ନୂଆଁଖାଇ ପାଇଁ ଚଳଚଞ୍ଚଳ କଳାହାଣ୍ଡି

ନନ୍ଦିଘୋଷ ବ୍ୟୁରୋ : ନୂଆଁଖାଇ ପାଇଁ ଚଳଚଞ୍ଚଳ କଳାହାଣ୍ଡି। କାଲି ନୂଆଁଖାଇ ପାଳିବେ ଗଡ଼ଜାତ ଅଞ୍ଚଳବାସୀ। ଏଥିପାଇଁ ଭବାନୀପାଟଣା ବଜାରରେ ଜମିଛି ତିହରୀ ହାଟ। ଭାଦ୍ରବ ଶୁକ୍ଳପକ୍ଷ ପ୍ରତିପଦାରୁ ଦଶହରା ଦଶମୀ ପର୍ଯ୍ୟନ୍ତ ଭିନ୍ନ ଭିନ୍ନ ପର୍ଯ୍ୟାୟରେ ନୂଆଁଖାଇ ପାଳନ କରାଯାଏ। ଦୁଇଟି ପର୍ଯ୍ୟାୟରେ ଜିଲ୍ଲାର ଅଧାରୁ ଅଧିକ ଲୋକ ନୂଆଁଖାଇ ସାରିଥିବା ବେଳେ, ଆସନ୍ତାକାଲି ଭାଦ୍ରବ ଶୁକ୍ଳପକ୍ଷ ଦଶମୀ ତିଥିରେ ନୂଆଁଖାଇ ପାଳନ କରିବେ ଗଡ଼ଜାତ ଅଞ୍ଚଳବାସୀ। ଏଥିପାଇଁ ସହରର ରାସ୍ତାକଡ଼ରେ ବସିଛି ନୂଆଁଖାଇ ହାଟ। ହାଟରେ ନୂଆ ଧାନ, ନୂଆ ଚାଉଳ, ସାରୁ ଶାଗ, କରଡ଼ି ସହ ବିଭିନ୍ନ ପୂଜା ସାମଗ୍ରୀ ଉପଲବ୍ଧ ରହିଛି। ଏସବୁ ସାମଗ୍ରୀ କିଣିବା ପାଇଁ ହାଟରେ ଗ୍ରାହକଙ୍କ ଭିଡ଼ ଜମିଛି।

ଭାଦ୍ରବ ଶୁକ୍ଳପକ୍ଷ ଦଶମୀ ତିଥିରେ ସକାଳ ୮ଟା ୨୦ରୁ ୯ଟା ୩୦ ମଧ୍ୟରେ କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମା’ ମାଣିକେଶ୍ୱରୀଙ୍କ ନିକଟରେ ନବାନ୍ନ ଲାଗି ହେବ। ଏହାପରେ ମା’ଙ୍କ ମନ୍ଦିରରୁ ନୂଆ ଚୂଡ଼ା ପ୍ରସାଦ ନେବା ପରେ ସକାଳ ୧୦ଟାରୁ ମଧ୍ୟାହ୍ନ ୧୨ଟା ମଧ୍ୟରେ ଘରେ ଘରେ ନୂଆଁଖାଇବେ ଲୋକେ। ଏଥିପାଇଁ ଘରେ ଘରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ନୂଆଁଖାଇ ପାଇଁ ବାହାରେ ରହୁଥିବା ଲୋକେ ମଧ୍ୟ ନିଜ ଗାଁକୁ ବାହୁଡ଼ିଛନ୍ତି। ପର୍ବ ସରିବା ପରେ ବିଭିନ୍ନ ସ୍ଥାନରେ ଆୟୋଜିତ ହେବ ନୂଆଁଖାଇ ଭେଟଘାଟ। ଏଥିପାଇଁ ଲୋକ କଳାକାରମାନେ ମଧ୍ୟ ପ୍ରସ୍ତୁତ ହେଉଛନ୍ତି।