Elderly Woman Ration Struggle: ମିଳୁନି ଭତ୍ତା କି ମୁଠାଏ ଚାଉଳ, ଗୋଟିଏ ପାଦରେ ସଂଘର୍ଷ କରୁଛନ୍ତି ୮୦ ବର୍ଷୀୟା ବୃଦ୍ଧା

ପେଟରେ ଭୋକର ଦାଉ, ୮୦ ବର୍ଷର କ୍ଷୀଣ ଶରୀର ।

ନିଜର ବୋଲି ଏ ଦୁନିଆରେ ତାଙ୍କର କେହି ନାହିଁ ।

ହେଲେ ବାର୍ଦ୍ଧକ୍ୟର ଯନ୍ତ୍ରଣାଠୁ ଅଧିକ ନିଷ୍ଠୁର ସାଜିଛି ଏ ସରକାରୀ ବ୍ୟବସ୍ଥା ।

ଚାଉଳ ଗଣ୍ଡାଏ ପାଇଁ ଗୋଟିଏ ପାଦରେ ୬ କିଲୋମିଟର ଚାଲି ଚାଲି ଯିବାକୁ ବାଧ୍ୟ ହେଉଛନ୍ତି ଅସହାୟ ବୃଦ୍ଧା ଜଣକ ।

ରାୟଗଡ଼ା ଜିଲ୍ଲା ମୁନିଗୁଡ଼ା ବ୍ଲକ ଅମ୍ଲାଭଟା ପଞ୍ଚାୟତ ବଡ଼କୁମୁଡ଼ାବାଲି ଗାଁର ୮୦ ବର୍ଷୀୟା ସୁନ୍ଦରୀ ବାଗ ।

ସେ ନିଃସହାୟ ଭାବେ ଦୁଃଖକଷ୍ଟରେ ଦିନ କାଟୁଥିବା ବେଳେ ଆଧାର ଲିଙ୍କ୍ ହୋଇନଥିବାରୁ ତାଙ୍କୁ ବାର୍ଦ୍ଧକ୍ୟ ଭତ୍ତା ବି ମିଳୁନି ।

ଶରୀରରେ ବଳ ନାହିଁ, ଗୋଟିଏ ପାଦ ବି ନାହିଁ ।

ହେଲେ ପେଟର ଭୋକ ଆଗରେ ହାର୍ ମାନିଛି ଶାରୀରିକ ଅକ୍ଷମତା ।

ଗୋଟିଏ ପାଦରେ ଆଶାବାଡ଼ି ଧରି ସରକାରୀ ଚାଉଳ ଗଣ୍ଡାକ ପାଇଁ ତାଙ୍କୁ ପ୍ରାୟ ୬ କିଲୋମିଟର ବାଟ ଯାତାୟାତ କରିବାକୁ ପଡ଼ୁଛି ।

ଅଟୋ ଭଡ଼ା ଦେବାକୁ ପାଖରେ ସମ୍ବଳ ନାହିଁ ।

ତା' ଉପରେ ପୁଣି ଦାଉ ସାଧିଛି ସରକାରୀ ନିୟମ ।

ଆଧାର ଲିଙ୍କ୍ ହୋଇନଥିବା ଦର୍ଶାଇ ତାଙ୍କୁ ମାସକର ଭତ୍ତା ଟଙ୍କା ମିଳିନଥିବା ଅଭିଯୋଗ ହୋଇଛି ।

ସରକାରୀ ନିୟମ କହୁଛି, ଏଭଳି ସ୍ଥିତିରେ ନୋମିନି ମାଧ୍ୟମରେ ଚାଉଳ ପହଞ୍ଚାଇବା କଥା ।

ହେଲେ ପ୍ରଶ୍ନ ଉଠୁଛି, କାଗଜପତ୍ରର ଏହି ନିୟମ ସୁନ୍ଦରୀ ବାଗ୍‌ଙ୍କ ସମସ୍ୟାର ସ୍ଥାୟୀ ସମାଧାନ କରିବାରେ କାହିଁକି ଫେଲ୍ ମାରିଛି ?

ଜଣେ ୮୦ ବର୍ଷୀୟା ବୃଦ୍ଧାଙ୍କ ପାଇଁ ସରକାରଙ୍କ ଖାଦ୍ୟ ସୁରକ୍ଷା ଓ ସାମାଜିକ ସୁରକ୍ଷା ଯୋଜନା କେବେ ସୁଗମ ହେବ ଓ ପ୍ରଶାସନ କେବେ ତାଙ୍କ ଦୁଆରେ ସହାୟତା ପହଞ୍ଚାଇବ, ତାହା ଏବେ ବଡ଼ ପ୍ରଶ୍ନବାଚୀ।

Advertisment