ମୌସୁମୀ ଅଧିବେଶନ ଆରମ୍ଭରୁ ହଟ୍ଟଗୋଳ, ପାଠ୍ୟ ପୁସ୍ତକ ତ୍ରୁଟି ଓ ଏମଏମଡିଆର ପ୍ରସଙ୍ଗରେ କମ୍ପିଲା ଗୃହ

ଭୁବନେଶ୍ବର : ପାଠ୍ୟ ପୁସ୍ତକ ତ୍ରୁଟି ଓ ଏମଏମଡିଆର ସଂଶୋଧନ ଆଇନ ପ୍ରତ୍ୟାହାର ପ୍ରସଙ୍ଗରେ ହୁଲସ୍ତୁଲ ମୌସୁମୀ ଅଧିବେଶନର ପ୍ରଥମ ଦିନ । ପ୍ରଶ୍ନକାଳ ଆରମ୍ଭ ହେବା କ୍ଷଣି ପାଠ୍ୟପୁସ୍ତକ ତ୍ରୁଟିକୁ ନେଇ ସରକାରଙ୍କୁ ଘେରିଛି ବିଜେଡି । ଗୃହ ମଧ୍ୟଭାଗରେ ନାରାବାଜି କରିବା ସହ ଗଣଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବି କରିଛନ୍ତି ବିଜେଡି ବିଧାୟକ। ଛାତ୍ରଛାତ୍ରୀଙ୍କୁ ଭୁଲ ପାଠ୍ୟପୁସ୍ତକ ପଢ଼ିବାକୁ ସରକାର ବାଧ୍ୟ କରୁଥିବାରୁ ଗୃହରେ ପ୍ଲାକାର୍ଡ ଧରି ଶାସକ ଦଳକୁ ଟାର୍ଗେଟ କରିଛି ବିଜୁ ଜନତା ଦଳ। ସେହିପରି ଏଯାଏ ପିଲାଙ୍କୁ ବହି ଦିଆଯାଇ ନଥିବାରୁ ତୁରନ୍ତ ବହି ଦେବାକୁ ଦାବି କରିଛି ଦଳ। ପ୍ରବଳ ହଟ୍ଟଗୋଳ ଯୋଗୁ ବାଧାପ୍ରାପ୍ତ ହୋଇଛି ମୌସୁମୀ ଅଧିବେଶନର ପ୍ରଥମ ଦିନ।

ଗୃହକାର୍ଯ୍ୟ ଆରମ୍ଭ ହେବା ମାତ୍ରେ ଏମଏମଡିଆର ସଂଶୋଧନ ଆଇନ ପ୍ରତ୍ୟାହାର ଦାବିରେ ନାରାବାଜି ଦେଇଥିଲେ କଂଗ୍ରେସ ବିଧାୟକ। ଏହି ଆଇନ ଦ୍ବାରା ଓଡ଼ିଶାର ଅଧିକାରକୁ ଛଡାଇ ନେଇଛି କେନ୍ଦ୍ର। ଖଣି ବକେୟା ବାବଦରେ ରାଜ୍ୟ ଦେଢ଼ ଲକ୍ଷ କୋଟି ହରାଇବା ସହ ବର୍ଷକୁ ୧୨ ହଜାର କୋଟିରୁ ଅଧିକ ରାଜସ୍ବ କ୍ଷତି ସହିବ। ଓଡ଼ିଶା ବିରୋଧରେ କେନ୍ଦ୍ର ଷଡ଼ଯନ୍ତ୍ର କରିଥିବା ବେଳେ, ମୁଖ୍ୟମନ୍ତ୍ରୀ କାହିଁକି ଚୁପ ବୋଲି ପ୍ରଶ୍ନ କରିଛନ୍ତି ବିରୋଧୀ। ଯାହାର ଜବାବ ରଖିଛି ଶାସକ ବିଜେପି। ମୌସୁମୀ ଅଧିବେଶନର ପ୍ରଥମ ଦିନରେ ରାଜ୍ୟସ୍ବାର୍ଥ ସମ୍ପର୍କିତ ପ୍ରସଙ୍ଗ ଉଠାଇ ସରକାରଙ୍କୁ ଘେରିଛନ୍ତି ବିରୋଧୀ। ଯାହାକୁ ନେଇ ଚିନ୍ତାରେ ପଡ଼ିଛି ଶାସକ ଦଳ।