Ananya Raj Death: ୩୫ ବର୍ଷରେ ଅଭିନେତ୍ରୀ ଅନନ୍ୟା ରାଜଙ୍କ ପରଲୋକ, ମାସେ ପରେ ସାମ୍ନାକୁ ଆସିଲା ଖବର

ମୁମ୍ବାଇ,୧୬।୮: ଅଭିନେତ୍ରୀ ତଥା ସୋସିଆଲ ମିଡିଆ ଷ୍ଟାର ଅନନ୍ୟା ରାଜଙ୍କ ୩୫ ବର୍ଷ ବୟସରେ ଦେହାନ୍ତ ହୋଇଛି । ତାଙ୍କ ମୃତ୍ୟୁର ପ୍ରାୟ ଏକ ମାସ ପରେ ପରିବାର ତାଙ୍କ ଇନଷ୍ଟାଗ୍ରାମ ଆକାଉଣ୍ଟ ଜରିଆରେ ଏହି ଦୁଃଖଦ ଖବର ଦେଇଛନ୍ତି । ପରିବାର ଲୋକଙ୍କ କହିବା ଅନୁସାରେ, ଜୁଲାଇ ୧୫ ତାରିଖ ଭୋର ସମୟରେ ଅନନ୍ୟାଙ୍କ ଦେହାନ୍ତ ହୋଇଥିଲା।

ପରିବାର ପକ୍ଷରୁ କୁହାଯାଇଛି ଯେ ଅନନ୍ୟା ଗତ ଏକ ବର୍ଷରୁ ଅଧିକ ସମୟ ଧରି ଶାରୀରିକ ଓ ମାନସିକ ଭାବେ ଅସୁସ୍ଥ ଥିଲେ। ନିଜ ରୋଗ ସହ ସେ ଜଣେ ଯୋଦ୍ଧା ଭଳି ଲଢ଼େଇ କରିଥିଲେ। ଶେଷରେ ସେ ଶେଷନିଶ୍ବାସ ତ୍ୟାଗ କରିଥିଲେ । ଅନନ୍ୟାଙ୍କ ପରିବାର ଏହି କଷ୍ଟଦାୟକ ସମୟରେ ତାଙ୍କୁ ଗୋପନୀୟତା ଦେବାକୁ ପ୍ରଶଂସକ ଓ ଶୁଭେଚ୍ଛୁମାନଙ୍କୁ ଅନୁରୋଧ କରିଛନ୍ତି । ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରିବାକୁ ମଧ୍ୟ ପରିବାର ପକ୍ଷରୁ ନିବେଦନ କରାଯାଇଛି ।

ଅନନ୍ୟା ରାଜ ହିନ୍ଦୀ ସିନେମା ସହ ଦକ୍ଷିଣ ଭାରତୀୟ ଫିଲ୍ମରେ ମଧ୍ୟ କାମ କରିଥିଲେ। ‘୭ ଆୱର୍ସ ଟୁ ଗୋ’, ‘ଦ ଫାଇନାଲ ଏକ୍ଜିଟ୍’ ଏବଂ ‘ଘୋଷ୍ଟ’ ଭଳି ପ୍ରୋଜେକ୍ଟରେ ତାଙ୍କୁ ଦେଖିବାକୁ ମିଳିଥିଲା। ୨୦୧୬ରେ ରିଲିଜ୍‌ ହୋଇଥିବା ‘୭ ଆୱର୍ସ ଟୁ ଗୋ’ ମାଧ୍ୟମରେ ସେ ବଲିଉଡ୍‌ରେ ଡେବ୍ୟୁ କରିଥିଲେ। ହିନ୍ଦୀ ବ୍ୟତୀତ ସେ ତେଲୁଗୁ ଫିଲ୍ମ ‘ତଗ୍ଗେଡେ ଲେ’ ଏବଂ ‘ଦ ଟ୍ରାଏଲିଙ୍ଗୁଆଲ୍ ମାଦ୍ରାସୀ ଗ୍ୟାଙ୍ଗ’ରେ ମଧ୍ୟ କାମ କରିଥିଲେ । ଫିଲ୍ମ ବ୍ୟତୀତ ସେ ବିଭିନ୍ନ ମ୍ୟୁଜିକ୍ ଭିଡିଓରେ ମଧ୍ୟ ନଜର ଆସିଥିଲେ। ତାଙ୍କ ଦେହାନ୍ତ ଖବର ପ୍ରଶଂସକଙ୍କୁ ଗଭୀର ଭାବେ ମର୍ମାହତ କରିଛି।