ଏଇ ଭାରତରେ

ଗଙ୍ଗାନଦୀରେ ଡଲ୍‌ଫିନ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ପାଲଟିଥାଏ। ହେଲେ ଏମାନଙ୍କ ଜୀବନ ପ୍ରତି ବିପଦ ଏବେ ସୃଷ୍ଟି ହୋଇଛି। ଗଙ୍ଗା ଓ ଏହାର ଉପନଦୀଗୁଡ଼ିକରେ ପାଖାପାଖି ୬,୩୨୪ ଡଲ୍‌ଫିନ ରହିଥିବା ସରକାରୀ ଭାବେ କୁହାଯାଇଛି। ଅତ୍ୟଧିକ ବିଷାକ୍ତ ରାସାୟନିକ ମିଶି ଗଙ୍ଗାଜଳ ପ୍ରଦୂଷିତ ହେବା ଯୋଗୁ ଏମାନଙ୍କର ମୃତ୍ୟୁ ଘଟୁଛି। ଏହାସହ ଏମାନଙ୍କ ବଂଶ ବୃଦ୍ଧି ମଧ୍ୟ ପ୍ରଭାବିତ ହେଉଛି। ଅନ୍ୟପଟେ ସେମାନଙ୍କୁ ବେଆଇନ ଭାବେ ଶିକାର କରାଯାଉଛି। ଫଳରେ ଦିନକୁ ଦିନ ଡଲ୍‌ଫିନ୍‌ ସଂଖ୍ୟା ହ୍ରାସ ପାଇବାରେ ଲାଗିଛି ଏବଂ ସେମାନଙ୍କ ସୁରକ୍ଷା ଏବେ ଜରୁରୀ ହୋଇପଡ଼ିଛି। ଏଥିପାଇଁ ସ୍ବଚ୍ଛ ଗଙ୍ଗା ମିଶନରେ ଆରମ୍ଭ କରାଯାଇଛି ଡଲ୍‌ଫିନ୍‌ ଆମ୍ବୁଲାନ୍ସ। ଏହା ଭାରତର ପ୍ରଥମ ଡଲ୍‌ଫିନ ଆମ୍ବୁଲାନ୍ସ ସର୍ଭିସ୍‌, ଯାହାଦ୍ୱାରା ଡଲ୍‌ଫିନ୍‌ଙ୍କ ଜୀବନ ରକ୍ଷା ହୋଇପାରୁଛି। ଏହି ଆମ୍ବୁଲାନ୍ସ ଦ୍ୱାରା ୧୦ରୁ ଊର୍ଦ୍ଧ୍ୱ ଡଲ୍‌ଫିନଙ୍କୁ ଉଦ୍ଧାର କରାଯାଇ ସାରିଲାଣି। ଗଙ୍ଗା ଓ ତାହାର ଉପନଦୀରେ କୌଣସି କାରଣରୁ ଡଲ୍‌ଫିନ ଆହତ ହେଲେ କିମ୍ବା କୌଣସି ସଙ୍କୀର୍ଣ୍ଣ ଜଳସେଚନ କେନାଲରେ ଫସିଯାଇଥିଲେ ଏହି ଆମ୍ବୁଲାନ୍ସ ସେଠାରେ ତୁରନ୍ତ ପହଞ୍ଚି ସେମାନଙ୍କୁ ଉଦ୍ଧାର କରୁଛି। ଡଲ୍‌ଫିନ୍‌ ଆମ୍ବୁଲାନ୍ସରେ ଉନ୍ନତ ଚିକିତ୍ସା ଉପକରଣ ମଧ୍ୟ ରଖାଯାଇଛି। ଏମର୍ଜେନ୍ସି ଷ୍ଟାବିଲାଇଜେଶନ, ଅକ୍ସିଜେନ୍‌ ସପୋର୍ଟ ଏବଂ ସୁରକ୍ଷିତ ପରିବହନ ପାଇଁ ଉପକରଣ ସବୁ ରହିଛି।