‘ଏହା କ୍ରିକେଟ୍ ନୁହେଁ, କେବଳ ବ୍ୟାଟିଂ’: ୪୦୬ ରନ୍ ଚେଜ୍ କରିବା ପରେ ବି ରାଗିଗଲେ ହେଡ୍ କୋଚ୍ ଗମ୍ଭୀର…ଜାଣନ୍ତୁ କାରଣ
ଗୁଆହାଟି,୧।୧୦: ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଏକଦିବସୀୟ (ODI) ମ୍ୟାଚ୍ରେ ୪୦୬ ରନ୍ର ବିଶାଳ ଲକ୍ଷ୍ୟ ହାସଲ କରି ସିରିଜ କବ୍ଜା କରିବା ସତ୍ତ୍ୱେ ଗୁଆହାଟି ପିଚ୍କୁ ନେଇ କ୍ଷୋଭ ପ୍ରକାଶ କରିଛନ୍ତି ଭାରତୀୟ କ୍ରିକେଟ ଟିମ୍ର ହେଡ କୋଚ୍ ଗୌତମ ଗମ୍ଭୀର। ମ୍ୟାଚ୍ ପରେ ପ୍ରତିକ୍ରିୟା ଦେଇ ସେ କହିଛନ୍ତି ଯେ ବୋଲରଙ୍କ ପାଇଁ ଆଦୌ ସହାୟକ ହେଉନଥିବା ଏଭଳି ପିଚ କ୍ରିକେଟ ପାଇଁ ଆଦୌ “ସଠିକ ନୁହେଁ”। ବ୍ୟାଟ ଏବଂ ବଲ ମଧ୍ୟରେ ପ୍ରକୃତ ପ୍ରତିଯୋଗିତା ହେବା ଦରକାର, ନଚେତ ଏହାକୁ କ୍ରିକେଟ କୁହା ନ ଯାଇ କେବଳ ବ୍ୟାଟିଂ କୁହାଯିବ।
ବୁଧବାର ଖେଳାଯାଇଥିବା ଏହି ମ୍ୟାଚ୍ରେ ଭାରତ ନିଜ ଏକଦିବସୀୟ ଇତିହାସର ସବୁଠାରୁ ବଡ଼ ରନ ଚେଜ ସଫଳତାର ସହ ପୂରା କରିଥିଲା। ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ଜନ କ୍ୟାମ୍ପବେଲ, ସାଇ ହୋପ୍ ଏବଂ ଆମୀର ଜାଙ୍ଗୁଙ୍କ ଶତକ ବଳରେ ୭ ଉଇକେଟ ହରାଇ ୪୦୫ ରନ ସଂଗ୍ରହ କରିଥିଲା। ଜବାବରେ ଭାରତ ଶୁଭମନ ଗିଲ୍ଙ୍କ ଅପରାଜିତ ୨୨୩ ରନ୍ (୧୩୩ ବଲ) ଏବଂ ରୋହିତ ଶର୍ମାଙ୍କ ୧୦୧ ରନ (୭୫ ବଲ) ବଳରେ ମାତ୍ର ୪୩.୩ ଓଭରରେ ୨ ଉଇକେଟ ହରାଇ ୪୦୮ ରନ କରି ନେଇଥିଲା। ଏହି ୮ ଉଇକେଟର ବିଜୟ ସହ ଭାରତ ୩ ମ୍ୟାଚ ବିଶିଷ୍ଟ ସିରିଜ୍କୁ ନିଜ ନାମରେ କରିଛି।
ମ୍ୟାଚ୍ ପରେ ଷ୍ଟାର୍ ସ୍ପୋଟର୍ସ ସହ ଆଲୋଚନା ବେଳେ ଗମ୍ଭୀର କହିଛନ୍ତି, “ଯଦି ମୁଁ ସମ୍ପୂର୍ଣ୍ଣ ସଚ୍ଚୋଟତାର ସହ କହିବି, ତେବେ ବ୍ୟାଟ୍ ଓ ବଲ୍ ମଧ୍ୟରେ କିଛି ପ୍ରତିଯୋଗିତା ରହିବା ଆବଶ୍ୟକ। ଆମେ କ୍ରିକେଟ ବିଷୟରେ କଥା ହେଉଛୁ, କିନ୍ତୁ ଏହା କ୍ରିକେଟ ନୁହେଁ, କେବଳ ବ୍ୟାଟିଂ। ରେକର୍ଡ, ଦର୍ଶକ ଏବଂ ବ୍ରୋଡକାଷ୍ଟରଙ୍କ ପାଇଁ ୪୦୦ ରନ୍ର ପିଛା କରିବା ନିଶ୍ଚିତ ଭାବେ ଚମତ୍କାର, କିନ୍ତୁ ଜଣେ ସଚ୍ଚୋଟ କ୍ରିକେଟ ପ୍ରେମୀ ଓ କୋଚ୍ ଭାବେ ମୋତେ ବୋଲରଙ୍କ ପ୍ରତି ସହାନୁଭୂତି ରଖିବାକୁ ପଡ଼ିବ। ଏଭଳି ପିଚ୍ରେ ବୋଲରଙ୍କ ପାଇଁ କିଛି ନ ଥାଏ, ତେଣୁ ସେମାନଙ୍କୁ କିଛି ସୁଯୋଗ ମିଳିବା ଦରକାର।”
ଗମ୍ଭୀର ଆହୁରି ମଧ୍ୟ କହିଛନ୍ତି ଯେ ଏଭଳି ସ୍ଥିତିରେ ବୋଲରଙ୍କ ବୋଲିଂ ପରିସଂଖ୍ୟାନ ଦେଖି ସେମାନଙ୍କ ଦକ୍ଷତା ବିଚାର କରିବା ଉଚିତ ନୁହେଁ। ନୂଆ ବୋଲର ଆକିବ ନବୀଙ୍କ ଡେବ୍ୟୁ ପ୍ରସଙ୍ଗରେ ସେ କହିଛନ୍ତି ଯେ ବୋଲରମାନେ ନିଜ ଯୋଜନା ସଠିକ ଭାବେ କାର୍ଯ୍ୟକାରୀ କରିପାରୁଛନ୍ତି କି ନାହିଁ ତାହା ଦେଖିବା ଗୁରୁତ୍ୱପୂର୍ଣ୍ଣ। କେବଳ ଖରାପ ପରିସଂଖ୍ୟାନ ଦେଖି କଠୋର ହେଲେ ଭବିଷ୍ୟତ ପାଇଁ ଭଲ ବୋଲର ପ୍ରସ୍ତୁତ ହୋଇପାରିବେ ନାହିଁ।
ସିରିଜ ନିର୍ଣ୍ଣାୟକ ମ୍ୟାଚ୍ରେ ଯୁବ ବୋଲର ଆକିବ ନବୀଙ୍କୁ ସୁଯୋଗ ଦେବା ନେଇ ଗମ୍ଭୀର ସ୍ପଷ୍ଟ କରିଛନ୍ତି ଯେ, ଏହା ୨୦୨୭ ODI ବିଶ୍ୱକପ ପ୍ରସ୍ତୁତିର ଏକ ଭାଗ। “ଆମେ ଚାହିଁଥିଲେ ଆକିବଙ୍କୁ ଶେଷ ମ୍ୟାଚ୍ରେ ସୁଯୋଗ ଦେଇପାରିଥାନ୍ତୁ। କିନ୍ତୁ ସିରିଜ ଜିତିବାର ଯେଉଁ ଚାପ ଥାଏ, ତାହା ଡେଡ ରବର ମ୍ୟାଚ୍ରେ ନଥାଏ। ବିଶ୍ୱକପ ସମ୍ପୂର୍ଣ୍ଣ ଚାପର ଖେଳ। ସେହିପରି ଗୁରନୁରଙ୍କୁ ମଧ୍ୟ କଠିନ ସ୍ଥିତିରେ ବୋଲିଂ କରାଇ ପରଖିବାକୁ ଚେଷ୍ଟା କରାଯାଉଛି। ଯୁବ ବୋଲରମାନେ ଯେତେ ଅଧିକ ଚାପପୂର୍ଣ୍ଣ ପରିସ୍ଥିତିର ସାମ୍ନା କରିବେ, ଭାରତୀୟ କ୍ରିକେଟ ପାଇଁ ତାହା ସେତେ ଅଧିକ ଲାଭଦାୟକ ହେବ।”
ଉଲ୍ଲେଖଯୋଗ୍ୟ ଯେ, ଏକଦିବସୀୟ କ୍ରିକେଟ ଇତିହାସରେ ୪୦୦ରୁ ଅଧିକ ରନ୍ର ଲକ୍ଷ୍ୟ ସଫଳତାର ସହ ଚେଜ ହେବାରେ ଏହା ମାତ୍ର ଦ୍ୱିତୀୟ ଘଟଣା। ଏହା ପୂର୍ବରୁ ୨୦୦୬ରେ ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ ବିପକ୍ଷରେ ୪୩୮ ରନ୍ର ଲକ୍ଷ୍ୟ ହାସଲ କରିଥିଲା।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
