Sushant Singh Rajput Sister: ରକ୍ଷାବନ୍ଧନରେ ଭାଇ ସୁଶାନ୍ତଙ୍କୁ ଝୁରିଲେ ଶ୍ୱେତା, ସେୟାର କଲେ ଅଭୁଲା ଫଟୋ

ରକ୍ଷାବନ୍ଧନ ଆସିଲେ ଭାଇ-ଭଉଣୀଙ୍କ ସ୍ନେହର ସ୍ମୃତି ପୁଣିଥରେ ତାଜା ହୋଇଯାଏ। ଏହି ଅବସରରେ ଅଭିନେତା ସୁଶାନ୍ତ ସିଂହ ରାଜପୁତଙ୍କୁ ମନେ ପକାଇ ଭାବୁକ ହୋଇଛନ୍ତି ତାଙ୍କ ଭଉଣୀ ଶ୍ୱେତା ସିଂହ କୀର୍ତ୍ତି। ଶ୍ୱେତା ପିଲାଦିନର କିଛି ଅଭୁଲା ଫଟୋ ସେୟାର କରିବା ସହ ଭାଇଙ୍କ ସହ ବିତାଇଥିବା ମଧୁର ସମୟକୁ ମନେ ପକାଇଛନ୍ତି।

ଖେଳନାଠାରୁ ମିଠା ପର୍ଯ୍ୟନ୍ତ, ଏମିତି ଥିଲା ଭାଇ-ଭଉଣୀଙ୍କ ସମ୍ପର୍କ

ଶ୍ୱେତା କହିଛନ୍ତି, ପିଲାଦିନରେ ସୁଶାନ୍ତଙ୍କ ସହ ନିଜ ପ୍ରିୟ ଖେଳନା ବାଣ୍ଟିବାରେ ତାଙ୍କୁ ବହୁତ ଖୁସି ମିଳୁଥିଲା। ନିଜର ଏକମାତ୍ର କଣ୍ଢେଇ ହେଉ କି ଛୋଟ କିଚେନ୍ ସେଟ୍, ସେ ସବୁକିଛି ଭାଇଙ୍କ ସହ ସେୟାର କରୁଥିଲେ। ସୁଶାନ୍ତ ସେହି ଖେଳନାରେ ଖେଳୁଥିବା ଦେଖି ତାଙ୍କ ଖୁସି ଆହୁରି ବଢ଼ିଯାଉଥିଲା।
ତେବେ ମିଠା କଥା ଆସିଲେ ଶ୍ୱେତା ଥିଲେ ଖୁବ୍ ସତର୍କ। କାରଣ ଦୁହିଁଜଣଙ୍କୁ ମିଠା ବହୁତ ପସନ୍ଦ ଥିଲା। ତେଣୁ ମିଠାକୁ ସମାନ ଭାଗରେ ବାଣ୍ଟିବା ତାଙ୍କ ପାଇଁ ନିୟମ ଥିଲା।

ମିଠା ଖୁଆଇବା ବେଳର ସେହି ଫଟୋ ମନେ ପକାଇଲେ ଶ୍ୱେତା

ରକ୍ଷାବନ୍ଧନରେ ସୁଶାନ୍ତଙ୍କୁ ମିଠା ଖୁଆଉଥିବା ପିଲାଦିନର ଏକ ଫଟୋ ସେୟାର କରି ଶ୍ୱେତା ଲେଖିଛନ୍ତି ଯେ, ଭାଇଙ୍କୁ ମିଠାର ଠିକ୍ ଅଧା ଭାଗ ଦେବା ନେଇ ସେ କେତେ ସତର୍କ ରହୁଥିଲେ। କାରଣ ସୁଶାନ୍ତ ଯେମିତି ହାତ କାମୁଡି ନ ପାରନ୍ତି। ଫଟୋରେ ତାଙ୍କ ମୁହଁର ଭାବଭଙ୍ଗୀ ମଧ୍ୟ ସେହି ପିଲାଦିନର ନିରୀହ ଏବଂ ମିଠା ସ୍ମୃତିକୁ ପ୍ରକାଶ କରୁଛି।

ଶ୍ୱେତା କହିଛନ୍ତି ଯେ, ଏହି ସ୍ମୃତିଗୁଡ଼ିକ ତାଙ୍କ ହୃଦୟରେ ସବୁବେଳେ ସ୍ୱତନ୍ତ୍ର ସ୍ଥାନ ନେଇ ରହିବ। ତାଙ୍କ ପାଇଁ ଏଗୁଡ଼ିକ କେବଳ ଫଟୋ ନୁହେଁ, ବରଂ ଭାଇଙ୍କ ସହ ବିତାଇଥିବା ଅମୂଲ୍ୟ ମୁହୂର୍ତ୍ତ।

‘ପରଜନ୍ମରେ ତୁମେ ମୋର ବଡ଼ ଭଉଣୀ ହେବ’

ଶ୍ୱେତାଙ୍କ ପୋଷ୍ଟର ସବୁଠାରୁ ଭାବପ୍ରବଣ ଅଂଶ ହେଉଛି ତାଙ୍କ ପରଜନ୍ମର କଥା। ସେ ଲେଖିଛନ୍ତି ଯେ, ଯଦି ପରଜନ୍ମ ଥାଏ, ତେବେ ସୁଶାନ୍ତ ତାଙ୍କର ବଡ଼ ଓ ସ୍ନେହଭରା ଭଉଣୀ ହୁଅନ୍ତୁ ଏବଂ ସେ ତାଙ୍କ ଭାଇ ଭାବେ ସେହି ଦୁଷ୍ଟୁମିଭରା ପିଲାଦିନକୁ ପୁଣିଥରେ ବଞ୍ଚନ୍ତୁ।
ସେ ଆହୁରି କହିଛନ୍ତି ଯେ, ଜୀବନର କୌଣସି ଗୋଟିଏ ମୁହୂର୍ତ୍ତକୁ ଯଦି ସବୁଦିନ ପାଇଁ ଅଟକାଇ ରଖିବାର ସୁଯୋଗ ମିଳେ, ତେବେ ପରିବାର ସମସ୍ତେ ଏକାଠି ଥିବା ସେହି ପିଲାଦିନର ମୁହୂର୍ତ୍ତକୁ ସେ ବାଛିବେ।

‘ଭାଇ, ସବୁବେଳେ ସୁରକ୍ଷିତ ରୁହ’

ପୋଷ୍ଟର ଶେଷରେ ଶ୍ୱେତା ନିଜ ଭାଇଙ୍କୁ ରକ୍ଷାବନ୍ଧନର ଶୁଭେଚ୍ଛା ଜଣାଇବା ସହ ତାଙ୍କ ପାଇଁ ଭାବପ୍ରବଣ ବାର୍ତ୍ତା ଲେଖିଛନ୍ତି। ସେ ସୁଶାନ୍ତ ସବୁବେଳେ ଭଗବାନଙ୍କ କୋଳରେ ସୁରକ୍ଷିତ ରୁହନ୍ତୁ ବୋଲି ପ୍ରାର୍ଥନା କରିଛନ୍ତି।

ଶ୍ୱେତାଙ୍କ ଏହି ଭାବପ୍ରବଣ ପୋଷ୍ଟ ସୋସିଆଲ ମିଡିଆରେ ଭାଇରାଲ ହେବା ସହ ସୁଶାନ୍ତଙ୍କ ପ୍ରଶଂସକମାନେ ମଧ୍ୟ ତାଙ୍କ ପିଲାଦିନର ଫଟୋ ଦେଖି ଭାବୁକ ହୋଇଛନ୍ତି।