ମହାବୀର ପର୍ବତ ଛାଡି ଉଦାରମା ଜଙ୍ଗଲ ଗଲେ ୨୬ ଟିକିଆ ହାତୀପଲ

ବଡ଼ଗାଁ,୧୧ା୯(ଅଶୋକ ଷଡ଼ଙ୍ଗୀ): ସୁନ୍ଦରଗଡ଼ ଜିଲା ବଡ଼ଗାଁ ଫରେଷ୍ଟ ରେଞ୍ଜ ଅଧୀନ ମହାବୀର ପର୍ବତରେ ମାସେ ହେଲା ଅବସ୍ଥାନ କରିଥିବା ୨୬ ଟିକିଆ ହାତୀପଲ ମହାବୀର ପର୍ବତରୁ ବାହାରି ଉଦାରମା ଜଙ୍ଗଲକୁ ଯାଇଛନ୍ତି। ହାତୀପଲ ତୁଡାଲଗା ନିକଟରେ ରାଜ୍ୟ ରାଜପଥ ଅତିକ୍ରମ କରି ଉଦାରମା ଜଙ୍ଗଲକୁ ଯାଇଥିବା ବନ ବିଭାଗ ପକ୍ଷରୁ ସୂଚନା ମିଳିଛି।

ଗତ ମାସ ୭ ତାରିଖରେ ମହାବୀର ପର୍ବତରେ ୧୧ଟି ମାଈ ହାତୀ, ୧୨ଟି ଦନ୍ତା ଓ ୨ଟି ଶାବକ ହାତୀକୁ ମିଶାଇ ମୋଟ ୨୫ଟି ହାତୀ ରହିଥିଲେ। ପରବର୍ତ୍ତୀ ସମୟରେ ହାତୀପଲରେ ଆଉ ଏକ ଛୁଆ ହାତୀ ଜନ୍ମ ନେବାରୁ ହାତୀଙ୍କ ସଂଖ୍ୟା ୨୬କୁ ବୃଦ୍ଧି ପାଇଥିଲା। ତେବେ ହାତୀପଲ ଅଞ୍ଚଳ ଛାଡ଼ିବା ସମୟରେ ଗୋଟିଏ ଦନ୍ତା ହାତୀର ଆଗ ଡାହାଣ ଗୋଡ଼ରେ ଆଘାତ ଲାଗିଥିବା ଏବଂ ସେଥିରୁ ରକ୍ତ ପଡ଼ୁଥିବା କେତେଜଣ ସ୍ଥାନୀୟ ଲୋକ ଦେଖିଥିବା କହିଛନ୍ତି। ରାଜପଥ ଅତିକ୍ରମ କରୁଥିବା ସମୟରେ ଏହି ଦୃଶ୍ୟ ଦେଖିଥିବା ସେମାନେ କହିଛନ୍ତି। ତେବେ ଦନ୍ତା ହାତୀର ଆଘାତ ସମ୍ପର୍କରେ ବନ ବିଭାଗ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ।

ମହାବୀର ପାହାଡ଼ରେ ଥିବା ହାତୀପଲ ଦିନରେ ଜଙ୍ଗଲ ଭିତରେ ରହୁଥିବା ବେଳେ ରାତିରେ ଗାଁ ମୁହାଁ ହେଉଥିଲେ। ଏଥିଯୋଗୁ ଧାନ ଫସଲ କ୍ଷତିଗ୍ରସ୍ତ ହେବା ସହ ଚାଷୀଙ୍କ ମଧ୍ୟରେ ଚିନ୍ତା ବଢ଼ିଥିଲା। ହାତୀ-ମଣିଷ ମୁହାଁମୁହିଁ ହେବାର ଆଶଙ୍କାକୁ ନେଇ ମଧ୍ୟ ସ୍ଥାନୀୟ ଲୋକେ ଭୟଭୀତ ଥିଲେ। ଏହି ହାତୀ ପଲ ରାତିରେ ଘର ଭାଙ୍ଗି ଖାଦ୍ୟ ଶସ୍ୟ ଖାଇଯାଉଥିଲେ। ବର୍ତ୍ତମାନ ହାତୀପଲ ଉଦାରମା ଜଙ୍ଗଲ ଅଞ୍ଚଳକୁ ଚାଲିଯାଇଥିବାରୁ ବନ ବିଭାଗ ପକ୍ଷରୁ ସେମାନଙ୍କ ଗତିବିଧି ଉପରେ ନଜର ରଖାଯାଉଛି। ଡ୍ରୋନ କ୍ୟାମେରା ସହାୟତାରେ ମଧ୍ୟ ହାତୀପଲଙ୍କ ଗତିବିଧି ଅନୁଧ୍ୟାନ କରାଯାଉଛି। ଜଙ୍ଗଲ ତଥା ଏହାର ନିକଟବର୍ତ୍ତୀ ଅଞ୍ଚଳକୁ ଯିବା ସମୟରେ ସତର୍କ ରହିବା ସହ ହାତୀପଲ ଦେଖିଲେ ନିକଟକୁ ନ ଯାଇ ସୁରକ୍ଷିତ ଦୂରତା ବଜାୟ ରଖିବାକୁ ବନ ବିଭାଗ ପକ୍ଷରୁ ଲୋକଙ୍କୁ ପରାମର୍ଶ ଦିଆଯାଇଛି।

ବଡ଼ଗାଁ ଫରେଷ୍ଟର ମିତ୍ରଭାନୁ ପଟେଲଙ୍କୁ ପଚାରିବାରେ, ବଣୁଆ ହାତୀ ପଲ ଦୀର୍ଘ ଦିନ ପରେ ମହାବୀର ପର୍ବତରୁ ବାହାରି ଯାଇଥିବା କହିଛନ୍ତି। ଗୋଟିଏ ଦନ୍ତାହାତୀ ଆହତ ଥିବା ବିଷୟରେ ପଚାରିବାରୁ ସେ ନିଜ ନିଜ ଭିତରେ ଠେଲାପେଲାରେ ଏକ ହାତୀ ଆହତ ହୋଇଥିବା ଆମେ ସନ୍ଦେହ କୁରୁଛୁ ବୋଲି କହିଛନ୍ତି।