା ଚିଲିକା ମଝିରେ ଘଟିଛି ଅଘଟଣ। ବୁଧବାର ସକାଳ ୭ଟାରେ ଏକ ଯାତ୍ରୀବାହୀ ଡ଼ଙ୍ଗା ୫୦ରୁ ଉର୍ଦ୍ଧ୍ୱ ଯାତ୍ରୀ ଏବଂ ୨୫ ମୋଟର ସାଇକେଲ ନେଇ ଜହ୍ନିକୁଦାରୁ ସାତପଡ଼ା ଅଭିମୁଖେ ଯାତ୍ରା କରିଥିଲା। ତେବେ କିଛି ସମୟ ଯାତ୍ରା ପରେ ମଇଂସା ଗ୍ରାମ ନିକଟ ମଝି ଚିଲିକାରେ ଯାନ୍ତ୍ରିକ ତ୍ରୁଟି ଦେଖା ଦେଇଥିଲା। ତେବେ ଡଙ୍ଗାଟି ସେହିଠାରେ ଅଟକିଥିଲା। ଚିଲିକାରେ ଅଥଳ ପାଣି ସାଙ୍ଗକୁ ମାତ୍ରାଧିକ ଯାତ୍ରୀ ଥିବାରୁ ଯାତ୍ରୀମାନେ ଭୟଭୀତ ହୋଇ ହୋହଲ୍ଲା କରିଥିଲେ। ଅନ୍ୟ ଏକ ଡଙ୍ଗା ଆସି ଯାତ୍ରୀ ଏବଂ ମଟର ସାଇକେଲକୁ ଉଦ୍ଧାର କରି ସାତପଡା ନେଇଥିବା ଜଣାଯାଇଛି। ପ୍ରତିମାସରେ ଏହିଭଳି ଘଟଣା ଘଟୁଥିବା ଜଣାଯାଇଛି। ଡଙ୍ଗା ଚାଳକମାନେ ପଇସା ଲୋଭରେ ଅଧିକ ଯାତ୍ରୀ ନେଉଥିଲେ ମଧ୍ୟ ପ୍ରଶାସନ ନୀରବ ଦ୍ରଷ୍ଠା ସାଜିଛି। ପ୍ରତିଦିନ ଏହି ଚିଲିକାରେ ହଜାର ହଜାର ଯାତ୍ରୀ ଯାତାୟତ କରୁଥିବାବେଳେ ଯାତ୍ରୀଙ୍କ ସୁରକ୍ଷା ପାଇଁ ଏକ ସ୍ଥାୟୀ ବ୍ରିଜ଼ ନିର୍ମାଣ ଦାବି ହେଉଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
