ବାଘଛାଲ କାରବାର ଘଟଣାର ୪ ଅଭିଯୁକ୍ତ ଗିରଫ, କେତେଦୂର ଲମ୍ବିଛି ଚେର, ଜାରି ରହିଛି ଖୋଳତାଡ଼
ମୋହନା,୧୧ା୧୦(ମନ୍ମଥ ମିଶ୍ର): କଲରାପତରିଆ ବାଘଛାଲ କାରବାର ଘଟଣାରେ ବନ ବିଭାଗ ୪ ଅଭିଯୁକ୍ତଙ୍କୁ ଗିରଫ କରି ରବିବାର କୋର୍ଟ ଚାଲାଣ କରିଛି। ଗଜପତି ଜିଲା ମୋହନା ବନାଞ୍ଚଳ ପାଣିଗଣ୍ଡା ବିଟ୍ ତୁଳସୀ ନଗରରୁ ବେଆଇନ ଭାବେ ବାଘଛାଲ କାରବାର ସମୟରେ ବନ ବିଭାଗ ଚଢ଼ାଉ କରି ବାଘଛାଲ ଜବତ କରି ଏହି ଘଟଣାରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ଗିରଫ କରିଥିଲା। ଗିରଫ ଅଭିଯୁକ୍ତମାନେ ହେଲେ ପାଣିଗଣ୍ଡା ଗାଁର ତ୍ରିଲୋଚନ ପାତ୍ର (୩୫ ) ଓ କନ୍ଧମାଳ ଜିଲା ଦାସିଙ୍ଗବାଡ଼ି ଗାଁର ବିଜୟାନନ୍ଦ ନାୟକ (୨୩), ଜଗା ମଲ୍ଲିକ (୩୬) ଦୀପକ ନାୟକ (୨୫)। ଗିରଫ ଅଭିଯୁକ୍ତଙ୍କଠାରୁ ବାଘଛାଲ ସହ ଦୁଇଟି ମୋଟରସାଇକେଲ, ତିନୋଟି ମୋବାଇଲ ଜବତ କରିଛି ବନ ବିଭାଗ। ସେପଟେ ପାରଳାଖେମୁଣ୍ଡି ବନଖଣ୍ଡ ଅଧୀନରେ ଗୋଟିଏ ବାଘଛାଲ ଜବତ ଘଟଣାରେ ଗତକାଲି ୨ଜଣଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଆଜି ମୋହନା ବନାଞ୍ଚଳ ପକ୍ଷରୁ ୪ଜଣଙ୍କୁ କୋର୍ଟ ଚାଲାଣ କରାଯାଇଛି। ତେବେ ଏହି ବାଘଛାଲ କୋଉଠୁ ଆସିଲା ଏବଂ କେବେଠାରୁ ଏହି ରାକେଟ୍ କାମ କରୁଛି ବନ ବିଭାଗର ଅଧିକା ତଦନ୍ତ ପରେ ଜଣାପଡ଼ିବ।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
