ବିମାନରେ ଯାନ୍ତ୍ରିକ ତ୍ରୁଟି ! ଜୟପୁରରେ କଲା ଜରୁରୀକାଳୀନ ଅବତରଣ, ୧୪୦ ଯାତ୍ରୀ ସୁରକ୍ଷିତ

ନନ୍ଦିଘୋଷ ବ୍ୟୁରୋ : ଜୟପୁରରୁ ଆସିଛି ବଡ଼ ଖବର। ଏୟାର ଇଣ୍ଡିଆର ଏକ ବିମାନ ଜୟପୁର ବିମାନବନ୍ଦରରେ ଜରୁରୀକାଳୀନ ଅବତରଣ କରିଛି। ଭୋପାଳରୁ ଦିଲ୍ଲୀ ଯାଉଥିବା ଏୟାର ଇଣ୍ଡିଆର AI-1886 ବିମାନକୁ ମଝି ଆକାଶରେ ସମସ୍ୟା ଦେଖାଦେବା ପରେ ଜୟପୁର ଅଭିମୁଖେ ଡାଇଭର୍ଟ କରାଯାଇଥିଲା। ସୂଚନା ଅନୁଯାୟୀ, ବିମାନରେ ପ୍ରାୟ ୧୪୦ ଜଣ ଯାତ୍ରୀ ଥିଲେ। ଉଡ଼ାଣ ସମୟରେ ବିମାନରେ ଯାନ୍ତ୍ରିକ ସମସ୍ୟା ଦେଖାଦେବା ନେଇ ସୂଚନା ମିଳିବା ପରେ ପାଇଲଟ୍ ସତର୍କତାମୂଳକ ପଦକ୍ଷେପ ନେଇଥିଲେ। ବିମାନଟିକୁ ଜୟପୁର ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଥିଲା। ସୌଭାଗ୍ୟବଶତଃ ବିମାନଟି ସୁରକ୍ଷିତ ଭାବେ ଲ୍ୟାଣ୍ଡ କରିଥିଲା। ପରେ ସମସ୍ତ ଯାତ୍ରୀଙ୍କୁ ବିମାନରୁ ବାହାର କରାଯାଇ ଆଗମନ ହଲ୍‌କୁ ନିଆଯାଇଥିଲା। ତେବେ ବିମାନର ଇଞ୍ଜିନ୍ ଫେଲ୍ ହୋଇଥିଲା କି ଅନ୍ୟ କୌଣସି ଯାନ୍ତ୍ରିକ ତ୍ରୁଟି ଯୋଗୁଁ ବିମାନକୁ ଡାଇଭର୍ଟ କରାଯାଇଥିଲା, ସେନେଇ ଏପର୍ଯ୍ୟନ୍ତ ସରକାରୀ ଭାବେ ସ୍ପଷ୍ଟ ହୋଇନାହିଁ। ବର୍ତ୍ତମାନ ଏୟାର ଇଣ୍ଡିଆର ଇଞ୍ଜିନିୟରିଂ ଟିମ୍ ବିମାନର ସମ୍ପୂର୍ଣ୍ଣ ଯାଞ୍ଚ କରୁଛନ୍ତି। ଯାଞ୍ଚ ଶେଷ ହେବା ପରେ ହିଁ ବିମାନଟି ପୁଣି ଉଡ଼ାଣ ପାଇଁ ଅନୁମତି ପାଇବ।

ସୂଚନା ଅନୁଯାୟୀ, AI-1886 ବିମାନଟି ସକାଳ ୮ଟା ୪୭ ମିନିଟ୍‌ରେ ଭୋପାଳର ରାଜା ଭୋଜ ବିମାନବନ୍ଦରରୁ ଦିଲ୍ଲୀ ଅଭିମୁଖେ ଉଡ଼ାଣ କରିଥିଲା। ଏହା ସକାଳ ୯ଟା ୫୫ ମିନିଟ୍‌ରେ ଦିଲ୍ଲୀରେ ପହଞ୍ଚିବାର କାର୍ଯ୍ୟକ୍ରମ ଥିଲା। କିନ୍ତୁ ମଝି ଆକାଶରେ ସମସ୍ୟା ଦେଖାଦେବା ପରେ ବିମାନଟିକୁ ଜୟପୁର ଅଭିମୁଖେ ପଠାଯାଇଥିଲା। ଜୟପୁରରେ ଘଟିଥିବା AI-1886 ବିମାନ ଘଟଣାର ପ୍ରକୃତ କାରଣ ଇଞ୍ଜିନିୟରିଂ ଟିମ୍‌ର ଯାଞ୍ଚ ପରେ ସ୍ପଷ୍ଟ ଜଣାପଡିବ ।