ରେମାଳ ନଦୀର ପ୍ରଖର ସୁଅରେ ଭାସିଗଲେ ଯୁବତୀ: ମିଳୁନି ପତ୍ତା, କେଶଦୁରାପାଳ ଗାଁରେ ଶୋକାକୂଳ…

ଆନନ୍ଦପୁର, ୨୮।୭(ସୁଶାନ୍ତ କୁମାର ସାହୁ): ଲଗାଣ ବର୍ଷା ଯୋଗୁ ଫୁଲିଉଠିଥିବା ରେମାଳ ନଦୀରେ ଭାସିଯାଇ ଜଣେ ୨୫ ବର୍ଷୀୟା ଯୁବତୀ ନିଖୋଜ ହୋଇଯାଇଛନ୍ତି। ଘସିପୁରା ବ୍ଲକ୍ ଅନ୍ତର୍ଗତ କେଶଦୁରାପାଳ ଗାଁରେ ଏହି ଅଭାବନୀୟ ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ନିଖୋଜ ଯୁବତୀଜଣକ କେଶଦୁରାପାଳ ଗ୍ରାମର କୁଣ୍ଡି ସାହିର କୁଳମଣି ପାତ୍ରଙ୍କ ଝିଅ ସବିତା ପାତ୍ର ବୋଲି ଜଣାପଡ଼ିଛି।

ପ୍ରାପ୍ତ ସୂଚନା ଅନୁଯାୟୀ, ଗତ ଦୁଇ ଦିନ ଧରି ହେଉଥିବା ପ୍ରବଳ ବର୍ଷା ଯୋଗୁ ରେମାଳ ଡ୍ୟାମର ଜଳସ୍ତର ବିପଦ ସଙ୍କେତ ଉପରକୁ ଚାଲିଯାଇଥିଲା। ଫଳରେ ମଙ୍ଗଳବାର ସକାଳୁ ଡ୍ୟାମ୍ କର୍ତ୍ତୃପକ୍ଷ ଗେଟ୍ ଖୋଲିବା ପରେ ରେମାଳ ନଦୀରେ ହଠାତ୍ ଜଳସ୍ତର ବୃଦ୍ଧି ପାଇ ପ୍ରବଳ ସୁଅ ସୃଷ୍ଟି ହୋଇଥିଲା। ଏହି ସମୟରେ ସବିତା ଘର ନିକଟ ନଦୀ କୂଳକୁ ଶୌଚ ପାଇଁ ଯାଇଥିବା ବେଳେ ହଠାତ୍ ବଢ଼ିଆସିଥିବା ପ୍ରଖର ସୁଅରେ ଭାରସାମ୍ୟ ହରାଇ ନଦୀରେ ଖସିପଡ଼ିଥିଲେ ଏବଂ ମୂର୍ତ୍ତିମାନ ଜଳସ୍ରୋତରେ ଭାସି ଯାଇଥିଲେ।

ସବିତାଙ୍କ ଆର୍ତ୍ତନାଦ ଶୁଣି ଗ୍ରାମର କିଛି ଯୁବକ ତାଙ୍କୁ ଉଦ୍ଧାର କରିବା ପାଇଁ ନଦୀ କୂଳେ କୂଳେ ଦୌଡ଼ିଥିଲେ ହେଁ ନଦୀରେ ଥିବା ପ୍ରବଳ ସୁଅ ଏବଂ ଘୂର୍ଣ୍ଣିବଳୟ ଯୋଗୁ ସାହସ କରି ଆଗକୁ ଯାଇପାରି ନ ଥିଲେ। ଯୁବତୀଜଣକ ସ୍ରୋତରେ ଭାସିଯାଉଥିବା ସମୟରେ ବଞ୍ଚାଇବା ପାଇଁ ହାତ ଟେକି ଇସାରା ଦେଉଥିଲେ ମଧ୍ୟ କାହାକୁ ସଫଳତା ମିଳି ନ ଥିଲା। ଘଟଣାସ୍ଥଳରେ ଗ୍ରାମବାସୀ ପ୍ରାୟ ଏକ ଘଣ୍ଟା ଧରି ଖୋଜାଖୋଜି କରିଥିଲେ। ଖବର ପାଇ ଆନନ୍ଦପୁର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଦୁଇ ଘଣ୍ଟା ବ୍ୟାପୀ ଉଦ୍ଧାର କାର୍ଯ୍ୟ ଜାରି ରଖିଥିଲେ ସୁଦ୍ଧା ବର୍ତ୍ତମାନ ସୁଦ୍ଧା ଯୁବତୀଙ୍କର କୌଣସି ପତ୍ତା ମିଳିପାରି ନାହିଁ।

ଡ୍ୟାମ୍ ଗେଟ୍ ଖୋଲିବା ପୂର୍ବରୁ ପ୍ରଶାସନ ପକ୍ଷରୁ ସଠିକ୍ ଭାବେ ସତର୍କ ସୂଚନା ବା ମାଇକିଂ କରାଯାଇ ନଥିବାରୁ ଏଭଳି ଅଘଟଣ ଘଟିଲା ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏହି ଦୁଃଖଦ ଘଟଣା ପରେ ପରିବାରବର୍ଗଙ୍କୋ କାନ୍ଦବୋବାଳିରେ ସାରା ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି।