ଦୁର୍ବୃତ୍ତ ସଂଘବଦ୍ଧ ଭାବେ ଆକ୍ରମଣ

ଧଉଳି: ଚଳିତ ମାସ ୧୩ ତାରିଖ ଅପରାହ୍ଣରେ ଧଉଳିଗିରି ନିକଟରେ ସ୍ଥାନୀୟ ଯୁବକ ରଜନୀକାନ୍ତ ନାୟକଙ୍କୁ କେତେକ ଦୁର୍ବୃତ୍ତ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଏହି ଘଟଣାରେ ଗତକାଲି (ରବିବାର) ପୁଲିସ ତୃତୀୟ ଅଭିଯୁକ୍ତକୁ ଗିରଫକରିଛି। ଏହାପରେ ଗିରଫ ସଂଖ୍ୟା ୩କୁ ବୃଦ୍ଧି ପାଇଛି। ତନାଘନା କରାଯାଉଛି, ଗିରଫ ସଂଖ୍ୟା ବୃଦ୍ଧି ପାଇପାରେ ବୋଲି ତଦନ୍ତ କରୁଥିବା ପୁଲିସ କହିଛି। ମାମଲାର ବିବରଣୀରୁ ଜଣାଯାଇଛି, ମଙ୍ଗଳବବାର ଧଉଳି ପାନ୍ଥନିବାସ ନିକଟରେ ୧୫ରୁ ଅଧିକ ଯୁବକ ଭୋଜି କରୁଥିଲେ। ମୁଖ୍ୟ ଅଭିଯୁକ୍ତ ବିଶ୍ୱମୋହନ ପ୍ରଧାନ ଓରଫ ଗୁଡୁ ଭୋଜିସ୍ଥଳକୁ ବୁଲେଟ୍ ନେଇ ଯିବା ବେଳେ ବାଟରେ ଅନ୍ୟ ଜଣେ ଯୁବକ ରଜନୀକାନ୍ତଙ୍କ ସହ ବଚସା ହୋଇଥିଲା। ବଚସାର କାରଣ ପୂର୍ବ ଶତ୍ରୁତା ଥିଲା। ରଜନୀକାନ୍ତ ରାଗରେ ଗୁଡ଼ୁର ବୁଲେଟ୍‌କୁ ଗୋଇଠା ମାରିଥିଲେ। ଗୁଡ଼ୁ ଏଥିରେ ଉତ୍‌କ୍ଷିପ୍ତ ହୋଇ ନିଜର ସାଙ୍ଗସାଥିଙ୍କୁ ଡାକି ଆଣିଥିଲେ। ସାଙ୍ଗମାନଙ୍କ ସହ ଖୋଜାଖୋଜି କରିବାରେ ରଜନୀକାନ୍ତଙ୍କୁ ନିକଟସ୍ଥ ଏକ ଭେରାଇଟି ଷ୍ଟୋର ନିକଟରେ ପାଇଥିଲେ। ରଜନୀକାନ୍ତଙ୍କୁ ଦେଖୁଦେଖୁ ଗୁଡ଼ୁ ଗ୍ୟାଙ୍ଗ ଘେରି ଯାଇଥିଲେ ଏବଂ ଲୁହାରଡ୍‌, ଲାଠି, ପାଇପ୍‌, କାଠଫାଳିଆ ଓ ମଦବୋତଲରେ ଆକ୍ରମଣ କରିଥିଲେ। ରକ୍ତାକ୍ତ ଅବସ୍ଥାରେ ରଜନୀକାନ୍ତ ତଳେ ପଡ଼ିଯିବା ପରେ ସେମାନେ ଫେରାର ହୋଇଯାଇଥିଲେ। ସ୍ଥାନୀୟ ଲୋକ ରଜନୀକାନ୍ତଙ୍କୁ ଉଦ୍ଧାର କରି ଚିକିତ୍ସାଳୟରେ ଭର୍ତ୍ତି କରିଥିଲେ। ପରେ ଏନେଇ ରଜନୀକାନ୍ତ ଥାନାରେ ଲିଖିତ ଅଭିଯୋଗ କରିଥିଲେ।