ଚା’-ପକୋଡ଼ି, ପରିବା ବ୍ୟବସାୟୀଙ୍କ ଟେନସନ ବଢ଼ିବ! UPIର ୧ ଲକ୍ଷ ଲିମିଟ୍କୁ ନେଇ ଦେଶରେ ହଇଚଇ
ନୂଆଦିଲ୍ଲୀ, ୧୬।୯: UPI ପେମେଣ୍ଟକୁ ନେଇ ଏବେ ବଡ଼ ଚର୍ଚ୍ଚା। ଦୁଇ ହଜାର ଟଙ୍କାରୁ ଅଧିକ ମର୍ଚ୍ଚାଣ୍ଟ UPI ପେମେଣ୍ଟ ଉପରେ MDR ବା Merchant Discount Rate ଚାର୍ଜ ଲାଗିବା ନେଇ ଖବର ସାମ୍ନାକୁ ଆସିଛି। ଏହି ଚାର୍ଜ ୧୫ ଅକ୍ଟୋବର ୨୦୨୬ରୁ ଲାଗୁ ହେବ ବୋଲି ଦାବି କରାଯାଉଛି। ତେବେ ଚା’-ପକୋଡ଼ି ବିକ୍ରେତା, ପରିବା ବ୍ୟବସାୟୀ, ଛୋଟ ଦୋକାନୀଙ୍କ ଉପରେ ଏହାର ପ୍ରଭାବ ପଡ଼ିବ କି, ତାହାକୁ ନେଇ ପ୍ରଶ୍ନ ଉଠିଛି।
MDR ହେଉଛି ମର୍ଚ୍ଚାଣ୍ଟ ଏବଂ ତାଙ୍କ ବ୍ୟାଙ୍କ ମଧ୍ୟରେ ଲାଗୁଥିବା ଏକ ଚାର୍ଜ। ଦାବି ଅନୁସାରେ, ୨,୦୦୦ ଟଙ୍କା ପର୍ଯ୍ୟନ୍ତର ମର୍ଚ୍ଚାଣ୍ଟ ପେମେଣ୍ଟରେ MDR ଲାଗିବ ନାହିଁ। କିନ୍ତୁ ୨,୦୦୦ ଟଙ୍କାରୁ ଅଧିକ ପେମେଣ୍ଟରେ ସାଧାରଣ କ୍ୟାଟେଗୋରୀ ପାଇଁ ୦.୪ ପ୍ରତିଶତ MDR ଧାର୍ଯ୍ୟ କରାଯାଇଥିବା କୁହାଯାଉଛି।
ନୂଆ ନିୟମ ଅନୁଯାୟୀ MDR ଚାର୍ଜର ହିସାବକୁ ଏଭଳି ବୁଝିହେବ
୩,୦୦୦ ଟଙ୍କାର ପେମେଣ୍ଟ: MDR ୧୨ ଟଙ୍କା
୫୦,୦୦୦ ଟଙ୍କାର ପେମେଣ୍ଟ: MDR ୨୦୦ ଟଙ୍କା
୭୫,୦୦୦ ଟଙ୍କା କିମ୍ବା ତା’ଠାରୁ ଅଧିକ: ସର୍ବାଧିକ MDR ୩୦୦ ଟଙ୍କା ଅର୍ଥାତ୍ ସାଧାରଣ କ୍ୟାଟେଗୋରୀରେ ୧ ଲକ୍ଷ ଟଙ୍କାର UPI ପେମେଣ୍ଟ ହେଲେ ମଧ୍ୟ MDR ୩୦୦ ଟଙ୍କାରୁ ଅଧିକ ହେବ ନାହିଁ ବୋଲି କୁହାଯାଉଛି।
ଛୋଟ ବ୍ୟବସାୟୀଙ୍କୁ MDRରୁ ବାହାରେ ରଖିବା ପାଇଁ ବ୍ୟବସ୍ଥା ଥିବା କୁହାଯାଇଛି। ଯେଉଁ ଦୋକାନୀଙ୍କ QR କୋଡ ମାଧ୍ୟମରେ ମାସକୁ ୧ ଲକ୍ଷ ଟଙ୍କା ପର୍ଯ୍ୟନ୍ତ UPI କାରବାର ଆସେ, ସେମାନଙ୍କୁ Person-to-Person Merchant କ୍ୟାଟେଗୋରୀରେ ରଖାଯିବ ଏବଂ ସେମାନଙ୍କ ଉପରେ MDR ଲାଗିବ ନାହିଁ। ଏଥିପାଇଁ GST ନମ୍ବର ମଧ୍ୟ ଆବଶ୍ୟକ ହେବ ନାହିଁ ବୋଲି ଦାବି ରହିଛି।
ତେବେ ଯଦି କୌଣସି ବ୍ୟବସାୟୀ କ୍ରମାଗତ ତିନି ମାସ ଧରି ମାସକୁ ୧ ଲକ୍ଷ ଟଙ୍କାରୁ ଅଧିକ UPI କାରବାର କରନ୍ତି, ତେବେ ତାଙ୍କୁ ବଡ଼ ମର୍ଚ୍ଚାଣ୍ଟ କ୍ୟାଟେଗୋରୀରେ ରଖାଯାଇପାରେ। ଏହି ନିୟମ ଲାଗୁ ହେଲେ ଛୋଟ ବ୍ୟବସାୟୀ ମଧ୍ୟ ଏହାର ପରିସରକୁ ଆସିପାରନ୍ତି।
ଛୋଟ ବ୍ୟବସାୟୀଙ୍କ UPI କାରବାରକୁ ନେଇ ଉପଲବ୍ଧ ଏକ ରିପୋର୍ଟ ଅନୁସାରେ, ଚା’ ଦୋକାନ, ପାନ ଦୋକାନ, ଠେଲା, କିରାଣା ଦୋକାନ, ମେଡିକାଲ ଷ୍ଟୋର ଓ ଡାଏରୀ ଭଳି ଛୋଟ ବ୍ୟବସାୟୀଙ୍କ ମାସିକ UPI କାରବାର ପ୍ରାୟ ୧ ଲକ୍ଷରୁ ସାଢ଼େ ୩ ଲକ୍ଷ ଟଙ୍କା ମଧ୍ୟରେ ରହିଥାଏ।
ଅନ୍ୟପଟେ, କପଡ଼ା ଶୋ’ରୁମ, ଇଲେକ୍ଟ୍ରୋନିକ୍ସ ଦୋକାନ ଓ ବଡ଼ ରେଷ୍ଟୁରାଣ୍ଟ ଭଳି ମଧ୍ୟମ ବ୍ୟବସାୟୀଙ୍କ UPI କାରବାର ମାସକୁ ପ୍ରାୟ ୫ ଲକ୍ଷରୁ ୧୫ ଲକ୍ଷ ଟଙ୍କା ମଧ୍ୟରେ ଥିବା ଦାବି କରାଯାଇଛି।
ଦେଶରେ ୬.୫ କୋଟିରୁ ଅଧିକ ଛୋଟ-ବଡ଼ ବ୍ୟବସାୟୀ QR କୋଡ ମାଧ୍ୟମରେ UPI ପେମେଣ୍ଟ ଗ୍ରହଣ କରୁଛନ୍ତି ବୋଲି ଉଲ୍ଲେଖ ରହିଛି। ବ୍ୟାଙ୍କ ଏବଂ ଭାରତପେ, ପେଟିଏମ ଭଳି ଲେଣ୍ଡିଂ ପ୍ଲାଟଫର୍ମଗୁଡ଼ିକ ମଧ୍ୟ ଛୋଟ ବ୍ୟବସାୟୀଙ୍କୁ ଋଣ ଦେବା ସମୟରେ UPI କାରବାରକୁ ଏକ ପ୍ରମୁଖ ଆଧାର ଭାବେ ବ୍ୟବହାର କରନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
