5 Bedtime Yoga Poses: ନିଦ୍ରା ଆସୁନି? ଆପଣାନ୍ତୁ ଏହି ସହଜ ଉପାୟ; ଶୋଇବା ପୂର୍ବରୁ କରନ୍ତୁ ଏହି ୫ଟି ଯୋଗାସନ, ମିଳିବ ଆରାମ

ଦିନଭରିର ବ୍ୟସ୍ତତା, କାମର ଚାପ, ଲଗାତାର ସ୍କ୍ରିନ୍ ଦେଖିବା ଅଭ୍ୟାସ ଏବଂ ପରିବାରର ଦାୟିତ୍ୱ ମଧ୍ୟରେ ଶରୀର ସହ ମନ ମଧ୍ୟ ଥକିଯାଏ। ଅନେକ ସମୟରେ ଶରୀର ଥକି ଯାଇଥିଲେ ମଧ୍ୟ ରାତିରେ ବିଛଣାକୁ ଯିବା ପରେ ମନ ଶାନ୍ତ ହୋଇପାରେ ନାହିଁ। ଚିନ୍ତା, ଚାପ ଓ ଦିନଭରିର କଥା ମନରେ ଘୁରିବାକୁ ଲାଗେ।

ଏଭଳି ସ୍ଥିତିରେ ଶୋଇବା ପୂର୍ବରୁ କିଛି ମିନିଟ୍‌ର ହାଲୁକା ଯୋଗ ଶରୀର ଓ ମନକୁ ଆରାମ ଦେବାରେ ସହାୟକ ହୋଇପାରେ। ରାତି ସମୟରେ ଯୋଗର ଉଦ୍ଦେଶ୍ୟ କଠିନ ଆସନ କରିବା ନୁହେଁ, ବରଂ ଶରୀରକୁ ରିଲାକ୍ସ କରିବା ଏବଂ ମନକୁ ଶାନ୍ତ କରିବା ହେବା ଉଚିତ। ତେବେ ଶାରୀରିକ କ୍ଷମତା ଅନୁସାରେ ଯୋଗ କରିବା ଜରୁରୀ। କୌଣସି ଚୋଟ, ଗୁରୁତର ଯନ୍ତ୍ରଣା କିମ୍ବା ସ୍ୱାସ୍ଥ୍ୟ ସମସ୍ୟା ଥିଲେ ବିଶେଷଜ୍ଞଙ୍କ ପରାମର୍ଶ ନେବା ଭଲ।

ବାଳାସନ: ଶରୀରକୁ ଦିଏ ଆରାମ

ବାଳାସନ ଏକ ସହଜ ଓ ଆରାମଦାୟକ ଯୋଗାସନ। ଏଥିରେ ଶରୀରକୁ ଆଗକୁ ନୁଆଇ ବିଶ୍ରାମ ଅବସ୍ଥାରେ ରଖାଯାଏ। ଦିନଭରିର ଥକାପଣ ପରେ କିଛି ସମୟ ବାଲାସନରେ ରହିବା ଶରୀରକୁ ଶାନ୍ତ ଅନୁଭବ କରାଇପାରେ। ଏହି ସମୟରେ ନିଜ ଶ୍ୱାସ ଉପରେ ଧ୍ୟାନ ଦେବା ଉଚିତ।

ମାର୍ଜରୀ ଆସନ ଓ ବିଟିଲାସନ

ଦୀର୍ଘ ସମୟ ଧରି କମ୍ପ୍ୟୁଟର କିମ୍ବା ଚେୟାରରେ ବସି କାମ କଲେ ପିଠି ଓ କାନ୍ଧରେ ଜକଡ଼ା ଅନୁଭବ ହୋଇପାରେ। ମାର୍ଜରୀ ଆସନ ଓ ବିଟିଲାସନର ହାଲୁକା ଅଭ୍ୟାସ ମେରୁଦଣ୍ଡକୁ ଆରାମ ଦେବାରେ ସହାୟକ ହୋଇପାରେ। ଏହାକୁ ଧୀରେ ଧୀରେ କରିବା ଉଚିତ।

ସୁପ୍ତ ବଦ୍ଧ କୋଣାସନ

ଏହି ଆସନରେ ପିଠି ଉପରେ ଶୋଇ ପାଦର ତଳକୁ ଏକାଠି କରାଯାଏ ଏବଂ ଆଣ୍ଠୁକୁ ଆରାମରେ ଦୁଇ ପଟକୁ ଖୋଲାଯାଏ। ଏହା ଏକ ଶାନ୍ତ ଓ ଆରାମଦାୟକ ମୁଦ୍ରା, ଯାହାକୁ ରାତିର ବିଶ୍ରାମ ରୁଟିନ୍‌ରେ ସାମିଲ କରାଯାଇପାରେ। ଆବଶ୍ୟକ ହେଲେ ଆଣ୍ଠୁ ତଳେ କୁଶନ୍ ରଖିପାରିବେ।

ବିପରୀତ କରଣୀ: ପାଦକୁ ଦିଅନ୍ତୁ ଆରାମ

ଦିନଭରି ଅଧିକ ସମୟ ଠିଆ ରହିବା କିମ୍ବା ଚାଲିବା ପରେ ପାଦରେ ଥକାପଣ ଅନୁଭବ ହୋଇପାରେ। ବିପରୀତ କରଣୀ ଆସନରେ ପିଠି ଉପରେ ଶୋଇ ପାଦକୁ କାନ୍ଥର ସାହାଯ୍ୟରେ ଉପରକୁ ରଖାଯାଏ। କିଛି ସମୟ ଏଭଳି ରହି ଧୀରେ ଧୀରେ ଶ୍ୱାସ ନେବା ଆରାମ ଦେଇପାରେ।

ଶବାସନ: ଶାନ୍ତିରେ ଶେଷ କରନ୍ତୁ ଦିନ

ଶୋଇବା ପୂର୍ବରୁ ଶବାସନ ସବୁଠାରୁ ସହଜ ଯୋଗ ଅଭ୍ୟାସ ମଧ୍ୟରୁ ଗୋଟିଏ। ଏଥିରେ ପିଠି ଉପରେ ଶୋଇ ହାତ ଓ ପାଦକୁ ଆରାମଦାୟକ ଅବସ୍ଥାରେ ରଖାଯାଏ। କିଛି ମିନିଟ୍ ପର୍ଯ୍ୟନ୍ତ ଶରୀରର ପ୍ରତ୍ୟେକ ଅଂଶକୁ ଅନୁଭବ କରି ତାହାକୁ ଢିଲା ଛାଡ଼ିବାକୁ ଚେଷ୍ଟା କରନ୍ତୁ। ଏହା ଦିନଭରିର ଚାପ କମାଇ ମନକୁ ଶାନ୍ତ କରିବାରେ ସହାୟକ ହୋଇପାରେ।

ଶୋଇବା ପୂର୍ବରୁ ଏହିଭଳି ହାଲୁକା ଯୋଗ ଅଭ୍ୟାସ ଶରୀରକୁ ଆରାମ ଦେବା ସହ ଭଲ ନିଦ୍ରା ପାଇଁ ଏକ ସୁସ୍ଥ ରୁଟିନ୍ ହୋଇପାରେ।