Case Against Army Officer’s Wife: ଚୀନ୍ ଗୁପ୍ତଚରଙ୍କ ଜାଲରେ ସେନା ଅଧିକାରୀଙ୍କ ପତ୍ନୀ! ସମ୍ବେଦନଶୀଳ ତଥ୍ୟ ଦେଇଥିବା ଅଭିଯୋଗ

ଚୀନ୍‌ର ଗୁପ୍ତଚରଙ୍କ ଜାଲରେ ପଡ଼ିଲେ କି ଜଣେ ବରିଷ୍ଠ ସେନା ଅଧିକାରୀଙ୍କ ପତ୍ନୀ? ଶିକ୍ଷାବିତ୍‌ଙ୍କ ପରିଚୟ ଦେଇ ଯୋଗାଯୋଗ କରୁଥିବା ବିଦେଶୀ ଗୁପ୍ତଚରଙ୍କୁ ଦେଶର ସୁରକ୍ଷା ସମ୍ବନ୍ଧୀୟ ସମ୍ବେଦନଶୀଳ ତଥ୍ୟ ଦେଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ଜମ୍ମୁ-କଶ୍ମୀର ପୋଲିସ ତଦନ୍ତ ଆରମ୍ଭ କରିଛି।

ଅଭିଯୁକ୍ତ ମହିଳାଙ୍କ ଘର ତେଲେଙ୍ଗାନାରେ। ସେ ବର୍ତ୍ତମାନ ଜମ୍ମୁର ଗାନ୍ଧୀ ନଗର ଥାନା ଅଞ୍ଚଳରେ ରହୁଥିବା ଜଣାପଡ଼ିଛି। ତାଙ୍କ ସ୍ୱାମୀ ଜଣେ ବରିଷ୍ଠ ସେନା ଅଧିକାରୀ ବୋଲି ରିପୋର୍ଟରେ କୁହାଯାଇଛି।

ପ୍ରଥମେ ପରିବେଶ, ପରେ ପ୍ରତିରକ୍ଷା ସମ୍ପର୍କିତ ଲେଖା

ପ୍ରାଥମିକ ତଦନ୍ତ ଅନୁଯାୟୀ, କିଛି ଚୀନ୍‌ ଗୁପ୍ତଚର ଶିକ୍ଷାବିତ୍‌ଙ୍କ ପରିଚୟ ଦେଇ ମହିଳାଙ୍କ ସହ ଯୋଗାଯୋଗ କରିଥିବା ସନ୍ଦେହ କରାଯାଉଛି। ପ୍ରଥମେ ସେମାନେ ମହିଳାଙ୍କୁ ପରିବେଶ ଓ ଭୂରାଜନୀତି ସମ୍ପର୍କିତ ବିଷୟରେ ଲେଖା ଲେଖିବାକୁ କହିଥିଲେ। ପରେ ଧୀରେ ଧୀରେ ପ୍ରତିରକ୍ଷା ଓ ରଣନୈତିକ ଗୁରୁତ୍ୱ ଥିବା ବିଷୟ ଉପରେ ଲେଖିବାକୁ କୁହାଯାଇଥିବା ତଦନ୍ତକାରୀ ସଂସ୍ଥା ସନ୍ଦେହ କରୁଛି।

ମହିଳା ଜାଣିଶୁଣି ଏହି ଜାଲରେ ପଡ଼ିଥିଲେ କି ନାହିଁ, ତାହା ଏଯାଏଁ ସ୍ପଷ୍ଟ ହୋଇନାହିଁ। ଗୁପ୍ତ ଦସ୍ତାବିଜ୍‌, ଫଟୋ ଓ ଇଲେକ୍ଟ୍ରୋନିକ୍‌ ତଥ୍ୟ ବିଦେଶୀଙ୍କୁ ପଠାଯାଇଥିବା ନେଇ ମଧ୍ୟ ଅଭିଯୋଗ ରହିଛି।

ଅଫିସିଆଲ୍ ସିକ୍ରେଟ୍ସ ଆକ୍ଟରେ ମାମଲା

ଏହି ଘଟଣାରେ ଗାନ୍ଧୀ ନଗର ଥାନାରେ FIR ନମ୍ବର ୨୯୦/୨୦୨୬ ରୁଜୁ ହୋଇଛି। ଏଥିରେ ଅଫିସିଆଲ୍ ସିକ୍ରେଟ୍ସ ଆକ୍ଟ, ୧୯୨୩ର ଧାରା ୩ ଓ ୫ ସହ ଭାରତୀୟ ନ୍ୟାୟ ସଂହିତା (BNS)ର ଧାରା ୧୫୨ ଓ ୬୧(୨) ଲଗାଯାଇଛି।

ତଦନ୍ତକାରୀ ଅଧିକାରୀମାନେ ମହିଳାଙ୍କ ସହ ବିଦେଶୀ ସମ୍ପର୍କ କିପରି ସ୍ଥାପିତ ହେଲା ଏବଂ ପ୍ରକୃତରେ କେଉଁ ତଥ୍ୟ ଆଦାନପ୍ରଦାନ ହୋଇଛି, ତାହା ଖୋଜୁଛନ୍ତି। ତେବେ ମାମଲାର ତଦନ୍ତ ଚାଲିଥିବାରୁ ଅଭିଯୋଗର ସତ୍ୟତା, ତଥ୍ୟ ହସ୍ତାନ୍ତରର ପରିମାଣ ଓ ବିଦେଶୀ ସମ୍ପର୍କଙ୍କ ପରିଚୟ ସମ୍ପର୍କରେ ପୋଲିସ ପକ୍ଷରୁ ବିସ୍ତୃତ ସୂଚନା ଦିଆଯାଇନାହିଁ।