ଥୁଆମୂଳ ରାମପୁରରେ ୧୭ ଦିନ ହେଲା ପାନୀୟ ଜଳ ସଙ୍କଟ: ‘ପାଣ୍ଠି ଅଭାବ’ ସଫେଇକୁ ନେଇ ଅସନ୍ତୋଷ

ଥୁଆମୂଳ ରାମପୁର, ୧୨।୧୦ (ଦୁର୍ଗା କୀର୍ତ୍ତି):କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ସଦର ମହକୁମାରେ ପାନୀୟ ଜଳ ସଙ୍କଟ ଗୁରୁତର ରୂପ ନେଇଛି। ‘ବସୁଧା’ ଯୋଜନାରେ ଜଳ ଯୋଗାଣ ଦୀର୍ଘ ୧୭ ଦିନ ଧରି ବନ୍ଦ ରହିଥିବାରୁ ପାଣି ଟୋପାଏ ପାଇଁ ଲୋକେ ହଇରାଣ ହେଉଛନ୍ତି। ଗଣମାଧ୍ୟମରେ ଲଗାତାର ଖବର ପ୍ରକାଶ ପାଇବା ପରେ ଗ୍ରାମ ପଞ୍ଚାୟତ ପ୍ରଶାସନ ବିଦ୍ୟୁତ ବିଭାଗକୁ ଚିଠି ଲେଖିଥିବା ଜଣାପଡ଼ିଛି। ତେବେ ବକେୟା ବିିଦ୍ୟୁତ ବିଲ ପୈଠ ନକରିବା ପଛରେ ସରକାରୀ ପାଣ୍ଠି ଅଭାବକୁ କାରଣ ଦର୍ଶାଯାଇଥିବାରୁ ସ୍ଥାନୀୟ ବୁଦ୍ଧିଜୀବୀ ଓ ସଚେତନ ନାଗରିକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।

ସୂଚନା ଅନୁଯାୟୀ, ଥୁଆମୂଳ ରାମପୁର ଗ୍ରାମ ପଞ୍ଚାୟତର ସରପଞ୍ଚ ବିଜୟା ମାଝୀ ଓ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ) ମୁକେଶ କୁମାର ପଟେଲ ବିିଦ୍ୟୁତ ବିଭାଗକୁ ଚିଠି ସଂଖ୍ୟା ୧୨୧/୨୦୨୬ ମାଧ୍ୟମରେ ଅନୁରୋଧ କରିଛନ୍ତି। ଏକ ମାସ ମଧ୍ୟରେ ବକେୟା ବିିଦ୍ୟୁତ ବିଲ ପୈଠ କରାଯିବ ବୋଲି ଲିଖିତ ପ୍ରତିଶ୍ରୁତି ଦେଇ ଜଳ ଯୋଗାଣ ପାଇଁ ବିଦ୍ୟୁତ ସଂଯୋଗ ପୁନଃସ୍ଥାପନ କରିବାକୁ ଚିଠିରେ ନିବେଦନ କରାଯାଇଛି। ଚିଠିରେ ଦର୍ଶାଯାଇଛି ଯେ, ଚଳିତ ଆର୍ଥିକ ବର୍ଷ ପାଇଁ ସରକାରୀ ପାଣ୍ଠି ଆସିନଥିବାରୁ ୧,୦୧,୭୮୨ ଟଙ୍କାର ବକେୟା ବିିଦ୍ୟୁତ ବିଲ ପୈଠ କରାଯାଇପାରିନାହିଁ। ଏହି ସଫେଇକୁ ନେଇ ସ୍ଥାନୀୟ ଅଞ୍ଚଳରେ ପ୍ରଶ୍ନ ଉଠିଛି।

ସଚେତନ ନାଗରିକଙ୍କ ଅଭିଯୋଗ ଅନୁଯାୟୀ, ଗ୍ରାମ ପଞ୍ଚାୟତଗୁଡ଼ିକୁ ବିଭିନ୍ନ ଯୋଜନା ଓ ଉନ୍ନୟନମୂଳକ କାର୍ଯ୍ୟ ପାଇଁ ସରକାରୀ ଅନୁଦାନ ମିଳୁଛି। ଏଭଳି ସ୍ଥିତିରେ ସାଧାରଣ ଲୋକଙ୍କ ପାଇଁ ଅତ୍ୟାବଶ୍ୟକ ପାନୀୟ ଜଳ ଯୋଗାଣ ବ୍ୟବସ୍ଥାର ବିିଦ୍ୟୁତ ବିଲ ପୈଠ ନହେବା ପଞ୍ଚାୟତର ଆର୍ଥିକ ପରିଚାଳନା ଓ ଦାୟିତ୍ୱବୋଧ ଉପରେ ପ୍ରଶ୍ନ ଉଠାଇଛି।

ସ୍ଥାନୀୟ ବୁଦ୍ଧିଜୀବୀ ଓ ସମାଜସେବୀମାନେ ଅଭିଯୋଗ କରିଛନ୍ତି ଯେ, ପଞ୍ଚାୟତର ବିଭିନ୍ନ ଉନ୍ନୟନମୂଳକ କାର୍ଯ୍ୟରେ ଅନିୟମିତତା ହେଉଥିବା ନେଇ ପୂର୍ବରୁ ମଧ୍ୟ ପ୍ରଶ୍ନ ଉଠିଛି। ମନରେଗା ଯୋଜନା ସମେତ ଅନ୍ୟାନ୍ୟ କାର୍ଯ୍ୟରେ ଅନିୟମିତତା ଅଭିଯୋଗ ଥିବାବେଳେ ପାନୀୟ ଜଳ ଭଳି ମୌଳିକ ସେବା ପାଇଁ ପାଣ୍ଠି ନଥିବା କହିବା ଗ୍ରହଣୀୟ ନୁହେଁ ବୋଲି ସେମାନେ ମତ ଦେଇଛନ୍ତି। ତେବେ ଏହି ଅଭିଯୋଗଗୁଡ଼ିକର ସ୍ବତନ୍ତ୍ର ଯାଞ୍ଚ ସମ୍ପର୍କରେ କୌଣସି ତଥ୍ୟ ଦିଆଯାଇନାହିଁ।

ପାନୀୟ ଜଳ ଭଳି ମୌଳିକ ସେବା ଦୀର୍ଘ ୧୭ ଦିନ ଧରି ବନ୍ଦ ରହିବାକୁ ନେଇ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି। କେବଳ ଚିଠି ଲେଖି ପ୍ରଶାସନିକ ଦାୟିତ୍ୱ ଶେଷ କରିଦେବା ବଦଳରେ ତୁରନ୍ତ ବକେୟା ବିଲ ପୈଠ କରି ଜଳ ଯୋଗାଣ ସ୍ବାଭାବିକ କରିବାକୁ ସେମାନେ ଦାବି କରିଛନ୍ତି। ଏବେ ସମସ୍ତଙ୍କ ନଜର ବିଦ୍ୟୁତ ବିଭାଗ ଓ ପଞ୍ଚାୟତ ପ୍ରଶାସନର ପରବର୍ତ୍ତୀ ପଦକ୍ଷେପ ଉପରେ ରହିଛି। ଗ୍ରାମବାସୀଙ୍କୁ କେବେ ପୁଣି ନିୟମିତ ପାନୀୟ ଜଳ ମିଳିବ, ତାହାକୁ ନେଇ ଅପେକ୍ଷା ଜାରି ରହିଛି।