ବୈବାହିକ ଦୁଷ୍କର୍ମ ମାମଲା: ସୁପ୍ରିମକୋର୍ଟରେ ଶୁଣାଣି ଆରମ୍ଭ

ନନ୍ଦିଘୋଷ ବ୍ୟୁରୋ : ବୈବାହିକ ଦୁଷ୍କର୍ମ ବା ମାରିଟାଲ୍ ରେପ୍‌କୁ ନେଇ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି ଆରମ୍ଭ କରିଛନ୍ତି ସୁପ୍ରିମକୋର୍ଟ। ବିବାହ ପରେ ସ୍ୱାମୀଙ୍କ ଦ୍ୱାରା ସ୍ତ୍ରୀଙ୍କ ଉପରେ ଯୌନ ହିଂସା ହେଲେ, ବର୍ତ୍ତମାନର ଆଇନ ଅନୁସାରେ ତାଙ୍କ ବିରୋଧରେ ଦୁଷ୍କର୍ମ ମାମଲା ଚାଲିପାରିବ କି ନାହିଁ, ତାହା ଉପରେ କୋର୍ଟ ବିଚାର କରୁଛନ୍ତି। ପ୍ରଧାନ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଏବଂ ଜଷ୍ଟିସ୍ ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ପ୍ରଥମେ କର୍ଣ୍ଣାଟକ ହାଇକୋର୍ଟର ଏକ ରାୟ ସମ୍ପର୍କିତ ଆବେଦନର ଶୁଣାଣି କରୁଛନ୍ତି। ଏହି ମାମଲାରେ ଜଣେ ସ୍ୱାମୀ ନିଜ ସ୍ତ୍ରୀଙ୍କୁ ପ୍ରାୟ ‘ସେକ୍ସ ସ୍ଲେଭ୍’ ଭଳି ବ୍ୟବହାର କରିଥିବା ଅଭିଯୋଗ ରହିଛି। କର୍ଣ୍ଣାଟକ ହାଇକୋର୍ଟ ଏହି ମାମଲାରେ ଦୁଷ୍କର୍ମ ଆଇନ ଅନୁସାରେ ଅଭିଯୋଗ ଚାଲୁ ରଖିବାକୁ ଅନୁମତି ଦେଇଥିଲେ।

ଏହା ସହିତ ବୈବାହିକ ଦୁଷ୍କର୍ମ ସମ୍ପର୍କିତ ଆଇନର ସାମ୍ବିଧାନିକ ବୈଧତା ମଧ୍ୟ ସୁପ୍ରିମକୋର୍ଟ ଯାଞ୍ଚ କରିବେ। ଉଭୟ ପକ୍ଷର ଯୁକ୍ତି ଶୁଣିବା ପରେ ହିଁ ଏହା ଉପରେ ନିଷ୍ପତ୍ତି ନିଆଯିବ ବୋଲି କୋର୍ଟ କହିଛନ୍ତି। ଶୁଣାଣି ସମୟରେ ଜଷ୍ଟିସ୍ ଜୟମାଲ୍ୟ ବାଗଚୀ କହିଛନ୍ତି, ବିବାହ ହେବା ମାତ୍ରେ ଜଣେ ବ୍ୟକ୍ତିଙ୍କ ବ୍ୟକ୍ତିଗତ ସ୍ୱାଧୀନତା ବା ସ୍ୱାୟତ୍ତତା ଶେଷ ହୋଇଯାଏ ନାହିଁ। ବିବାହିତ ମହିଳାଙ୍କ ସୁରକ୍ଷା ଓ ଅଧିକାରକୁ ନେଇ କୋର୍ଟ ସଚେତନ ଥିବା ସେ କହିଛନ୍ତି। ତେବେ ଏହା ଏକ ଦଣ୍ଡବିଧାନ ସମ୍ପର୍କିତ ଆଇନ ହୋଇଥିବାରୁ, ଏଥିରେ ଥିବା ବୈବାହିକ ଦୁଷ୍କର୍ମ ବ୍ୟତିକ୍ରମ ଅସାମ୍ବିଧାନିକ କିମ୍ବା ସ୍ପଷ୍ଟ ଭାବେ ଅନ୍ୟାୟପୂର୍ଣ୍ଣ କି ନାହିଁ, ପ୍ରଥମେ ତାହା ଯାଞ୍ଚ କରିବାକୁ ପଡ଼ିବ ବୋଲି ଜଷ୍ଟିସ୍ ବାଗଚୀ କହିଛନ୍ତି।

କୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ବୈବାହିକ ଦୁଷ୍କର୍ମ ବ୍ୟତିକ୍ରମର ଅର୍ଥ ଏନୁହେଁ ଯେ ସ୍ୱାମୀ ଯୌନ ହିଂସା କଲେ ସମସ୍ତ ପ୍ରକାର ଅପରାଧିକ ଦାୟିତ୍ୱରୁ ମୁକ୍ତ ହୋଇଯିବେ। ଯୌନ ହିଂସା ଯୋଗୁଁ ଗୁରୁତର ଆଘାତ କିମ୍ବା ମୃତ୍ୟୁ ଘଟିଲେ, ଅନ୍ୟ ଅପରାଧିକ ଆଇନ ଅନୁସାରେ ମାମଲା ହୋଇପାରେ। ଆସନ୍ତା ତିନି ସପ୍ତାହ ପରେ ଏହି ମାମଲାର ଚୂଡ଼ାନ୍ତ ଶୁଣାଣି ହେବ।