ଗୋଡ଼ ଅଚଳ, ହାତରେ ଯାଦୁ; କାଠରେ କଳାର ଜୀବନ ଭରୁଛନ୍ତି ତ୍ରିଲୋଚନ

ନନ୍ଦିଘୋଷ ବ୍ୟୁରୋ : ଭିନ୍ନକ୍ଷମ ହେଲେ ବି ସେ ସକ୍ଷମ। ଗୋଡ଼ ସିନା କାମ କରୁନି, ହେଲେ ହାତର ଯାଦୁରେ ନିଜ ଭାଗ୍ୟ ବଦଳାଇଛନ୍ତି। ଶୁଖିଲା କାଠରେ ଫୁଟାଉଛନ୍ତି ଜୀବନ୍ତ କଳାକୃତି। ଏ ହେଉଛନ୍ତି ପୁରୀ ଜିଲ୍ଲା କାକଟପୁରର ତ୍ରିଲୋଚନ ଓଝା। ମୂଳ ଘର ଯାଜପୁର ଜିଲ୍ଲାରେ। ପେଟ ପାଟଣା ପାଇଁ ଗତ ୧୬ ବର୍ଷ ହେଲା ପରିବାର ସହ କାକଟପୁରରେ ରହୁଛନ୍ତି।  ଗୋଡ଼ରେ ଚାଲିବା ସମ୍ଭବ ନୁହେଁ, ହେଲେ ହାତରେ ରହିଛି ଅପୂର୍ବ କଳାର ଯାଦୁ। ଛେଣୀ ଓ ହାତୁଡ଼ିର ମୁନରେ ଶୁଖିଲା କାଠକୁ ନୂଆ ଜୀବନ ଦେଉଛନ୍ତି ତ୍ରିଲୋଚନ। କାଠ ଉପରେ ତାଙ୍କ ହାତର ସ୍ପର୍ଶରେ ଫୁଟି ଉଠୁଛି ଅପୂର୍ବ କଳାକୃତି। ରାଧାକୃଷ୍ଣଙ୍କଠାରୁ ଆରମ୍ଭ କରି ମହାପ୍ରଭୁ ଜଗନ୍ନାଥ, ମା’ ଲକ୍ଷ୍ମୀ, ଗଣେଶ, ମହାଦେବ ଓ ଦେବଶିଳ୍ପୀ ବିଶ୍ୱକର୍ମାଙ୍କ ଜୀବନ୍ତ ମୂର୍ତ୍ତି ତିଆରି କରୁଛନ୍ତି। କେବଳ ମୂର୍ତ୍ତି ନୁହେଁ, ଖଟ, କବାଟ, ପାଲିଙ୍କି ଓ ବିଭିନ୍ନ ଆସବାବପତ୍ରରେ ଏତେ ସୂକ୍ଷ୍ମ ଡାଳି କାମ କରୁଛନ୍ତି, ଦେଖିଲେ ଲାଗିବ ଯେମିତି ମେସିନରେ ତିଆରି ହୋଇଛି।

କାକଟପୁର ଓ ଅସ୍ତରଙ୍ଗ ଅଞ୍ଚଳର ଅନେକ ଘରେ ରହିଛି ତ୍ରିଲୋଚନଙ୍କ ହାତ ତିଆରି କବାଟ ଓ ମୂର୍ତ୍ତି। ନିଜେ ଚାଲିପାରୁନଥିଲେ ବି ହଜାର ହଜାର ଲୋକଙ୍କ ଘରକୁ ନିଜ କଳାରେ ସଜାଇଛନ୍ତି ସେ। ତାଙ୍କ ପ୍ରତିଭା ଦେଖିଲେ ଲାଗେ, ସତରେ ଯେମିତି ଦେବଶିଳ୍ପୀ ବିଶ୍ୱକର୍ମାଙ୍କ ଆଶୀର୍ବାଦ ରହିଛି ତ୍ରିଲୋଚନଙ୍କ ଉପରେ। ସରକାରୀ ସହାୟତାକୁ ଅପେକ୍ଷା ନକରି ନିଜ ଦକ୍ଷତାକୁ ସାଥୀ କରି ଆଗକୁ ବଢ଼ିଛନ୍ତି ସେ। ତାଙ୍କ କଥାରେ, “ମୋ ଗୋଡ଼ ସିନା କାମ କରୁନି, ହେଲେ ମୋ ହାତରେ ଦେବଶିଳ୍ପୀଙ୍କ ବରଦାନ ରହିଛି।” ତ୍ରିଲୋଚନଙ୍କ ଏହି କାହାଣୀ ନିଶ୍ଚିତ ଭାବେ ଅନ୍ୟମାନଙ୍କ ପାଇଁ ଏକ ପ୍ରେରଣା।