ଆରପାରିରେ ଆଦର୍ଶ ଶିକ୍ଷକ ସନାତନ: ପାଟଣା ଅଞ୍ଚଳରେ ଶୋକର ଛାୟା

ପାଟଣା, ୨୬।୯ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ଏରେଣ୍ଡେଇ ପଞ୍ଚାୟତ ଡିଆନାଳୀ ଗ୍ରାମର ଆଦର୍ଶ ଶିକ୍ଷକ ତଥା ବିଶିଷ୍ଟ ସଂଗଠକ, ଶିକ୍ଷାବିତ୍‌ ତଥା ପାଟଣା କଲେଜର ଅନ୍ୟତମ ପ୍ରତିଷ୍ଠାତା ସଦସ୍ୟ ସନାତନ ମହାନ୍ତଙ୍କ ପରଲୋକ ଘଟିଛି। ଶୁକ୍ରବାର ରାତି ପ୍ରାୟ ୪ଟା ୩୦ ମିନିଟ୍‌ରେ କେନ୍ଦୁଝରର ଏକ ଘରୋଇ ହସ୍ପିଟାଲରେ ହୃଦଘାତରେ ୮୬ ବର୍ଷ ବୟସରେ ତାଙ୍କ ଦେହାନ୍ତ ହୋଇଥିବା ପରିବାର ସୂତ୍ରରୁ ଜଣାପଡ଼ିଛି।

ସନାତନ ମହାନ୍ତ ଜଣେ ଛାତ୍ରବତ୍ସଳ, ଅମାୟିକ ଓ ସମାଜସେବୀ ବ୍ୟକ୍ତି ଭାବେ ପାଟଣା ଅଞ୍ଚଳରେ ପରିଚିତ ଥିଲେ। ପାଟଣା ଅଞ୍ଚଳର ବିକାଶରେ ମଧ୍ୟ ତାଙ୍କର ଉଲ୍ଲେଖନୀୟ ଅବଦାନ ରହିଥିଲା। ସେ ପାଟଣା ମୁଖ୍ୟାଳୟସ୍ଥିତ ପୁରାତନ ଜି.ଏନ. ହାଇସ୍କୁଲରେ ଦୀର୍ଘବର୍ଷ ଧରି ବିଜ୍ଞାନ ଶିକ୍ଷକ ଭାବେ ଦାୟିତ୍ୱ ତୁଲାଇବା ପରେ ସରକାରୀ ଚାକିରିରୁ ଅବସର ନେଇଥିଲେ। ଅବସର ପରେ ମଧ୍ୟ ସେ ବିଭିନ୍ନ ଜନହିତକର କାର୍ଯ୍ୟରେ ନିଜକୁ ନିୟୋଜିତ ରଖିଥିଲେ।

ତାଙ୍କ ବିୟୋଗ ଖବର ପ୍ରଚାରିତ ହେବା ପରେ ପାଟଣା ଅଞ୍ଚଳରେ ଶୋକର ଛାୟା ଖେଳିଯାଇଛି। ତାଙ୍କ ଡିଆନାଳୀସ୍ଥିତ ବାସଭବନରେ ଶନିବାର ବହୁ ପୁରାତନ ଛାତ୍ର, ବିଶିଷ୍ଟ ବ୍ୟକ୍ତି ଓ ଶୁଭେଚ୍ଛୁ ଶେଷ ଦର୍ଶନ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି। ମୃତ୍ୟୁଶଯ୍ୟା ନିକଟରେ ତାଙ୍କ ପୁଅ ଜଗଦୀଶ, ମୃତ୍ୟୁଞ୍ଜୟ ଓ ଖିତିଶ, ଝିଅ କସ୍ତୁରୀ ଉପସ୍ଥିତ ଥିଲେ। ପରିବାର ସୂତ୍ରରୁ ପ୍ରକାଶ, ବୈତରଣୀ ନଦୀର ମଙ୍ଗଳପୁର ଶ୍ମଶାନରେ ସନାତନ ମହାନ୍ତଙ୍କ ଶେଷକୃତ୍ୟ ସମ୍ପନ୍ନ ହେବ।

ଏହି ଅବସରରେ ପାଟଣା ବ୍ଲକ୍‌ର ପୂର୍ବତନ ଅଧ୍ୟକ୍ଷ ଇଂ. ବିଦ୍ୟାଧର ଦାଶ, ବିଜେପିର ପୂର୍ବତନ ଜିଲା ସଭାପତି ରାଧାକାନ୍ତ ମହାନ୍ତ, ପାଟଣା ବଣିକ ସଂଘ ସଭାପତି ବୁଲୁ ଭଞ୍ଜ, ସାମାଜିକ କର୍ମୀ ବିଦ୍ୟାଧର ମହାନ୍ତ, କଂଗ୍ରେସ ନେତା ଲକ୍ଷ୍ମଣ କୁମାର ଦାଶ, ଦିଲ୍ଲୀପ ଦାଶ, ଜ୍ଞାନେନ୍ଦ୍ର ମିଶ୍ର, ସାମାଜିକ କର୍ମୀ ଅରୁଣ କୁମାର ମିଶ୍ର, ରଘୁନାଥ ଦାଶ, ଯତୀନ୍ଦ୍ର କୁମାର ଦାଶ ଓ ସଞ୍ଜିତ ଚକ୍ର ପ୍ରମୁଖ ଶେଷ ଦର୍ଶନ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି।