Government Steps In To Control Rising Food Prices: ଡାଲି ଦରରେ ଆସିବ ବଡ଼ ପରିବର୍ତ୍ତନ, ଖାଉଟିଙ୍କୁ ମିଳିବ ବଡ଼ ଆଶ୍ୱସ୍ତି!

ଡାଲି ଦର କମାଇବାକୁ ସରକାର ନେବେ ବଡ଼ ପଦକ୍ଷେପ। ଡାଲିର ଯୋଗାଣ ବଢ଼ାଇବା ଏବଂ ଖାଦ୍ୟ ଦର ନିୟନ୍ତ୍ରଣ ପାଇଁ କିଛି ଡାଲି ଉପରେ ଆମଦାନୀ ଶୁଳ୍କ କମାଇବାକୁ ବିଚାର କରାଯାଉଛି। 
ମସୁର ଡାଲି ଏବଂ ମଟର ଉପରେ ଶୁଳ୍କ କମିପାରେ। ତେବେ ବୁଟ ଉପରେ ଥିବା ଆମଦାନୀ ଶୁଳ୍କରେ ପରିବର୍ତ୍ତନ ନକରିବାକୁ ସରକାର ବିଚାର କରୁଥିବା କୁହାଯାଉଛି।

ବର୍ତ୍ତମାନ ମସୁର ଡାଲି ଏବଂ ବୁଟ ଉପରେ ୧୦ ପ୍ରତିଶତ ଆମଦାନୀ ଶୁଳ୍କ ରହିଛି। ହଳଦିଆ ମଟର ଉପରେ ୩୦ ପ୍ରତିଶତ ଶୁଳ୍କ ରହିଛି। ଅନ୍ୟପଟେ, ହରଡ଼ ଏବଂ ବିରିର ଆମଦାନୀକୁ ମାର୍ଚ୍ଚ ୨୦୨୭ ପର୍ଯ୍ୟନ୍ତ ଶୁଳ୍କମୁକ୍ତ କରାଯାଇଛି।

ଭାରତ ବିଶ୍ୱର ସବୁଠାରୁ ବଡ଼ ଡାଲି ଉତ୍ପାଦକ, ଉପଭୋକ୍ତା ଏବଂ ଆମଦାନୀକାରୀ ଦେଶ। ତଥାପି ଦେଶର ଉତ୍ପାଦନ ଚାହିଦା ପୂରଣ କରିପାରୁନାହିଁ। ୨୦୨୪-୨୫ରେ ଦେଶ ପ୍ରାୟ ୭୩ ଲକ୍ଷ ଟନ୍ ଡାଲି ଆମଦାନୀ କରିଥିଲା।

ଚଳିତ ବର୍ଷ ମୌସୁମୀ ବର୍ଷାର ଅନିୟମିତତା ଯୋଗୁଁ ଡାଲି ଉତ୍ପାଦନ ନେଇ ଚିନ୍ତା ବଢ଼ିଛି। କିଛି ପ୍ରମୁଖ ଉତ୍ପାଦନକାରୀ ରାଜ୍ୟରେ ଜୁନ୍‌ରୁ ସେପ୍ଟେମ୍ବର ମଧ୍ୟରେ ସ୍ୱାଭାବିକଠାରୁ ୩୦ ପ୍ରତିଶତ କମ୍ ବର୍ଷା ହୋଇଛି।

ଏହାରି ଭିତରେ ପର୍ବପର୍ବାଣୀ ସମୟରେ ଡାଲିର ଚାହିଦା ବଢ଼ିବାର ଆଶଙ୍କା ରହିଛି। ଖାଦ୍ୟ ମୁଦ୍ରାସ୍ଫୀତି ମଧ୍ୟ ଅଗଷ୍ଟରେ ୫.୯୫ ପ୍ରତିଶତରେ ପହଞ୍ଚିଛି। ହରଡ଼ ଡାଲିର ଦରବୃଦ୍ଧି ୫.୬ ପ୍ରତିଶତ ଏବଂ ବିରି ଡାଲିର ଦରବୃଦ୍ଧି ୭.୪ ପ୍ରତିଶତ ରହିଛି।