୫ କୋଟି ଟଙ୍କାର ଖବର, ପ୍ରେମାନନ୍ଦ ମହାରାଜଙ୍କୁ ନେଇ ବଡ଼ କଥା କହିଲେ ବିରାଟ କୋହଲି, ହେଲାଣି ଚର୍ଚ୍ଚା
ନୂଆଦିଲ୍ଲୀ,୭।୧୦: ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ ଦୁଲାରୀ ଶରଣ (ଯିଏ ଦୀପକ ଲୋଦି ନାମରେ ମଧ୍ୟ ଜଣାଶୁଣା)ଙ୍କ ମୃତ୍ୟୁ ପରେ ‘କେଳିକୁଞ୍ଜ ଆଶ୍ରମ’ କ୍ରମାଗତ ଭାବେ ଆଲୋଚନାର କେନ୍ଦ୍ରବିନ୍ଦୁ ପାଲଟିଛି। ଏହି ପରିପ୍ରେକ୍ଷୀରେ, ‘ଶ୍ରୀକୃଷ୍ଣ ଜନ୍ମଭୂମି ସଂଘର୍ଷ ନ୍ୟାସ’ର ସଭାପତି ଫଳାହାରୀ ମହାରାଜ ଏହି ଆଶ୍ରମକୁ ନେଇ ଏକ ଚାଞ୍ଚଲ୍ୟକର ଦାବି କରିଛନ୍ତି। ସେ ଅଭିଯୋଗ କରିଛନ୍ତି ଯେ, ପ୍ରସିଦ୍ଧ କ୍ରିକେଟର ବିରାଟ କୋହଲି ଏବଂ ତାଙ୍କ ପତ୍ନୀ ତଥା ଅଭିନେତ୍ରୀ ଅନୁଷ୍କା ଶର୍ମାଯେଉଁମାନେ ଦୀର୍ଘ ଦିନ ଧରି ପ୍ରେମାନନ୍ଦ ମହାରାଜଙ୍କୁ ଭେଟି ଆସୁଛନ୍ତି, ସେମାନଙ୍କୁ ସେଠାକୁ ଯିବା ଏବଂ ଫଳସ୍ବରୂପ ପ୍ରେମାନନ୍ଦ ମହାରାଜଙ୍କ ଲୋକପ୍ରିୟତା ବୃଦ୍ଧି କରିବା ପାଇଁ ପାଞ୍ଚ କୋଟି ଟଙ୍କା ଦିଆଯାଇଥିଲା। ବର୍ତ୍ତମାନ ବିରାଟ କୋହଲିଙ୍କ ଟିମ ଏହି ବିଷୟରେ ଏକ ଆନୁଷ୍ଠାନିକ ବିବୃତି ଜାରି କରିଛି।
ବିରାଟ କୋହଲିଙ୍କ ମୁଖପାତ୍ର ସ୍ପଷ୍ଟ ଭାବେ କହିଛନ୍ତି, ‘ଆମେ ସ୍ପଷ୍ଟ ଭାବେ କହିବାକୁ ଚାହୁଁଛୁ ଯେ ବିରାଟ କୋହଲିଙ୍କ ବିଷୟରେ ଫଳାହାରୀ ମହାରାଜ (ଦିନେଶ ଶର୍ମା) କରିଥିବା ଦାବି ସମ୍ପୂର୍ଣ୍ଣ ମିଥ୍ୟା, ଭିତ୍ତିହୀନ ଏବଂ ତଥ୍ୟଗତ ଭାବେ ଭୁଲ ଅଟେ। ବିରାଟ କୋହଲି କେବଳ ନିଜର ଗଭୀର ବିଶ୍ୱାସ ଏବଂ ଶ୍ରଦ୍ଧା ଯୋଗୁ ପ୍ରେମାନନ୍ଦ ମହାରାଜଙ୍କୁ ଭେଟିଥାନ୍ତି। ଆମେ ଏହି ଦାବିଗୁଡ଼ିକୁ ଦୃଢ଼ ଭାବେ ଖଣ୍ଡନ କରୁଛୁ ଏବଂ ଗଣମାଧ୍ୟମକୁ ଅନୁରୋଧ କରୁଛୁ ଯେ ଏଭଳି ଖବର ପ୍ରକାଶ କିମ୍ବା ପ୍ରଚାର କରିବା ପୂର୍ବରୁ ସର୍ବାଧିକ ସତର୍କତା ଅବଲମ୍ବନ କରନ୍ତୁ, ତଥ୍ୟ ଯାଞ୍ଚ କରନ୍ତୁ ଏବଂ ଦାୟିତ୍ୱପୂର୍ଣ୍ଣ ଭାବେ ରିପୋର୍ଟ କରନ୍ତୁ।’
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
