ଆମେରିକାରେ ଭାରତୀୟ IT କର୍ମଚାରୀଙ୍କୁ ବଡ଼ ଝଟ୍କା! ଏହି କମ୍ପାନୀର କମ୍ପାନୀର ଗ୍ରୀନ୍ କାର୍ଡ…..
ୱାଶିଂଟନ୍,୯।୧୦: ଆମେରିକାରେ କାମ କରୁଥିବା ଭାରତୀୟ IT କର୍ମଚାରୀଙ୍କ ପାଇଁ ଚିନ୍ତା ବଢ଼ିଛି । ଆମେରିକା ସରକାର ଇନ୍ଫୋସିସ୍, ଟାଟା କନ୍ସଲ୍ଟାନ୍ସି ସର୍ଭିସେସ୍ (TCS), ୱିପ୍ରୋ, HCLTech, କଗ୍ନିଜାଣ୍ଟ, କ୍ୟାପ୍ଜେମିନି, ମାଇକ୍ରୋସଫ୍ଟ ଏବଂ ଆଡୋବ୍ ସମେତ ୮ଟି କମ୍ପାନୀକୁ ଗ୍ରୀନ୍ କାର୍ଡ ସହ ଜଡ଼ିତ PERM ଲେବର ସାର୍ଟିଫିକେସନ୍ ପ୍ରକ୍ରିୟାରୁ ସ୍ଥଗିତ ରଖିଛି । ଆମେରିକୀୟ କର୍ମଚାରୀଙ୍କ ଚାକିରି ଓ ଦରମା ଉପରେ ପ୍ରଭାବ ପକାଇ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବାରେ ନିୟମର ଦୁରୁପଯୋଗ ହୋଇଥିବା ଅଭିଯୋଗରେ ଏହି ପଦକ୍ଷେପ ନିଆଯାଇଛି । ଏହାଦ୍ୱାରା ସମ୍ପୃକ୍ତ କମ୍ପାନୀଗୁଡ଼ିକରେ କାମ କରୁଥିବା ଅନେକ ବିଦେଶୀ କର୍ମଚାରୀଙ୍କ ସ୍ଥାୟୀ ବାସିନ୍ଦା ହେବାର ଯୋଜନା ପ୍ରଭାବିତ ହୋଇପାରେ ।
PERMର ହେଉଛି Program Electronic Review Management। ଆମେରିକାରେ ଚାକିରି ଆଧାରରେ ଗ୍ରୀନ୍ କାର୍ଡ ପାଇବା ପ୍ରକ୍ରିୟାରେ ଏହା ଏକ ଗୁରୁତ୍ୱପୂର୍ଣ୍ଣ ପ୍ରାରମ୍ଭିକ ପଦକ୍ଷେପ।ଏହି ପ୍ରକ୍ରିୟାରେ କମ୍ପାନୀକୁ ଆମେରିକାର ଶ୍ରମ ବିଭାଗ ସମ୍ମୁଖରେ ପ୍ରମାଣ କରିବାକୁ ପଡ଼େ ଯେ, ନିର୍ଦ୍ଦିଷ୍ଟ ପଦବୀ ପାଇଁ ଆବଶ୍ୟକ ଯୋଗ୍ୟତା ଥିବା ଆମେରିକୀୟ କର୍ମଚାରୀ ଉପଲବ୍ଧ ନାହାନ୍ତି ଏବଂ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେଲେ ଆମେରିକୀୟ କର୍ମଚାରୀଙ୍କ ଦରମା କିମ୍ବା କାର୍ଯ୍ୟ ପରିସ୍ଥିତି ଉପରେ ଖରାପ ପ୍ରଭାବ ପଡ଼ିବ ନାହିଁ।PERM ଅନୁମୋଦନ ପରେ ନିଯୁକ୍ତିଦାତା ସାଧାରଣତଃ ଗ୍ରୀନ୍ କାର୍ଡ ପାଇଁ ପରବର୍ତ୍ତୀ ପଦକ୍ଷେପ ନେଇପାରନ୍ତିମ। ତେଣୁ ଏହି ପ୍ରକ୍ରିୟା ସ୍ଥଗିତ ହେବା ଫଳରେ ସମ୍ପୃକ୍ତ କମ୍ପାନୀର କର୍ମଚାରୀଙ୍କ ଗ୍ରୀନ୍ କାର୍ଡ ଆବେଦନ ଆଗକୁ ବଢ଼ିବାରେ ବାଧା ସୃଷ୍ଟି ହୋଇପାରେ ।
ଆମେରିକୀୟ ପ୍ରଶାସନର ଅଭିଯୋଗ ହେଉଛି, କିଛି କମ୍ପାନୀ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ଭିସା ଏବଂ ଶ୍ରମ ସମ୍ବନ୍ଧୀୟ ନିୟମର ଦୁରୁପଯୋଗ କରିଛନ୍ତି । ଏହାଦ୍ୱାରା ଆମେରିକୀୟ କର୍ମଚାରୀଙ୍କ ଚାକିରି ସୁଯୋଗ ଓ ଦରମା ପ୍ରଭାବିତ ହୋଇଥିବା ଦାବି କରାଯାଇଛି। ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସ ବିଶେଷ କରି ମାଇକ୍ରୋସଫ୍ଟକୁ ଟାର୍ଗେଟ୍ କରି ଭିସା ବ୍ୟବସ୍ଥାର ଦୁରୁପଯୋଗ ହୋଇଥିବା ଅଭିଯୋଗ ଆଣିଛନ୍ତି । ତାଙ୍କ ଦାବି ଅନୁସାରେ, ମାଇକ୍ରୋସଫ୍ଟ ୨୦୨୫ରେ ପ୍ରାୟ ୬,୦୦୦ ଆମେରିକୀୟ କର୍ମଚାରୀଙ୍କୁ ଛଟେଇ କରିଥିଲା। ଅନ୍ୟପଟେ, କମ୍ପାନୀକୁ ୬,୦୦୦ରୁ ଅଧିକ H-1B ଭିସା ମିଳିଥିବା ଏବଂ ଛଟେଇ ହୋଇଥିବା କିଛି ପଦବୀ ସହ ସମାନ କାମ ପାଇଁ PERM ଆବେଦନ କରାଯାଇଥିବା ସେ ଅଭିଯୋଗ କରିଛନ୍ତି।
ଏହି ଅଭିଯୋଗଗୁଡ଼ିକ ନେଇ ମାଇକ୍ରୋସଫ୍ଟର ପ୍ରତିକ୍ରିୟା ମଧ୍ୟ ଗୁରୁତ୍ୱପୂର୍ଣ୍ଣ । ରିପୋର୍ଟ ଅନୁସାରେ, କମ୍ପାନୀ କହିଛି ଯେ ଅଧିକାଂଶ ଆବେଦନ ନୂଆ ନିଯୁକ୍ତି ପାଇଁ ନୁହେଁ, ବରଂ ପୂର୍ବରୁ କାମ କରୁଥିବା କର୍ମଚାରୀଙ୍କ ସହ ଜଡ଼ିତ ଥିଲା। ତେଣୁ ସରକାରଙ୍କ ଅଭିଯୋଗ ଓ କମ୍ପାନୀର ପକ୍ଷ ଉଭୟକୁ ଧ୍ୟାନରେ ରଖିବା ଆବଶ୍ୟକ। ଗ୍ରୀନ୍ କାର୍ଡ ପ୍ରକ୍ରିୟାରେ ବିଳମ୍ବ ହେଲେ କର୍ମଚାରୀଙ୍କ କ୍ୟାରିୟର ଯୋଜନା, ଚାକିରି ପରିବର୍ତ୍ତନ, ପରିବାର ସହ ସ୍ଥାୟୀ ଭାବେ ରହିବା ଏବଂ ପିଲାଙ୍କ ଶିକ୍ଷା ସମ୍ବନ୍ଧୀୟ ନିଷ୍ପତ୍ତି ଉପରେ ପ୍ରଭାବ ପଡ଼ିପାରେ।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
