ବଡ଼ ଖବର: ଗାଁରେ ବି ଚାଲିବ ଅଟୋ-ବାଇକ୍‌ର କ୍ୟାବ୍‌, ଜାଣନ୍ତୁ କେମିତି କରିବେ ବୁକ୍‌…

ନୂଆଦିଲ୍‌ଲୀ,୧୮।୯: ଭାରତ ଟ୍ୟାକ୍ସି (Bharat Taxi) ର ଅନେକ ସହରରେ ପାଇଲଟ ପ୍ରୋଜେକ୍ଟ ଚାଲୁ ରହିଛି। ବର୍ତ୍ତମାନ ଏହି ଭାରତ ଟ୍ୟାକ୍ସି ସେବା ଦିଲ୍ଲୀ-ଏନସିଆର (Delhi-NCR), ଗୁଜରାଟ, ମୁମ୍ୱାଇ ଏବଂ ଉତ୍ତର ପ୍ରଦେଶର ଲକ୍ଷ୍ନୌ ଓ କାନପୁର ଭଳି ପ୍ରମୁଖ ସହରରେ କାର୍ଯ୍ୟକାରୀ ହେଉଛି। ଅନ୍ୟପକ୍ଷରେ, ଭାରତ ଟ୍ୟାକ୍ସି ମଡେଲକୁ ୟୁପିର ବିଭିନ୍ନ ଜିଲ୍ଲାରେ ବ୍ୟାପକ ଭାବେ ଆରମ୍ଭ କରିବା ପାଇଁ ଯୋଜନା କରାଯାଉଛି। ଏହାର ବିଶେଷତ୍ୱ ହେଉଛି, ଯାତ୍ରୀମାନଙ୍କ ଠାରୁ କୌଣସି ପ୍ରକାରର କମିଶନ ନିଆଯିବ ନାହିଁ ଏବଂ ଅଧିକ ଚାହିଦା ଥିଲେ ମଧ୍ୟ ଭଡ଼ା ନ ବଢ଼ିବାର ବିକଳ୍ପ ଉପଲବ୍ଧ ହେବ।

ଭାରତ ଟ୍ୟାକ୍ସିକୁ କେବଳ ବଡ଼ ସହର ମଧ୍ୟରେ ସୀମିତ ନ ରଖି ଗାଁ ଗାଁରେ ପହଞ୍ଚାଇବା ପାଇଁ ପ୍ରସ୍ତୁତି ଚାଲିଛି। ଏଥିପାଇଁ ପ୍ରାଥମିକ କୃଷି ଋଣ ସମିତି (PACS) ର ନେଟୱାର୍କକୁ ବ୍ୟବହାର କରାଯିବ। ଫଳରେ ଗ୍ରାମାଞ୍ଚଳ ଲୋକଙ୍କୁ ଡାକ୍ତରଖାନା, ବଜାର, ରେଳ ଷ୍ଟେସନ, ବସ ଷ୍ଟାଣ୍ଡ ଏବଂ ଜିଲ୍ଲା ମୁଖ୍ୟାଳୟକୁ ଯିବାଆସିବା କରିବା ପାଇଁ ଏହା ଏକ ଉତ୍ତମ ବିକଳ୍ପ ଭାବେ ଉପଲବ୍ଧ ହେବ।

ଭାରତ ଟ୍ୟାକ୍ସି ମଡେଲକୁ ଉତ୍ତର ପ୍ରଦେଶର ସମସ୍ତ ୭୫ଟି ଜିଲ୍ଲାରେ ପହଞ୍ଚାଇବା ପାଇଁ ପ୍ରସ୍ତୁତି କରାଯାଉଛି। ଏହି ସମବାୟ ଟ୍ୟାକ୍ସି ମଡେଲକୁ ସମସ୍ତ ଜିଲ୍ଲାରେ କାର୍ଯ୍ୟକାରୀ କରିବାର ଯୋଜନା ରହିଛି। ଏହାକୁ କେବଳ ଜିଲ୍ଲା ପର୍ଯ୍ୟନ୍ତ ସୀମିତ ନ ରଖି, ପ୍ରତ୍ୟେକ ଗ୍ରାମ ପର୍ଯ୍ୟନ୍ତ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି। ‘ଜିରୋ କମିଶନ ମଡେଲ’ ଅଧୀନରେ ପ୍ରତ୍ୟେକ ଯାତ୍ରା ପାଇଁ ପ୍ଲାଟଫର୍ମ କମିଶନ ବାବଦକୁ ଚାଳକଙ୍କ ରୋଜଗାରରୁ କାଟିବା ପରିବର୍ତ୍ତେ, ସମବାୟ ବ୍ୟବସ୍ଥା ମାଧ୍ୟମରେ ସେମାନଙ୍କୁ ସିଧାସଳଖ ବ୍ୟବସାୟ ସହିତ ଯୋଡ଼ିବା ପାଇଁ ଉଦ୍ୟମ କରାଯିବ।

ଭାରତ ଟ୍ୟାକ୍ସିର ଏକ ମୁଖ୍ୟ ବିଶେଷତା ହେଉଛି ଯେ, ଅନ୍ୟ ଟ୍ୟାକ୍ସି ସେବା ପରି ଚାହିଦା ବଢ଼ିଲେ ବା ପିକ ସମୟରେ ଏହାର ଭଡ଼ାରେ ହଠାତ ବୃଦ୍ଧି (Surge pricing) ହେବ ନାହିଁ। ଏହାଦ୍ୱାରା ଦୈନନ୍ଦିନ ଯାତାୟାତ କରୁଥିବା ଲୋକମାନଙ୍କୁ ଭଡ଼ାର ଅଚାନକ ବୃଦ୍ଧିରୁ ଆଶ୍ୱସ୍ତି ମିଳିବ ବୋଲି ଆଶା କରାଯାଉଛି।