Internet Access Is a Fundamental Right: ଇଣ୍ଟରନେଟ୍ ବ୍ୟବହାର ମୌଳିକ ଅଧିକାର, ପିଲାଙ୍କ ପାଇଁ ବି ଲାଗୁ: ସୁପ୍ରିମକୋର୍ଟ
ଇଣ୍ଟରନେଟର ଆକ୍ସେସ ଏବଂ ଏହାର ବ୍ୟବହାର କରିବାର ଅଧିକାର ପ୍ରତ୍ୟେକ ବ୍ୟକ୍ତିଙ୍କର ମୌଳିକ ଅଧିକାର। ଏହି ଅଧିକାର ପିଲାମାନଙ୍କ ପାଇଁ ମଧ୍ୟ ଲାଗୁ ହେବ। ସମ୍ବିଧାନର ଅନୁଚ୍ଛେଦ ୨୧ ଏବଂ ଅନୁଚ୍ଛେଦ ୧୯(୧)(କ) ଅନୁଯାୟୀ ସୁପ୍ରିମକୋର୍ଟ ଏହି ମତ ଦେଇଛନ୍ତି। ଅନଲାଇନ୍ରେ ପିଲାଙ୍କ ସୁରକ୍ଷା ଏବଂ ସେମାନଙ୍କ ସ୍ୱାଧୀନତା ପରସ୍ପର ବିରୋଧୀ ନୁହେଁ ବୋଲି କୋର୍ଟ ସ୍ପଷ୍ଟ କରିଛନ୍ତି।
ଜଷ୍ଟିସ୍ ଜେ.ବି. ପାର୍ଦିୱାଲା ଏବଂ ଜଷ୍ଟିସ୍ କେ. ବିନୋଦ ଚନ୍ଦ୍ରନଙ୍କୁ ନେଇ ଗଠିତ ଖଣ୍ଡପୀଠ ସୋସିଆଲ୍ ମିଡିଆ ଓ ଅନ୍ୟ ଅନଲାଇନ୍ ପ୍ଲାଟଫର୍ମରୁ ଶିଶୁଙ୍କ ଯୌନ ଶୋଷଣ ଏବଂ ନିର୍ଯାତନା ସମ୍ପର୍କିତ ବିଷୟବସ୍ତୁ ଚିହ୍ନଟ କରି ହଟାଇବା ପାଇଁ ବ୍ୟବସ୍ଥାକୁ ମଜବୁତ କରିବା ଲାଗି ନିର୍ଦ୍ଦେଶ ଦେବା ସମୟରେ ଏହି ମତ ରଖିଛନ୍ତି।
ପିଲାଙ୍କୁ ଇଣ୍ଟରନେଟ୍ରୁ ସମ୍ପୂର୍ଣ୍ଣ ଦୂରେଇ ରଖିବା ସମାଧାନ ନୁହେଁ
ଅନଲାଇନ୍ ପ୍ଲାଟଫର୍ମରେ ପିଲାଙ୍କ ପାଇଁ ଅନେକ ସୁରକ୍ଷା ବିପଦ ରହିଥିବା କୋର୍ଟ ସ୍ୱୀକାର କରିଛନ୍ତି। କିନ୍ତୁ କ୍ଷତିକାରକ ବିଷୟବସ୍ତୁ ଚିହ୍ନଟ କରି ହଟାଇବାରେ ପ୍ଲାଟଫର୍ମଗୁଡ଼ିକ ବିଫଳ ହେଉଥିବାରୁ ପିଲାଙ୍କ ଇଣ୍ଟରନେଟ୍ ବ୍ୟବହାର ଉପରେ ସମ୍ପୂର୍ଣ୍ଣ କଟକଣା ଲଗାଇବା ଠିକ୍ ନୁହେଁ ବୋଲି ଖଣ୍ଡପୀଠ କହିଛନ୍ତି।
କୋର୍ଟଙ୍କ ମତରେ, ଅନୁଚ୍ଛେଦ ୧୯(୧)(କ) ଅନୁଯାୟୀ ମତପ୍ରକାଶର ସ୍ୱାଧୀନତା ମଧ୍ୟରେ ସୂଚନା ଜାଣିବା, ଗ୍ରହଣ କରିବା ଏବଂ ଅନ୍ୟଙ୍କୁ ପହଞ୍ଚାଇବାର ଅଧିକାର ରହିଛି। ଇଣ୍ଟରନେଟ୍ କେବଳ ମନୋରଞ୍ଜନର ମାଧ୍ୟମ ନୁହେଁ; ଏହା ଶିକ୍ଷା, ଯୋଗାଯୋଗ ଓ ସୂଚନା ପାଇବାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ।
ବିଶେଷକରି ଦୂରଦୂରାନ୍ତ ଅଞ୍ଚଳର ଅନେକ ପିଲାଙ୍କ ପାଇଁ ଇଣ୍ଟରନେଟ୍ ଶିକ୍ଷା ଓ ସୂଚନାର ଏକମାତ୍ର ଉତ୍ସ ହୋଇପାରେ। ଏହା ସହ ସ୍ୱତନ୍ତ୍ର ଆବଶ୍ୟକତା ଥିବା ପିଲାମାନଙ୍କୁ ସମାନ ପରିସ୍ଥିତିରେ ଥିବା ଅନ୍ୟମାନଙ୍କ ସହ ଯୋଡ଼ିବାରେ ମଧ୍ୟ ଅନଲାଇନ୍ ପ୍ଲାଟଫର୍ମ ସହାୟକ ହୋଇଥାଏ।
ପିଲାଙ୍କ ସୁରକ୍ଷା ଓ ସ୍ୱାଧୀନତା ମଧ୍ୟରେ ବିରୋଧାଭାସ ନାହିଁ। ସେମାନେ ଉଭୟର ଅଧିକାରୀ ବୋଲି ଖଣ୍ଡପୀଠ କହିଛନ୍ତି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ ODISHA TV - ଓଡିଶା ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ODISHA TV - ଓଡିଶା ଟିଭି ଦେଖନ୍ତୁ।
