ପେଟ୍ରୋଲ ପମ୍ପରେ ନୂଆ ନିୟମ! ଦିନକୁ ମିଳିବ ମାତ୍ର ଏତିକି ଲିଟର, ଧାର୍ଯ୍ୟ ହେଲା ଲିମିଟ୍‌

ନୂଆଦିଲ୍ଲୀ,୨୪।୯: ଯଦି ଆପଣଙ୍କ ପାଖରେ ବଡ଼ ଗାଡ଼ି କିମ୍ବା ଡିଜେଲରେ ଚାଲୁଥିବା କମର୍ସିଆଲ ଯାନ ରହିଛି ଏବଂ ନିୟମିତ ଭାବେ ବହୁ ପରିମାଣରେ ଡିଜେଲ ଭରାଇବାକୁ ପଡ଼ୁଛି, ତେବେ ଏହି ଖବର ଆପଣଙ୍କ ପାଇଁ ଜରୁରୀ। ଘରୋଇ ଇନ୍ଧନ ବିକ୍ରେତା କମ୍ପାନୀଗୁଡ଼ିକ ଡିଜେଲ ବିକ୍ରିକୁ ନେଇ ନୂଆ ସୀମା ଲାଗୁ କରିଛନ୍ତି।

ମଧ୍ୟପ୍ରାଚ୍ୟରେ ଜାରି ସଙ୍କଟ ଏବଂ ଏହାର ପ୍ରଭାବରେ ଯୋଗାଣ କମିବା କାରଣରୁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବଢ଼ିଛି। ଏହା ପରେ ଘରୋଇ ଫ୍ୟୁଏଲ ରିଟେଲରମାନେ ନିଜ ଆଉଟଲେଟରେ ଡିଜେଲ ବିକ୍ରିକୁ ସୀମିତ କରିବାକୁ ପଦକ୍ଷେପ ନେଇଛନ୍ତି।

Jio-BP ଏହାର ଅନେକ ଆଉଟଲେଟରେ ପ୍ରତି ଗ୍ରାହକଙ୍କ ପାଇଁ ଡିଜେଲ କିଣିବାର ସୀମା ୫୦ ଲିଟର କରିଛି। ଏଥିସହ ପ୍ରତ୍ୟେକ ଆଉଟଲେଟର ଦୈନିକ ଡିଜେଲ ବିକ୍ରିକୁ ୬,୦୦୦ ଲିଟରରେ ସୀମିତ କରାଯାଇଛି।

ପୂର୍ବରୁ ଏହି ପମ୍ପଗୁଡ଼ିକରେ ଦୈନିକ ହାରାହାରି ପ୍ରାୟ ୧୧,୦୦୦ ଲିଟର ଡିଜେଲ ବିକ୍ରି ହେଉଥିଲା। ଏବେ ଏହାର କୋଟାକୁ ପ୍ରାୟ ଅଧା କରାଯାଇଛି। ସେହିପରି Nayara Energy ମଧ୍ୟ ଏହାର ପମ୍ପଗୁଡ଼ିକରେ ଡିଜେଲ ବିକ୍ରି ପାଇଁ ୭୦ରୁ ୨୦୦ ଲିଟର ମଧ୍ୟରେ ସୀମା ରଖିଛି।

ଅନ୍ୟପଟେ Indian Oil (IOCL), HPCL ଏବଂ BPCL ଭଳି ସରକାରୀ ତେଲ ବିପଣନ କମ୍ପାନୀଗୁଡ଼ିକ ସ୍ପଷ୍ଟ କରିଛନ୍ତି ଯେ, ସେମାନଙ୍କ ପେଟ୍ରୋଲ ପମ୍ପରେ ଡିଜେଲ ବିକ୍ରି ଉପରେ ଏଭଳି କୌଣସି ସୀମା ଲାଗୁ ହୋଇନାହିଁ।

ଦେଶରେ ଥିବା ୧ ଲକ୍ଷରୁ ଅଧିକ ଫ୍ୟୁଏଲ ଷ୍ଟେଶନ ମଧ୍ୟରୁ ପ୍ରାୟ ୯୦ ପ୍ରତିଶତ ପମ୍ପର ପରିଚାଳନା ସରକାରୀ କ୍ଷେତ୍ରର ତିନିଟି ତେଲ କମ୍ପାନୀ କରୁଛନ୍ତି। ତେଣୁ ସାଧାରଣ ଗ୍ରାହକଙ୍କ ଉପରେ ଏହି ସୀମାର ପ୍ରଭାବ ଅପେକ୍ଷାକୃତ କମ ରହିପାରେ।

ତେବେ ଦୂରଦୂରାନ୍ତ ଅଞ୍ଚଳରେ ଚାଲୁଥିବା ଦୀର୍ଘଦୂରର କମର୍ସିଆଲ ଯାନ, ବିଶେଷକରି ଟ୍ରକଗୁଡ଼ିକ ପାଇଁ ଏହା ସମସ୍ୟା ସୃଷ୍ଟି କରିପାରେ। ଅନେକ ହାଇୱେ ଏବଂ ଗ୍ରାମାଞ୍ଚଳରେ ସରକାରୀ କମ୍ପାନୀ ତୁଳନାରେ Jio-BP ଓ Nayara Energy ଭଳି ଘରୋଇ ଅପରେଟରଙ୍କ ପେଟ୍ରୋଲ ପମ୍ପ ଅଧିକ ଦେଖିବାକୁ ମିଳେ। ଏଭଳି ସ୍ଥିତିରେ ଘରୋଇ ପେଟ୍ରୋଲ ପମ୍ପଗୁଡ଼ିକରେ ଡିଜେଲ ରାସନିଂ ଜାରି ରହିଲେ, ଦୀର୍ଘଦୂର ଯାତାୟାତ କରୁଥିବା ଟ୍ରକ ଓ ଅନ୍ୟ କମର୍ସିଆଲ ଯାନଗୁଡ଼ିକୁ ବିକଳ୍ପ ପମ୍ପ ଖୋଜିବାକୁ ପଡ଼ିପାରେ।