ପାଣି ଫ୍ୟାକ୍ଟେରୀରେ କରେଣ୍ଟ ଝଟକା, ଜୀବନ ସହ ଲଢ଼ୁଛନ୍ତି ଶ୍ରମିକ: ଗେଟ୍‌ରେ ଗଣଧାରଣା

କେସିଙ୍ଗା, ୬।୯ (ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଚାଞ୍ଚେର ପଞ୍ଚାୟତ ଅଧୀନ ଏନ୍‌ଏଚ୍‌-୨୬ ପାର୍ଶ୍ୱରେ ଅବସ୍ଥିତ ଏକ ପାଣି ପାଉଚ୍‌ ଫ୍ୟାକ୍ଟେରୀରେ ଅଭାବନୀୟ ଘଟଣା ଘଟିଛି। ବିଦ୍ୟୁତ୍ ଆଘାତରେ ଜଣେ ଶ୍ରମିକ ଗୁରୁତର ଆହତ ହୋଇ ଜୀବନମୃତ୍ୟୁ ସହ ସଂଘର୍ଷ କରୁଥିବା ଜଣାପଡ଼ିଛି।

ଉତ୍କେଲା ଗ୍ରାମପଞ୍ଚାୟତ ଅଧୀନ ଗୁଞ୍ଜେରମାଲ ଗ୍ରାମର କ୍ଷେତ୍ର ନାଏକ (୨୩) ପ୍ରାୟ ଦୁଇ ବର୍ଷ ଧରି ଉକ୍ତ ଫ୍ୟାକ୍ଟେରୀରେ କାମ କରୁଥିଲେ। ଗତ ଗୁରୁବାର ସକାଳ ପ୍ରାୟ ୮ଟା ସମୟରେ ସେ ବିଦ୍ୟୁତ୍ ଆଘାତର ଶିକାର ହୋଇଥିଲେ। ଏଥିରେ ତାଙ୍କ ହାତ ଓ ଛାତି ଜଳିପୋଡ଼ି ଯାଇଥିବା ବେଳେ ସେ ଗୁରୁତର ଆହତ ହୋଇଥିଲେ।

ପ୍ରଥମେ ତାଙ୍କୁ ଭବାନୀପାଟଣା ହସ୍ପିଟାଲକୁ ନିଆଯାଇଥିଲା। ପରେ ଅବସ୍ଥା ଅତି ସଙ୍କଟାପନ୍ନ ହେବାରୁ ତାଙ୍କୁ ବୁର୍ଲା ମେଡିକାଲକୁ ରେଫର କରାଯାଇଥିଲା। ସେଠାରୁ ମଧ୍ୟ ଅଧିକ ଚିକିତ୍ସା ପାଇଁ ରାଉରକେଲାକୁ ସ୍ଥାନାନ୍ତର କରାଯାଇଥିବା ପରିବାର ଲୋକେ ସୂଚନା ଦେଇଛନ୍ତି।

ଫ୍ୟାକ୍ଟେରୀ ପକ୍ଷରୁ ଚିକିତ୍ସା ବ୍ୟବସ୍ଥାରେ ଅବହେଳା କରାଯାଇଥିବା ନେଇ ଆହତ ଶ୍ରମିକଙ୍କ ପରିବାର ଲୋକେ ଅଭିଯୋଗ କରିଛନ୍ତି। ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଘଟଣାର ଚାରି ଦିନ ବିତିଯାଇଥିଲେ ମଧ୍ୟ କମ୍ପାନୀ ପକ୍ଷରୁ ଚିକିତ୍ସା ଖର୍ଚ୍ଚ କିମ୍ବା ଅନ୍ୟ କୌଣସି ସହାୟତା ପ୍ରତି ଗୁରୁତ୍ୱ ଦିଆଯାଇନାହିଁ।

ଏହାକୁ ନେଇ ଶନିବାର ଗ୍ରାମବାସୀ ଓ ପରିବାର ଲୋକେ ଫ୍ୟାକ୍ଟେରୀ ସମ୍ମୁଖରେ ଗଣଧାରଣା ଦେଇଥିଲେ। ଶନିବାର ମଧ୍ୟ ଗୁଞ୍ଜେରମାଲ ଗ୍ରାମବାସୀ ବୈଶାଳୀ ଫ୍ୟାକ୍ଟେରୀର ମୁଖ୍ୟ ଗେଟ୍‌ ସମ୍ମୁଖରେ ଧାରଣାରେ ବସିଥିଲେ। ଖବର ପାଇ କେସିଙ୍ଗା ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ପକ୍ଷଙ୍କୁ ଡାକି ଆଲୋଚନା କରିବା ସହ ପରିସ୍ଥିତିକୁ ଶାନ୍ତ କରିଥିଲା।

ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଫ୍ୟାକ୍ଟେରୀ ମାଲିକ ଆହତ ଶ୍ରମିକଙ୍କ ଚିକିତ୍ସା ପ୍ରତି ଅବହେଳା କରିଛନ୍ତି। ଆହତ ଶ୍ରମିକ ଆୟୁଷ୍ମାନ କାର୍ଡ ମାଧ୍ୟମରେ ଚିକିତ୍ସିତ ହେଉଥିବା ପରିବାର ଲୋକେ ପ୍ରକାଶ କରିଛନ୍ତି। ଶ୍ରମିକଙ୍କ ଚିକିତ୍ସା ବାବଦରେ ଯେତିକି ଖର୍ଚ୍ଚ ହେବ, ତାହା ଫ୍ୟାକ୍ଟେରୀ ମାଲିକ ବହନ କରିବେ ବୋଲି ତଦନ୍ତକାରୀ ପୋଲିସ ଅଧିକାରୀ ଅରକ୍ଷିତ ମାଝୀ ସୂଚନା ଦେଇଥିବା ଜଣାପଡ଼ିଛି।

ତେବେ ଘଟଣା ସମୟରେ ସାମ୍ବାଦିକମାନଙ୍କୁ ଫ୍ୟାକ୍ଟେରୀ ଭିତରକୁ ପ୍ରବେଶ ପାଇଁ ବାରଣ କରାଯାଇଥିବା ନେଇ ମଧ୍ୟ ଅଭିଯୋଗ ହୋଇଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି ହୋଇଛି। ଫ୍ୟାକ୍ଟେରୀ ଭିତରେ କୌଣସି ଅବ୍ୟବସ୍ଥା କିମ୍ବା ସୁରକ୍ଷା ତ୍ରୁଟି ଲୁଚାଇବା ପାଇଁ ସାମ୍ବାଦିକମାନଙ୍କୁ ପ୍ରବେଶ କରିବାକୁ ବାରଣ କରାଯାଇଥିଲା କି, ସେନେଇ ଲୋକେ ପ୍ରଶ୍ନ ଉଠାଇଛନ୍ତି।

ଘଟଣାର ସଠିକ୍ ତଦନ୍ତ କରି ଦୋଷୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ସହ ଆହତ ଶ୍ରମିକଙ୍କୁ ଆବଶ୍ୟକ ଅନୁଯାୟୀ କ୍ଷତିପୂରଣ ଓ ଉପଯୁକ୍ତ ଚିକିତ୍ସା ସହାୟତା ଯୋଗାଇଦେବାକୁ ପରିବାର ଲୋକେ ଓ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି।