ଜର୍ନାଲିଷ୍ଟ ରବି ନାୟାରଙ୍କୁ ଜାମିନ
ଅହମ୍ମଦାବାଦ,୨୫।୯: ଗୁଜରାଟର ଗାନ୍ଧୀନଗରସ୍ଥିତ ଏକ ସେସନ୍ସ କୋର୍ଟ ଗୁରୁବାର ଜର୍ନାଲିଷ୍ଟ ରବି ନାୟାରଙ୍କୁ ଜାମିନ ପ୍ରଦାନ କରିଛନ୍ତି । ଆଦାନୀ ଏଣ୍ଟରପ୍ରାଇଜେସ ଦ୍ୱାରା ଦାଖଲ ଏକ ଆପରାଧିକ ମାନହାନି ମାମଲାରେ ହାଜର ନ ହେବାରୁ ତାଙ୍କୁ ଗିରଫ କରାଯିବାର ଏକ ସପ୍ତାହ ପରେ ଏହି ଜାମିନ ମିଳିଛି। ତାଙ୍କ ଓକିଲ ରୋନିଥ ଜୟ କହିଛନ୍ତି ଯେ, ପ୍ରମୁଖ ଜିଲ୍ଲା ତଥା ଦୌରା ଜଜ୍ ଆଶିଷ ଜେ ଏସ୍ ମଲ୍ହୋତ୍ରା ଗତ ସେପ୍ଟେମ୍ବର ୧୭ରେ ରବି ନାୟାରଙ୍କ ବିରୋଧରେ ଜାରି ଜାମିନବିହୀନ ଗିରଫ ପରୱାନା (ଏନ୍ବିଡବ୍ଲ୍ୟୁ) ପରେ ତାଙ୍କର ଜାମିନ ଆବେଦନକୁ ମଞ୍ଜୁର କରିଛନ୍ତି । ଏହି ମାମଲାରେ ଦୋଷୀ ସାବ୍ୟସ୍ତ ସଂକ୍ରାନ୍ତ ଆବେଦନର ଶୁଣାଣି ସମୟରେ ବ୍ୟକ୍ତିଗତ ଭାବରେ ହାଜର ହେବାରେ ବିଫଳ ହେବାରୁ କୋର୍ଟ ନାୟାରଙ୍କୁ ଏହି ଏନ୍ବିଡବ୍ଲ୍ୟୁ ଜାରି କରିଥିଲେ। ତାଙ୍କର ଜାମିନ ଆବେଦନ ଶନିବାର ସେସନ୍ସ କୋର୍ଟରେ ଦାଖଲ ହୋଇଥିଲା ଏବଂ ସୋମବାର ଏହାର ଶୁଣାଣି ହୋଇଥିଲା। ଗୁରୁବାର କୋର୍ଟ ତାଙ୍କ ଆବେଦନକୁ ମଞ୍ଜୁର କରିଛନ୍ତି।
ସେସନ୍ସ କୋର୍ଟରେ ଜାମିନ ଆବେଦନ କରିବା ସହିତ ନାୟାର ଗୁଜରାଟ ହାଇକୋର୍ଟରେ ମଧ୍ୟ ଏନ୍ବିଡବ୍ଲ୍ୟୁ ଉପରେ ରୋକ ଲଗାଇବା ପାଇଁ ଆବେଦନ କରିଥିଲେ। ଫେବୃଆରୀ ୧୦ରେ ଗାନ୍ଧୀନଗରର ଏକ ମାନସା କୋର୍ଟ ଆଦାନୀ ଏଣ୍ଟରପ୍ରାଇଜେସ ଦ୍ୱାରା ୩ ସେପ୍ଟେମ୍ବର ୨୦୨୧ରେ ଦାଖଲ ଏକ ଆପରାଧିକ ମାନହାନି ମାମଲାରେ ରବି ନାୟାରଙ୍କୁ ଏକ ବର୍ଷର କାରାଦଣ୍ଡ ଶୁଣାଇଥିଲେ। କିଛି ଆର୍ଟିକିଲକୁ ନେଇ ତାଙ୍କ ନାମରେ ଏହି ମାମଲା ଦାଏର ହୋଇଥିଲା।
ନାୟାର ଗାନ୍ଧୀନଗରର ଏକ ଅପିଲ କୋର୍ଟରେ ନିଜର ଦୋଷୀ ସାବ୍ୟସ୍ତକୁ ଚ୍ୟାଲେଞ୍ଜ କରିଥିଲେ, ଯେଉଁଠାରୁ ତାଙ୍କୁ ୯ ମାର୍ଚ୍ଚରେ ଏହି ସର୍ତ୍ତରେ ଜାମିନ ମିଳିଥିଲା ଯେ ସେ ଅପିଲ ଶୁଣାଣି ସମୟରେ ଉପସ୍ଥିତ ରହିବେ। କିନ୍ତୁ ବ୍ୟକ୍ତିଗତ କାରଣ ଦର୍ଶାଇ ସେ ଉପସ୍ଥିତ ହୋଇ ନ ଥିଲେ। ଅପିଲ କୋର୍ଟ ତାଙ୍କର ବ୍ୟକ୍ତିଗତ ହାଜରକୁ କୋହଳ କରିବା ପାଇଁ ଦାଖଲ ଆବେଦନକୁ ଖାରଜ କରିଦେଇଥିଲେ ଏବଂ ତାଙ୍କ ବିରୋଧରେ ଜାମିନବିହୀନ ପରଓ୍ବାନା ଜାରି କରିଥିଲେ। ସେପ୍ଟେମ୍ବର ୧୭ରେ କୋର୍ଟ ଆଦେଶ ଦେଇଥିଲେ ଯେ ଆବେଦନକାରୀଙ୍କୁ ଗିରଫ କରାଯାଉ, ଯାହାଫଳରେ ତାଙ୍କୁ ଜେଲ ପଠାଯାଇଥିଲା।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
