Highway Becomes Temporary Helipad: ହାଇୱେ ପାଲଟିଲା ହେଲିପ୍ୟାଡ୍, ପାକିସ୍ତାନ ସୀମା ନିକଟରେ ସେନାର ହେଲିକପ୍ଟର ଅଭ୍ୟାସ

ରାଜସ୍ଥାନର ଡାଣ୍ଟୋର ନିକଟରେ ଭାରତ-ପାକିସ୍ତାନ ସୀମା ନିକଟସ୍ଥ ଏକ ସାମରିକ ଅଭ୍ୟାସ ସମୟରେ ଭାରତୀୟ ସେନା ନ୍ୟାସନାଲ୍ ହାଇୱେ-୯୧୧ର ଏକ ଅଂଶକୁ ସାମୟିକ ହେଲିପ୍ୟାଡ୍ ଭାବେ ବ୍ୟବହାର କରିଛି। ଏହି ଅଭ୍ୟାସରେ ସେନାର ସାମରିକ ହେଲିକପ୍ଟରଗୁଡ଼ିକ ହାଇୱେର ନିର୍ଦ୍ଧାରିତ ଅଂଶରେ ଅବତରଣ କରିବା ସହ ପୁଣି ଉଡ଼ାଣ ଭରିଥିଲେ।

୨୦୧୬ ମସିହା ସେପ୍ଟେମ୍ବର ୨୮-୨୯ ରାତିରେ ନିୟନ୍ତ୍ରଣ ରେଖା ବା ଏଲ୍‌ଓସି ପାର୍ କରି ଭାରତୀୟ ସେନା କରିଥିବା ସର୍ଜିକାଲ୍ ଷ୍ଟ୍ରାଇକ୍‌ର ୧୦ମ ବାର୍ଷିକୀ ଅବସରରେ ଏହି ଅଭ୍ୟାସ କରାଯାଇଥିଲା। ଉରିରେ ଥିବା ସେନା ଶିବିର ଉପରେ ଆତଙ୍କବାଦୀ ଆକ୍ରମଣରେ ୧୯ ଜଣ ଭାରତୀୟ ଯବାନ ସହିଦ ହେବା ପରେ ଏହି ସର୍ଜିକାଲ୍ ଷ୍ଟ୍ରାଇକ୍ କରାଯାଇଥିଲା।

ରୁଦ୍ର, ଧ୍ରୁବ ଓ ଚେତକ ହେଲିକପ୍ଟର ହାଇୱେର ନିର୍ଦ୍ଧାରିତ ଅଂଶରେ ଅବତରଣ କରିବା ସହ ସେଠାରୁ ଉଡ଼ାଣ ଭରିଥିଲେ। ପାଇଲଟ୍‌ମାନେ ଏୟାରଫିଲ୍ଡ ବଦଳରେ ରାସ୍ତାରୁ ହେଲିକପ୍ଟର ଅବତରଣ ଓ ଉଡ଼ାଣ କରିବାର ଅଭ୍ୟାସ କରିଥିଲେ। ଏହି ସମୟରେ ଗ୍ରାଉଣ୍ଡ ଟିମ୍ ଲ୍ୟାଣ୍ଡିଂ ସାଇଟ୍‌ରେ ହେଲିକପ୍ଟରଗୁଡ଼ିକର ଗତିବିଧି ସମନ୍ୱୟ କରିଥିଲେ।

ଧ୍ରୁବ ହେଉଛି ଦୁଇଟି ଇଞ୍ଜିନ୍‌ ବିଶିଷ୍ଟ ଆଡଭାନ୍ସଡ୍ ଲାଇଟ୍ ହେଲିକପ୍ଟର। ଏହାକୁ ଭାରତରେ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) ଡିଜାଇନ୍ ଓ ବିକଶିତ କରିଛି। ରୁଦ୍ର ହେଉଛି ଧ୍ରୁବର ସଶସ୍ତ୍ର ସଂସ୍କରଣ, ଯାହାକୁ ଗୁଇନ୍ଦାଗିରି, ଏସକର୍ଟ ଓ ଫାୟାର ସପୋର୍ଟ ଭଳି ବିଭିନ୍ନ ଭୂମିକାରେ ବ୍ୟବହାର କରାଯାଏ।

ଚେତକ ହେଲିକପ୍ଟର ମଧ୍ୟ HAL ଦ୍ୱାରା ନିର୍ମିତ। ଏହା ଫ୍ରାନ୍ସର ଆଲୁଏଟ୍-III ଡିଜାଇନ୍ ଉପରେ ଆଧାରିତ ଏବଂ ଲାଇସେନ୍ସ ଅଧୀନରେ ଭାରତରେ ନିର୍ମାଣ କରାଯାଇଛି।

ଏହି ଅଭ୍ୟାସର ଉଦ୍ଦେଶ୍ୟ ଥିଲା, ଯଦି କୌଣସି ଏୟାରବେସ୍, ଏୟାରଫିଲ୍ଡ କିମ୍ବା ହେଲିପ୍ୟାଡ୍ ଉପଲବ୍ଧ ନଥାଏ, ତେବେ ବିକଳ୍ପ ସ୍ଥାନରୁ ହେଲିକପ୍ଟର ଚଳାଚଳ କରିବାରେ ସେନା କେତେ ପ୍ରସ୍ତୁତ ରହିଛି ତାହା ପରୀକ୍ଷା କରିବା।
ରାଜସ୍ଥାନର ପଶ୍ଚିମ ମରୁଭୂମି ଅଞ୍ଚଳରେ ଥିବା ଡାଣ୍ଟୋରରେ ଦୂରତା ଅଧିକ ଏବଂ ବିମାନ ଚଳାଚଳ ସମ୍ବନ୍ଧୀୟ ଭିତ୍ତିଭୂମି ସୀମିତ। ତେଣୁ ସୀମା ନିକଟରେ ଏଭଳି ପ୍ରକ୍ରିୟାର ଅଭ୍ୟାସ ପାଇଁ ଏହି ସ୍ଥାନକୁ ଚୟନ କରାଯାଇଥିଲା।