ବୈଭବ ସୂର୍ଯ୍ୟବଂଶୀ ନୁହେଁ, ଏହି ଭାରତୀୟ ଷ୍ଟାରଙ୍କୁ ୱାଲର୍‌ଡ ସୁପରପାୱାର ଓପନର କହିଲେ ଦିନେଶ କାର୍ତ୍ତିକ

ଇନ୍ଦୋର,୧୨।୧୦: ଭାରତୀୟ ଦଳର ଷ୍ଟାର ଓପନର ଅଭିଷେକ ଶର୍ମାଙ୍କ ଜବରଦସ୍ତ ବ୍ୟାଟିଂକୁ ନେଇ ପ୍ରଶଂସାରେ ଶତମୁଖ ହୋଇଛନ୍ତି ପୂର୍ବତନ ଭାରତୀୟ କ୍ରିକେଟର ଦିନେଶ କାର୍ତ୍ତିକ। ବିଭିନ୍ନ ପରିସ୍ଥିତି ଏବଂ ଭିନ୍ନ ଧରଣର ବୋଲିଂ ବିପକ୍ଷରେ ଲଗାତାର ରନ କରିବାର କ୍ଷମତା ଅଭିଷେକଙ୍କୁ ଜଣେ ଭୟଙ୍କର ଓପନର ଭାବେ ପରିଚିତ କରାଇଛି ବୋଲି ସେ କହିଛନ୍ତି।

ରବିବାର ଇନ୍ଦୋରର ହୋଲକର ଷ୍ଟାଡିୟମରେ ୱେଷ୍ଟଇଣ୍ଡିଜ ବିପକ୍ଷ ତୃତୀୟ ଟି-୨୦ ଅନ୍ତର୍ଜାତୀୟ ମ୍ୟାଚରେ ଅଭିଷେକ ମାତ୍ର ୩୦ଟି ବଲରେ ୬୯ ରନର ଧମାକାଦାର ଇନିଂସ ଖେଳିଥିଲେ। ତାଙ୍କ ଏହି ଆକ୍ରମଣାତ୍ମକ ବ୍ୟାଟିଂ ବଳରେ ଭାରତ ୨୨୩ ରନର ବିଶାଳ ସ୍କୋର କରିଥିଲା। ଏହି ଇନିଂସ ସମୟରେ ସେ ଟି-୨୦ ଅନ୍ତର୍ଜାତୀୟରେ ୨୦୦୦ ରନ ମଧ୍ୟ ପୂରଣ କରିଥିଲେ।

ଦିନେଶ କାର୍ତ୍ତିକଙ୍କ ମତରେ, ଅଭିଷେକଙ୍କ ସବୁଠାରୁ ବଡ଼ ଶକ୍ତି ହେଉଛି ପାୱାରପ୍ଲେରେ ଆକ୍ରମଣାତ୍ମକ ବ୍ୟାଟିଂ କରି ପ୍ରତିପକ୍ଷ ଉପରେ ଚାପ ସୃଷ୍ଟି କରିବା। ଆରମ୍ଭରୁ ବାଉଣ୍ଡାରୀ ମାରିବା ସହ ମ୍ୟାଚର ଗତିପଥ ବଦଳାଇବାରେ ସେ ସଫଳ ହେଉଛନ୍ତି। ଏହି ଦକ୍ଷତା ତାଙ୍କୁ ବିଶ୍ୱ କ୍ରିକେଟରେ ଅନ୍ୟତମ ବିପଜ୍ଜନକ ଓପନର ଭାବେ ଗଢ଼ି ତୋଳିଛି।

କାର୍ତ୍ତିକ କହିଛନ୍ତି ଯେ, ଅଭିଷେକଙ୍କୁ ଦିଗ୍ଗଜ କ୍ରିକେଟର ଯୁବରାଜ ସିଂହଙ୍କ ମାର୍ଗଦର୍ଶନ ମିଳୁଛି। ଯୁବରାଜ ନିଜ କ୍ୟାରିୟରରେ ବଲରେ ଜୋରଦାର ହିଟ କରିବା ଏବଂ ନିଜ ଦକ୍ଷତାର ସଠିକ ଉପଯୋଗ କରିବାର ଉଦାହରଣ ସୃଷ୍ଟି କରିଛନ୍ତି। ତାଙ୍କଠାରୁ ଅଭିଷେକ ଶିଖୁଥିବା କଥା ତାଙ୍କ ବ୍ୟାଟିଂରେ ସ୍ପଷ୍ଟ ଦେଖିବାକୁ ମିଳୁଛି।

କାର୍ତ୍ତିକଙ୍କ ଅନୁସାରେ, ଅଭିଷେକ କେବଳ ଛୋଟ ଦଳ ବିପକ୍ଷରେ ନୁହେଁ, ବରଂ ବଡ଼ ଦଳ ଏବଂ ଗୁରୁତ୍ୱପୂର୍ଣ୍ଣ ମ୍ୟାଚଗୁଡ଼ିକରେ ମଧ୍ୟ ରନ କରିବାରେ ସଫଳ ହେଉଛନ୍ତି। ଟି-୨୦ କ୍ରିକେଟ୍ରେ ଆକ୍ରମଣାତ୍ମକ ଶୈଳୀ ବଜାୟ ରଖିବା ସହ ପ୍ରତି ଦୁଇ-ତିନିଟି ମ୍ୟାଚ୍ରେ ବଡ଼ ସ୍କୋର କରିବା ଏକ କଠିନ କାମ। ଅଭିଷେକ ଏହା କରି ଦେଖାଉଛନ୍ତି ବୋଲି ସେ ମତ ଦେଇଛନ୍ତି।

ସେ ଆହୁରି କହିଛନ୍ତି, ଅଭିଷେକଙ୍କ ଭଳି ବ୍ୟାଟର୍ଙ୍କୁ ଶୀଘ୍ର ଆଉଟ କରିବା ପ୍ରତିପକ୍ଷ ଦଳ ପାଇଁ ଅତ୍ୟନ୍ତ ଜରୁରୀ। ଯଦି ସେ କ୍ରିଜରେ ଅଧିକ ସମୟ ରହିଯାଆନ୍ତି, ତେବେ ବଡ଼ ସ୍କୋର କରି ମ୍ୟାଚକୁ ପ୍ରତିପକ୍ଷଠାରୁ ଦୂରେଇ ନେଇପାରନ୍ତି।