୩ ଦିନ ଧରି ଚାଲିଥିବା ଅଙ୍ଗନ କି ଉତ୍ସବ ଉଦଯାପିତ, ଶିଶୁ ତଥା ଅଭିଭାବକଙ୍କୁ ନେଇ ସରିଲା କାର୍ଯ୍ୟକ୍ରମ

ଦାରିଙ୍ଗବାଡି, ୨୯।୯ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସମନ୍ବିତ ଶିଶୁ ଓ ମହିଳା ବିକାଶ କାର୍ଯ୍ୟାଳୟର ସିଡିପିଓ ସାଂରାଣୀ ପଣ୍ଡାଙ୍କ ତତ୍ୱାବଧାନରେ, ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ବିଭିନ୍ନ ଅଙ୍ଗନାୱାଡି କେନ୍ଦ୍ରରେ ଚାଲିଥିଲା ଅଙ୍ଗନ କି ଉତ୍ସବ। ଗତ ୩ ଦିନ ହେଲା ଏହା ଚାଲିଥିବା ବେଳେ ତାହା ମଙ୍ଗଳବାର ଉଦଯାପିତ ହୋଇଯାଇଛି। ଏହି ପ୍ରରିପ୍ରେକ୍ଷୀରେ ଅଙ୍ଗନବାଡି କେନ୍ଦ୍ରରେ ଶିଶୁଙ୍କ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସହ ସେମାନଙ୍କ ଯତ୍ନ, ଅପପୃଷ୍ଟି ରୋକିବା ପାଇଁ ନିଆଯାଉଥିବା ପଦକ୍ଷେପ ସମ୍ପର୍କରେ ଅଭିଭାବକଙ୍କୁ ଅବଗତ କରାଯାଇଥିଲା ସେହିପରି ପୁଷ୍ଟିକର ଖାଦ୍ୟ ରୋଷେଇକୁ ନେଇ ଶିଶୁଙ୍କ ପିତାଙ୍କୁ ନେଇ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହାଦ୍ୱାରା ଶିଶୁଙ୍କ ଯତ୍ନ କେବଳ ଅଙ୍ଗନାୱାଡି କେନ୍ଦ୍ରର କର୍ମୀ ନୁହେଁ ଅଭିଭାବକଙ୍କ ମଧ୍ୟ ଏ ସମ୍ପର୍କରେ ବ୍ୟାପକ ସଚେତନ ଓ ଦକ୍ଷତା ବୃଦ୍ଧି ପାଇଁ ଏହି ପ୍ରତିଯୋଗିତା କରାଯାଇଥିବା ସିଡିପିଓ ସାଂରାଣୀ ପଣ୍ଡା କହିଛନ୍ତି। ସେହିପରି ଶ୍ରାନିକେତା ଅଙ୍ଗନାୱାଡି କେନ୍ଦ୍ରରେ ଉଦଯାପନୀ ଉତ୍ସବରେ ଭାଜପାର ବରିଷ୍ଠ ନେତା ବିଷ୍ଣୁ ଚରଣ ପ୍ରଧାନଙ୍କ ସମେତ ହରେନ ସାହୁ, ପ୍ରଭାକର ସାହୁ, ମିନକେତନ ସାହୁ, ସଞ୍ଜୀବ ବେହେରା ପ୍ରମୁଖ ପହଞ୍ଚି ଶିଶୁ ଓ ଅଭିଭାବକଙ୍କୁ ଉତ୍ସାହିତ କରିବା ସହ ଅଙ୍ଗନାୱାଡି କର୍ମୀ, ସହାୟିକା ଓ ଆଶା କର୍ମୀଙ୍କୁ ସମ୍ବର୍ଦ୍ଧିତ କରିଥିବା ଜଣାପଡିଛି। ସୂଚନାଯୋଗ୍ୟ, ଏବେ ସେବା ସଂକଳ୍ପ ଅଭିଯାନ ମାଧ୍ୟମରେ ଶିକ୍ଷାନୁଷ୍ଠାନ ଗୁଡିକରେ ବିଭିନ୍ନ କାର୍ଯ୍ୟକ୍ରମ ଓ ପ୍ରତିଯୋଗିତା କରାଯାଇ ଛାତ୍ରୀଛାତ୍ର, ଶିଶୁଙ୍କ ଦକ୍ଷତା ବୃଦ୍ଧି ଓ ଲୁକ୍କାୟିତ ପ୍ରତିଭାକୁ ଲୋକ ଲୋଚନକୁ ଆଣିବାକୁ ପ୍ରୟାସ କରାଯାଉଥିବା ଜଣାପଡିଛି।