କେବଳ ଭାରତ ନୁହେଁ, ୧୧ ଦେଶରେ ବି ଲାଗିବ UPI ଚାର୍ଜ: ଅର୍ଥ ମନ୍ତ୍ରଣାଳୟରୁ ଆସିଲା ବଡ଼ ଖବର!

ନୂଆଦିଲ୍ଲୀ,୨୫।୯: ଭାରତରେ UPI ପେମେଣ୍ଟ ଉପରେ ପ୍ରସ୍ତାବିତ ନୂଆ Merchant Discount Rate (MDR)କୁ ନେଇ ବିବାଦ ତୀବ୍ର ହେବାରେ ଲାଗିଛି। ୧୫ ଅକ୍ଟୋବର ୨୦୨୬ରୁ ଲାଗୁ ହେବାକୁ ଥିବା MDRକୁ ନେଇ ଦେଶର ବିଭିନ୍ନ ବ୍ୟବସାୟୀ ସଂଗଠନ ଅସନ୍ତୋଷ ପ୍ରକାଶ କରିଛନ୍ତି। ଏହାର ପ୍ରତିବାଦରେ ଅକ୍ଟୋବର ୨ରେ ‘No UPI Day’ ପାଳନ କରିବାକୁ ବ୍ୟବସାୟୀମାନେ ଘୋଷଣା କରିଛନ୍ତି। ଏହି ଦିନ ଅନେକ ଦୋକାନୀ ଗ୍ରାହକଙ୍କଠାରୁ UPI ମାଧ୍ୟମରେ ପେମେଣ୍ଟ ଗ୍ରହଣ ନକରିବାକୁ ନିଷ୍ପତ୍ତି ନେଇଛନ୍ତି। ଏପରିକି ଦୋକାନରେ ଲାଗିଥିବା UPI QR କୋଡ ଓ ବୋର୍ଡକୁ ହଟାଇବା କିମ୍ବା କଳା କପଡ଼ାରେ ଢାଙ୍କିବାକୁ ମଧ୍ୟ ବ୍ୟବସାୟୀମାନେ ଯୋଜନା କରିଛନ୍ତି।

ଭାରତରେ UPI ପେମେଣ୍ଟ ଉପରେ ୦.୪ ପ୍ରତିଶତ MDRକୁ ନେଇ ବିରୋଧ ଚାଲିଥିବା ବେଳେ ଏବେ ଏହି ନିୟମ ବିଦେଶରେ ମଧ୍ୟ ଲାଗୁ ହେବା ନେଇ ଖବର ଆସିଛି। ଅର୍ଥାତ୍‌ ଯେଉଁ ଦେଶଗୁଡ଼ିକରେ UPI ସେବା ଉପଲବ୍ଧ ରହିଛି, ସେଠାରେ ମଧ୍ୟ ନୂଆ MDR ବ୍ୟବସ୍ଥା ଲାଗୁ କରାଯିବ ବୋଲି ସୂଚନା ମିଳିଛି। ଏହି ତାଲିକାରେ UAE, ଫ୍ରାନ୍ସ, ସିଙ୍ଗାପୁର, ଭୁଟାନ, ନେପାଳ, ଶ୍ରୀଲଙ୍କା, ମରିସସ, କତାର, କାମ୍ବୋଡିଆ, ଗ୍ରୀସ ଓ ମାଲଦ୍ୱୀପ ଭଳି ଦେଶ ରହିଛନ୍ତି।

ସୂଚନା ଅନୁସାରେ, UPI ଇକୋସିଷ୍ଟମ ପାଇଁ ଏକ ଅଧିକ ସ୍ଥାୟୀ ଆର୍ଥିକ ମଡେଲ ତିଆରି କରିବା ହେଉଛି ନୂଆ MDR ବ୍ୟବସ୍ଥାର ମୁଖ୍ୟ ଉଦ୍ଦେଶ୍ୟ। ଏପର୍ଯ୍ୟନ୍ତ ମର୍ଚ୍ଚାଣ୍ଟ ଟ୍ରାଞ୍ଜାକ୍ସନରେ UPI ମୁଖ୍ୟତଃ ଜିରୋ-MDR ବ୍ୟବସ୍ଥାରେ ଚାଲିଆସୁଥିଲା।

ସୂତ୍ର ଅନୁସାରେ, MDRରୁ UPI ଇକୋସିଷ୍ଟମକୁ ପରିଚାଳନା କରିବାର ସମ୍ପୂର୍ଣ୍ଣ ଖର୍ଚ୍ଚ ଭରଣା ହେବ ନାହିଁ। ଷ୍ଟେକହୋଲ୍ଡରମାନଙ୍କ ସହ ଆଲୋଚନା ପରେ Indian Banks’ Association (IBA) ପକ୍ଷରୁ ଏହି ଦର ନିର୍ଦ୍ଧାରଣ କରାଯାଇଥିବା ମଧ୍ୟ କୁହାଯାଇଛି।
ସରକାର ୧୫ ଅକ୍ଟୋବର ୨୦୨୬ର ନିର୍ଦ୍ଧାରିତ ସମୟସୀମାକୁ ଆଗକୁ ବଢ଼ାଇବାର କୌଣସି ଯୋଜନା କରୁନଥିବା ସୂଚନା ମିଳିଛି। ଫଳରେ ନୂଆ MDR ବ୍ୟବସ୍ଥା ନିର୍ଦ୍ଧାରିତ ତାରିଖରୁ ଲାଗୁ ହେବାର ସମ୍ଭାବନା ରହିଛି।