ଗାନ୍ଧିଜୀ ଏବଂ ଶାସ୍ତ୍ରୀ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇଲେ ରାଜ୍ୟପାଳ , ମୁଖ୍ୟମନ୍ତ୍ରୀଙ୍କ ସହ ନେତୃବୃନ୍ଦ

ଭୁବନେଶ୍ୱର: ଆଜି ଗାନ୍ଧୀ ଜୟନ୍ତୀ ଏବଂ ଶାସ୍ତ୍ରୀ ଜୟନ୍ତୀ ଅବସରରେ ଭୁବନେଶ୍ୱର ସ୍ଥିତ ଓଡ଼ିଶା ବିଧାନସଭା ପରିସରରେ ଆୟୋଜିତ କାର୍ଯ୍ୟକ୍ରମରେ ରାଜ୍ୟପାଳ ଡ. ହରି ବାବୁ କମ୍ଭମପତି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ବାଚସ୍ପତି ସୁରମା ପାଢ଼ୀ ଜାତିର ପିତା ମହାତ୍ମା ଗାନ୍ଧୀ ଓ ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ମହାତ୍ମା ଗାନ୍ଧୀ ଏବଂ ଲାଲ ବାହାଦୁର ଶାସ୍ତ୍ରୀଙ୍କ ବଳିଦାନ, ମୂଲ୍ୟବୋଧ ଏବଂ ଜନସେବା ଭାରତୀୟମାନଙ୍କୁ ସର୍ବଦା ପ୍ରେରଣା ଯୋଗାଉଛି । ଗାନ୍ଧୀଜୀ କେବଳ ଭାରତର ସ୍ୱାଧୀନତା ସଂଗ୍ରାମରେ କେନ୍ଦ୍ରୀୟ ଭୂମିକା ଗ୍ରହଣ କରିନଥିଲେ, ବରଂ ବିଶ୍ୱକୁ ନୈତିକତା, ସତ୍ୟାଗ୍ରହ ଏବଂ ଅସହଯୋଗର ବାର୍ତ୍ତା ମଧ୍ୟ ଦେଇଥିଲେ । ମୁଖ୍ୟମନ୍ତ୍ରୀଙ୍କ ଅନୁଯାୟୀ, ସମାଜର ତଳସ୍ତରର ଲୋକଙ୍କ ସେବା କରିବା, ସ୍ୱଚ୍ଛତା ବଜାୟ ରଖିବା ଏବଂ ସ୍ୱଦେଶୀ ଦ୍ରବ୍ୟର ପ୍ରଚାର ଉପରେ ଗାନ୍ଧୀଜୀ ଗୁରୁତ୍ୱାରୋପ କରିଥିଲେ । ଏହି ଆଦର୍ଶଗୁଡ଼ିକୁ ସ୍ୱଚ୍ଛ ଭାରତ ମିଶନ, ଆତ୍ମନିର୍ଭର ଭାରତ ଏବଂ ଅନ୍ତ୍ୟୋଦୟ ଭଳି କଲ୍ୟାଣକାରୀ ଯୋଜନା ମାଧ୍ୟମରେ ଆଗକୁ ନିଆଯାଉଛି । ଲାଲ ବାହାଦୁର ଶାସ୍ତ୍ରୀଙ୍କୁ ସ୍ମରଣ କରି ମୁଖ୍ୟମନ୍ତ୍ରୀ ତାଙ୍କ ସରଳ ଜୀବନଶୈଳୀ, ସାଧୁତା ଏବଂ ଜନସେବା ପ୍ରତି ଥିବା ପ୍ରତିବଦ୍ଧତା ଉପରେ ଆଲୋକପାତ କରିଥିଲେ। ସେ ଶାସ୍ତ୍ରୀଜୀଙ୍କ ଲୋକପ୍ରିୟ ସ୍ଲୋଗାନ ଜୟ ଜବାନ, ଜୟ କିସାନକୁ ମନେ ପକାଇ କହିଥିଲେ ଯେ, ଏହା ଭାରତୀୟଙ୍କ ମଧ୍ୟରେ ଦାୟିତ୍ୱବୋଧ ଏବଂ ନୂତନ ଶକ୍ତିର ସଞ୍ଚାର କରିଥିଲା । ଉଭୟ ମହାପୁରୁଷଙ୍କ ନୀତି ଓ ଆଦର୍ଶରୁ ପ୍ରେରଣା ନେଇ ଏକ ସମୃଦ୍ଧ ଓଡ଼ିଶା ଓ ବିକଶିତ ଭାରତ ଗଠନ ପାଇଁ ରାଜ୍ୟ ସରକାର ଉଦ୍ୟମ ଜାରି ରଖିବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ । ଏହି ପବିତ୍ର ଦିବସ ପାଳନ ଅବସରରେ ସୂଚନା ଏବଂ ଲୋକସମ୍ପର୍କ ବିଭାଗ ପକ୍ଷରୁ ବିଧାନସଭା ପରିସରରେ ଏକ ସର୍ବଧର୍ମ ପ୍ରାର୍ଥନା ସଭା ଆୟୋଜିତ ହୋଇଥିଲା ।