BCCIର ବଡ଼ ଘୋଷଣା; ରିଷଭ ପନ୍ତ ନୁହଁନ୍ତି, ଧ୍ରୁବ ଜୁରେଲଙ୍କୁ କରାଗଲା ଅଧିନାୟକ, ଏହା ହେଉଛି କାରଣ
ନୂଆଦିଲ୍ଲୀ,୬।୧୦: ନ୍ୟୁଜିଲାଣ୍ଡ ‘ଏ’ ବିପକ୍ଷରେ ହେବାକୁ ଥିବା ୩ ଟିକିଆ ଅନଅଫିସିଆଲ୍ ଟେଷ୍ଟ ସିରିଜ୍ ପାଇଁ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI) ୧୫ ଜଣିଆ ଇଣ୍ଡିଆ ‘ଏ’ ଟିମ୍ ଘୋଷଣା କରିଛି। ଚୟନକର୍ତ୍ତାମାନେ ଏକ ବଡ଼ ନିଷ୍ପତ୍ତି ନେଇ ଯୁବ ୱିକେଟକିପର-ବ୍ୟାଟର ଧ୍ରୁବ ଜୁରେଲଙ୍କୁ ଦଳର ଅଧିନାୟକ ଭାର ନ୍ୟସ୍ତ କରିଛନ୍ତି। ଦଳରେ କେଏଲ୍ ରାହୁଲ, ଯଶସ୍ବୀ ଜୟସ୍ବାଲ, ଦେବଦତ୍ତ ପାଡିକ୍କଲ ଓ ୱାଶିଂଟନ୍ ସୁନ୍ଦରଙ୍କ ଭଳି ତାରକା ଖେଳାଳି ଥିବା ସତ୍ତ୍ୱେ ଜୁରେଲଙ୍କୁ ଅଧିନାୟକ ମନୋନୀତ କରାଯାଇଛି।
ସେହିପରି ପୂର୍ବତନ ଟେଷ୍ଟ ଉପ-ଅଧିନାୟକ ରିଷଭ ପନ୍ତଙ୍କୁ ମଧ୍ୟ ଏହି ରେଡ୍-ବଲ୍ ସ୍କ୍ୱାଡ୍ରେ ସାମିଲ କରାଯାଇଛି। ତେବେ ତାଙ୍କର ଖେଳିବା ମେଡିକାଲ ଫିଟ୍ନେସ୍ କ୍ଲିୟରାନ୍ସ ଉପରେ ନିର୍ଭର କରିବ, ଯାହା ପାଇଁ ଜୁରେଲଙ୍କୁ ଅଧିନାୟକ କରାଯାଇଛି।
ନ୍ୟୁଜିଲାଣ୍ଡ ବିପକ୍ଷ ସିନିୟର ଟେଷ୍ଟ ସିରିଜ୍ ପୂର୍ବରୁ ସେଠାକାର ପରିସ୍ଥିତି ସହ ଖାପଖୁଆଇବା ପାଇଁ ଅନେକ ନିୟମିତ ଟେଷ୍ଟ ଖେଳାଳିଙ୍କୁ ଏହି ଦଳରେ ସ୍ଥାନ ମିଳିଛି। ବ୍ୟାଟିଂ ବିଭାଗରେ ଉପ-ଅଧିନାୟକ କେଏଲ୍, ଓପନର ଯଶସ୍ବୀ, ଦେବଦତ୍ତ ଓ ସାଇ ସୁଦର୍ଶନ ରହିଛନ୍ତି। ଅଲରାଉଣ୍ଡର ଭାବେ ୱାଶିଂଟନ୍ ଓ ମାନବ ସୁଥାର ସ୍ପିନ୍ ବୋଲିଂ ଭାର ସମ୍ଭାଳିବେ।
ପେସ୍ ବୋଲିଂ ଆକ୍ରମଣରେ ଆକାଶ ଦୀପ, ମୁକେଶ କୁମାର ଓ ଅଂଶୁଲ କମ୍ବୋଜ ସ୍ଥାନ ପାଇଛନ୍ତି। ଘରୋଇ କ୍ରିକେଟ୍ରେ ଭଲ ପ୍ରଦର୍ଶନ ଆଧାରରେ କର୍ଣ୍ଣାଟକର ରବିଚନ୍ଦ୍ରନ୍ ସ୍ମରଣ, ଜମ୍ମୁ-କାଶ୍ମୀରର ଆକିବ ନବୀ, ବିଦର୍ଭର ୟଶ ରାଠୋଡ ଓ ମହାରାଷ୍ଟ୍ରର ମୁକେଶ ଚୌଧୁରୀ ମଧ୍ୟ ଦଳରେ ସ୍ଥାନ ପାଇବାରେ ସଫଳ ହୋଇଛନ୍ତି।
ମ୍ୟାଚ୍ ସୂଚୀ (ନ୍ୟୁଜିଲାଣ୍ଡ ‘ଏ’ ଭର୍ସେସ୍ ଇଣ୍ଡିଆ ‘ଏ’):
-
ପ୍ରଥମ ଅନଅଫିସିଆଲ୍ ଟେଷ୍ଟ: ୨୪ ରୁ ୨୭ ଅକ୍ଟୋବର ୨୦୨୬ — ବର୍ଟ ସଟକ୍ଲିଫ୍ ଓଭାଲ୍, ଲିଙ୍କନ୍
-
ଦ୍ୱିତୀୟ ଅନଅଫିସିଆଲ୍ ଟେଷ୍ଟ: ୩୧ ଅକ୍ଟୋବର ରୁ ୩ ନଭେମ୍ବର ୨୦୨୬ — ହେଗଲେ ଓଭାଲ୍, କ୍ରାଇଷ୍ଟଚର୍ଚ୍ଚ
-
ତୃତୀୟ ଅନଅଫିସିଆଲ୍ ଟେଷ୍ଟ: ୭ ରୁ ୧୦ ନଭେମ୍ବର ୨୦୨୬ — ବର୍ଟ ସଟକ୍ଲିଫ୍ ଓଭାଲ୍, ଲିଙ୍କନ୍
୧୫ ଜଣିଆ ଇଣ୍ଡିଆ ‘ଏ’ ସ୍କ୍ୱାଡ୍: ଧ୍ରୁବ ଜୁରେଲ (ଅଧିନାୟକ/ୱିକେଟକିପର), ଯଶସ୍ବୀ ଜୟସ୍ବାଲ, କେଏଲ୍ ରାହୁଲ, ଦେବଦତ୍ତ ପାଡିକ୍କଲ, ରବିଚନ୍ଦ୍ରନ୍ ସ୍ମରଣ, ରିଷଭ ପନ୍ତ (ୱିକେଟକିପର), ୱାଶିଂଟନ୍ ସୁନ୍ଦର, ଆକିବ ନବୀ, ଆକାଶ ଦୀପ, ଅଂଶୁଲ କମ୍ବୋଜ, ମାନବ ସୁଥାର, ମୁକେଶ ଚୌଧୁରୀ, ସାଇ ସୁଦର୍ଶନ, ୟଶ ରାଠୋଡ, ମୁକେଶ କୁମାର।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
