ଶେଷ ବିଦାୟ ନେଲେ କାହ୍ନୁଚରଣ, ଶୋକରେ ପାଟଣା

ପାଟଣା,୨୩ା୧୦(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ନିର୍ବାଚନମଣ୍ଡଳୀର ପୂର୍ବତନ ବିଧାୟକ କାହ୍ନୁଚରଣ ନାଏକଙ୍କ ବିୟୋଗରେ ସମଗ୍ର ଜିଲା ତଥା ପାଟଣା ଅଞ୍ଚଳ ଶୋକାକୁଳ ହୋଇପଡ଼ିଛି। ଗୁରୁବାର ରାତିରେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟରେ ୭୯ ବର୍ଷ ବୟସରେ ତାଙ୍କର ପରଲୋକ ଘଟିଥିଲା।

ଶୁକ୍ରବାର କେନ୍ଦୁଝରରୁ ତାଙ୍କ ମରଶରୀର ପୈତୃକ ଗ୍ରାମ ଭଗପଶିକୁ ନିଆଯିବା ବେଳେ ବିଭିନ୍ନ ଛକରେ ହଜାର ହଜାର ସମର୍ଥକ ଓ ଶୁଭେଚ୍ଛୁ ଶେଷ ଦର୍ଶନ କରି ଶ୍ରଦ୍ଧାଞ୍ଜଳି ଜଣାଇଥିଲେ। ‘କାହ୍ନୁ ନାଏକ ଅମର ରହେ’ ଧ୍ୱନିରେ ପରିବେଶ ପ୍ରକମ୍ପିତ ହୋଇଥିଲା।
ପାଟଣା ବ୍ଲକ କଣ୍ଟିଆପଡ଼ା ପଞ୍ଚାୟତ ଅନ୍ତର୍ଗତ ଭଗପଶି ଗ୍ରାମରେ ମରଶରୀର ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ‘ରାମ ନାମ ସତ୍ୟ ହେ’ ଓ ‘କାହ୍ନୁ ନାଏକ ଅମର ରହେ’ ଧ୍ୱନି ସହ ସଂକୀର୍ତ୍ତନର ତାଳେ ତାଳେ ଏକ ବିରାଟ ଶୋଭାଯାତ୍ରାରେ ମରଶରୀରକୁ ଗାଁମୁଣ୍ଡ ପଡ଼ିଆକୁ ନିଆଯାଇଥିଲା। ସେଠାରେ ଅନ୍ତ୍ୟେଷ୍ଟିକ୍ରିୟା ସମ୍ପନ୍ନ ହୋଇଥିବା ବେଳେ ବଡ଼ପୁଅ ଲୋକନାଥ ନାଏକ ମୁଖାଗ୍ନି ଦେଇଥିଲେ।

ଅନ୍ତିମ ଶଯ୍ୟା ନିକଟରେ ସ୍ତ୍ରୀ ତଥା ପୂର୍ବତନ ପାଟଣା ବ୍ଲକ ଅଧ୍ୟକ୍ଷା ଲକ୍ଷ୍ମୀପ୍ରିୟା ନାଏକ, ମଝିଆ ପୁଅ ତଥା ବିଜେଡି ନେତା ସତ୍ୟବ୍ରତ ନାଏକ, ସାନପୁଅ ତଥା ପାଟଣା ପୂର୍ବତନ ବିଧାୟକ ଜଗନ୍ନାଥ ନାଏକ, ତିନି ବୋହୂ, ନାତିନାତୁଣୀ, ଝିଅ ଝରଣା, ଜ୍ୱାଇଁ ଓ ପୁତୁରା ଜ୍ୟୋତିରଞ୍ଜନ ସିଂଙ୍କ ସମେତ ପରିବାରବର୍ଗ ଉପସ୍ଥିତ ଥିଲେ।

କେନ୍ଦୁଝର ସାଂସଦ ଅନନ୍ତ ନାଏକ, ପାଟଣା ବିଧାୟକ ଅଖିଳ ଚନ୍ଦ୍ର ନାଏକ, ପୂର୍ବତନ ମନ୍ତ୍ରୀ ତଥା ଘସିପୁରା ବିଧାୟକ ବଦ୍ରିନାରାୟଣ ପାତ୍ର, ପୂର୍ବତନ ସାଂସଦ ମାଧବ ସର୍ଦ୍ଦାର, ପୂର୍ବତନ ତେଲକୋଇ ବିଧାୟକ ପ୍ରାଣବଲ୍ଲଭ ନାଏକ, ଝୁମ୍ପୁରା ବ୍ଲକ ଅଧ୍ୟକ୍ଷା ମାଳତୀ ନାଏକ, ବିଜେଡି ଜିଲା ସଭାପତି ଆଶିଷ ଚକ୍ରବର୍ତ୍ତୀ, ପୂର୍ବତନ ଭାଜପା ଜିଲା ସଭାପତି ଅଂଶୁମାନ ସବୁଜ ମହାନ୍ତ ବର୍ମା, ପୂର୍ବତନ ପାଟଣା ବ୍ଲକ ଅଧ୍ୟକ୍ଷ ଇଂ. ବିଦ୍ୟାଧର ଦାଶ, ସୁକାନ୍ତି ନାଏକ, ବିଶ୍ୱନାଥ ନାଏକ, ଗଣ୍ଡ ସମାଜ ର ପ୍ରଫୁଲ୍ଲ ସିଂ, କିରଣବାଳା ନାଏକ, ବେଣୁଧର ନାଏକ, ସାଂସଦଙ୍କ ବ୍ଲକ ପ୍ରତିନିଧି ପ୍ରହଲ୍ଲାଦ ପଲେଇ, ବିଧାୟକଙ୍କ ବ୍ଲକ ପ୍ରତିନିଧି କମଳାକାନ୍ତ ଦାଶ, ଭାଜପା ନେତା ଭବାନୀ ନାଏକ, ପୃଥୱୀରାଜ କୁଅଁର, ବିଜେଡି ବ୍ଲକ ସଭାପତି ମାଧବାନନ୍ଦ ପୃଷ୍ଟି, ନୋଟାରି ମାଜିଷ୍ଟ୍ରେଟ ରାହାସ ବିହାରୀ ପୃଷ୍ଟି, ବିଜେଡି ଜିଲା ସାଧାରଣ ସମ୍ପାଦକ ପ୍ରଶାନ୍ତ ଭଞ୍ଜ, ଛାତ୍ର ଜିଲା ସଭାପତି ଅମରେନ୍ଦ୍ର ପ୍ରଧାନ, ଶିଳ୍ପପତି ବିବେକାନନ୍ଦ ଦାଶ, ଛାତ୍ରନେତା ବିପ୍ଳବ ପୃଷ୍ଟି ଓ କଂଗ୍ରେସ ନେତା ଲକ୍ଷ୍ମଣ ଦାଶ ପ୍ରମୁଖ ଅନ୍ତିମ ଦର୍ଶନ କରି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। କୁଡୁମି ସେନାର ରାଜ୍ୟ ଉପସଭାପତି ତଥା କାହ୍ନୁବାବୁଙ୍କ ରାଜନୈତିକ ସହଯୋଗୀ ମିତ୍ରଭାନୁ ମହାନ୍ତ ଏବଂ କଂଗ୍ରେସ ଏମ୍ପି ପ୍ରାର୍ଥୀ ବିନୋଦ ବିହାରୀ ନାଏକଙ୍କ ଜିଲା ଓ ରାଜ୍ୟର ବହୁ ବିଶିଷ୍ଟ ନେତା ମଧ୍ୟ ଶୋକ ପ୍ରକାଶ କରିଛନ୍ତି।

କାହ୍ନୁଚରଣଙ୍କ ବିୟୋଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝି ଗଭୀର ଶୋକବ୍ୟକ୍ତ କରିଛନ୍ତି। ଶୋକବାର୍ତ୍ତାରେ ସେ କହିଛନ୍ତି, ପାଟଣାର ପୂର୍ବତନ ବିଧାୟକ କାହ୍ନୁଚରଣ ନାଏକଙ୍କ ଦେହାନ୍ତ ଖବର ତାଙ୍କୁ ଅତ୍ୟନ୍ତ ଦୁଃଖିତ କରିଛି। ସେ ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇବା ସହ ଦିବଙ୍ଗତ ଆତ୍ମାର ସଦ୍‌ଗତି ପାଇଁ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରିଛନ୍ତି।

ସେହିପରି ସାଂସଦ ଅନନ୍ତ ନାଏକ କହିଛନ୍ତି, କାହ୍ନୁଚରଣଙ୍କ ବିୟୋଗ ସମସ୍ତଙ୍କ ପାଇଁ ଏକ ଅପୂରଣୀୟ କ୍ଷତି। ଏହି ଦୁଃଖଦ ସମୟରେ ଶୋକସନ୍ତପ୍ତ ପରିବାରବର୍ଗଙ୍କୁ ଧୈର୍ଯ୍ୟ ଓ ଶକ୍ତି ପ୍ରଦାନ କରିବା ସହ ଦିବଙ୍ଗତ ଆତ୍ମାର ଚିରଶାନ୍ତି କାମନା କରିଛନ୍ତି।

ପାଟଣା ବିଧାୟକ ଅଖିଳ ଚନ୍ଦ୍ର ନାଏକ ମଧ୍ୟ ଶୋକବ୍ୟକ୍ତ କରି କହିଛନ୍ତି, କାହ୍ନୁଚରଣଙ୍କ ବିୟୋଗରେ ପାଟଣା ଅଞ୍ଚଳବାସୀ ଗଭୀର ଦୁଃଖିତ ଓ ମର୍ମାହତ। ବିଜେଡି ଜିଲା ସଭାପତି ଆଶିଷ ଚକ୍ରବର୍ତ୍ତୀ ମଧ୍ୟ ଶୋକ ପ୍ରକାଶ କରିବା ସହ ଶୋକସନ୍ତପ୍ତ ପରିବାରକୁ ମହାପ୍ରଭୁ ଜଗନ୍ନାଥ ୁ ଧୈର୍ଯ୍ୟ ପ୍ରଦାନ କରନ୍ତୁ ବୋଲି କାମନା କରିଛନ୍ତି।

Dharitri – Odisha’s No.1 Odia Daily