Umar Khalid: ଜେଏନ୍‌ୟୁ କାନ୍ଥରେ ଉମର ଖାଲିଦଙ୍କ ସମର୍ଥନରେ ନାରା

ନୂଆଦିଲ୍ଲୀ: ଦିଲ୍ଲୀର ଜବାହରଲାଲ ନେହରୁ ବିଶ୍ୱବିଦ୍ୟାଳୟ ( ଜେଏନ୍‌ୟୁ ) ପରିସରର କାନ୍ଥରେ ଉମର ଖାଲିଦଙ୍କ ସମର୍ଥନରେ ନାରା ଲେଖାଯିବାକୁ ନେଇ ବିବାଦ ଦେଖାଦେଇଛି।

'ଉମର ଖାଲିଦଙ୍କୁ ମୁକ୍ତ କର' ଏବଂ 'ନକ୍ସଲବାଡ଼ି ଜିନ୍ଦାବାଦ' ଭଳି ନାରା ଲେଖାଯିବା ସହ ସ୍ୱାଧୀନତା ସଂଗ୍ରାମୀ ବୀର ସାବରକରଙ୍କ ଛବି ନିକଟରେ ଆପତ୍ତିଜନକ ମନ୍ତବ୍ୟ ଲେଖାଯାଇଥିବା ଅଭିଯୋଗ ହୋଇଛି।

ଏହାକୁ ନେଇ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ଓ ବିଶ୍ୱ ହିନ୍ଦୁ ପରିଷଦ (ଭିଏଚ୍‌ପି) ଆପତ୍ତି ଉଠାଇବା ସହ ଦାୟୀ ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି।

Advertisment ଏବିଭିପିର ଜେଏନ୍‌ୟୁ ଶାଖା ଅଭିଯୋଗ କରିଛି ଯେ ବାମପନ୍ଥୀ ଛାତ୍ର ସଂଗଠନ ସହ ଜଡ଼ିତ କର୍ମୀମାନେ ଏଭଳି ନାରା ଲେଖିଛନ୍ତି।

ଏହି ଘଟଣା ବିଶ୍ୱବିଦ୍ୟାଳୟର ଶିକ୍ଷା ଓ ଶୈକ୍ଷିକ ପରିବେଶକୁ ପ୍ରଭାବିତ କରିବା ସହ ଭିନ୍ନ ମତ ରଖୁଥିବା ଗୋଷ୍ଠୀଙ୍କ ମଧ୍ୟରେ ବିବାଦ ବଢ଼ାଇପାରେ ବୋଲି ସଂଗଠନ କହିଛି।

ଜେଏନ୍‌ୟୁରେ ଏବିଭିପି ସଭାପତି ମୟଙ୍କ ପାଞ୍ଚାଲ କହିଛନ୍ତି, ମତ ପ୍ରକାଶର ସ୍ୱାଧୀନତା ନାଁରେ ବିରୋଧୀ ମତ କିମ୍ବା ଜାତୀୟ ବ୍ୟକ୍ତିତ୍ୱଙ୍କୁ ଅସମ୍ମାନ କରିବା ଗ୍ରହଣୀୟ ନୁହେଁ।

ସାବରକରଙ୍କ ଛବି ନିକଟରେ ଆପତ୍ତିଜନକ ଟିପ୍ପଣୀ ଲେଖିବା ଏବଂ କାନ୍ଥରେ ରାଜନୈତିକ ନାରା ଲେଖିବା ବିଶ୍ୱବିଦ୍ୟାଳୟର ପରିବେଶକୁ ନଷ୍ଟ କରିବାର ପ୍ରୟାସ ବୋଲି ସେ ଅଭିଯୋଗ କରିଛନ୍ତି।

ଦୋଷୀଙ୍କୁ ଚିହ୍ନଟ କରି ଉପଯୁକ୍ତ ପଦକ୍ଷେପ ନେବାକୁ ସେ ପ୍ରଶାସନକୁ ଅନୁରୋଧ କରିଛନ୍ତି।

JNU Professor: ଜେଏନ୍‌ୟୁରୁ ବହିଷ୍କାର ପ୍ରଫେସର ତଥା କଂଗ୍ରେସ ସାଂସଦଙ୍କ ନାଁରେ ଏତଲା ରୁଜୁ ଅନ୍ୟପକ୍ଷରେ, ଭିଏଚ୍‌ପିର ଜାତୀୟ ମୁଖପାତ୍ର ବିନୋଦ ବଂଶଲ ମଧ୍ୟ ଏହି ଘଟଣାକୁ ନେଇ ଆପତ୍ତି ପ୍ରକାଶ କରିଛନ୍ତି।

ଶିକ୍ଷାନୁଷ୍ଠାନଗୁଡ଼ିକ ଜ୍ଞାନ ଓ ଆଲୋଚନାର କେନ୍ଦ୍ର ହେବା ଉଚିତ, ଉତ୍ତେଜନା ସୃଷ୍ଟିକାରୀ ନାରା ଲେଖିବାର ସ୍ଥାନ ନୁହେଁ ବୋଲି ସେ କହିଛନ୍ତି।

ଦାୟୀ ବ୍ୟକ୍ତିଙ୍କୁ ଚିହ୍ନଟ କରି କଡ଼ା ପଦକ୍ଷେପ ନେବାକୁ ସେ ଦାବି କରିଛନ୍ତି।

ଉଲ୍ଲେଖଯୋଗ୍ୟ, ୨୦୨୦ ମସିହାରେ ଦିଲ୍ଲୀ ଦଙ୍ଗା ସମ୍ପର୍କିତ ବଡ଼ ଷଡ଼ଯନ୍ତ୍ର ମାମଲାରେ ଉମର ଖାଲିଦଙ୍କୁ ଗିରଫ କରାଯାଇଥିଲା।

ଏହି ମାମଲାରେ ସେ ସେପ୍ଟେମ୍ବର ୨୦୨୦ରୁ ଜେଲ୍‌ରେ ଅଛନ୍ତି।

ତେବେ ଜେଏନ୍‌ୟୁ କାନ୍ଥରେ ନାରା କିଏ ଲେଖିଛି, ତାହା ସ୍ପଷ୍ଟ ହୋଇନାହିଁ।

ଏହାର ତଦନ୍ତ କରି ତଥ୍ୟ ଜାଣିବାକୁ ବିଶ୍ୱବିଦ୍ୟାଳୟ ପ୍ରଶାସନ ଉଦ୍ୟମ କରିବ ବୋଲି କହିଛି।