ଆମକୁ ଶତ୍ରୁ ନୁହେଁ, ପଡ଼ୋଶୀ ଭାବନ୍ତୁ: ମୋଦି-ଜିନପିଙ୍ଗ୍ ଭେଟ ପୂର୍ବରୁ ବଦଳିଲା ଚାଇନାର ସ୍ବର, ଭାରତ ସହ…
ନୂଆଦିଲ୍ଲୀ/ବେଜିଂ,୧୧।୯: ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ୧୮ଶ ବ୍ରିକ୍ସ (BRICS) ଶିଖର ସମ୍ମିଳନୀ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ହେବାକୁ ଥିବା ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷିକ ଆଲୋଚନା ପୂର୍ବରୁ ଚାଇନା ପକ୍ଷରୁ ସକାରାତ୍ମକ ଆଭିମୁଖ୍ୟ ପ୍ରକାଶ ପାଇଛି। ଶୁକ୍ରବାର ଚାଇନା ବୈଦେଶିକ ମନ୍ତ୍ରଣାଳୟ କହିଛି ଯେ, ଭାରତ ଏବଂ ଚାଇନା ନିଜର ଆପୋଷ ମତଭେଦକୁ ସଠିକ ଏବଂ ଉପଯୁକ୍ତ ମାର୍ଗରେ ସମାଧାନ କରିବା ଉଚିତ। ଦୁଇ ପଡ଼ୋଶୀ ଦେଶ ନିଜର ଦ୍ୱିପାକ୍ଷିକ ସମ୍ପର୍କକୁ କୂଟନୈତିକ, ବ୍ୟାପକ ଏବଂ ସୁଦୂରପ୍ରସାରୀ ଦୃଷ୍ଟିକୋଣରୁ ଦେଖିବାର ଆବଶ୍ୟକତା ରହିଛି।
ଚାଇନା ଗ୍ରହଣ କରିଥିବା ଏହି ଆଭିମୁଖ୍ୟ ମଧ୍ୟରେ ରାଷ୍ଟ୍ରପତି ସି ଜିନପିଙ୍ଗ୍ ଶନିବାର ବ୍ରିକ୍ସ ସମ୍ମିଳନୀରେ ଯୋଗଦେବା ପାଇଁ ନୂଆଦିଲ୍ଲୀରେ ପହଞ୍ଚୁଛନ୍ତି। ଗତ ସାତ ବର୍ଷ ମଧ୍ୟରେ ଏହା ତାଙ୍କର ପ୍ରଥମ ଭାରତ ଗସ୍ତ। ଏହାପୂର୍ବରୁ ୨୦୧୯ରେ ଚେନ୍ନାଇର ମାମଲ୍ଲାପୁରମ୍ରେ ସେ ପ୍ରଧାନମନ୍ତ୍ରୀ ମୋଦିଙ୍କ ସହ ସୌଜନ୍ୟମୂଳକ ଆଲୋଚନା କରିଥିଲେ। ୨୦୨୦ ପୂର୍ବ ଲଦାଖ ସୀମା ବିବାଦ ପରଠାରୁ ଦୁଇ ଦେଶ ମଧ୍ୟରେ ଲାଗିରହିଥିବା ତିକ୍ତତାକୁ ସୁଧାରିବା ପାଇଁ ଏହି ପ୍ରସ୍ତାବିତ ମୋଦି-ଜିନ୍ପିଙ୍ଗ ସାକ୍ଷାତକାରକୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି।
ବେଜିଂରେ ଖବରଦାତାମାନଙ୍କ ସହ ଆଲୋଚନା ବେଳେ ଚାଇନା ବୈଦେଶିକ ମନ୍ତ୍ରଣାଳୟର ପ୍ରବକ୍ତା ମାଓ ନିଙ୍ଗ କହିଛନ୍ତି ଯେ, ଦୁଇ ପ୍ରମୁଖ ନେତାଙ୍କ ସୁଚିନ୍ତିତ ମାର୍ଗଦର୍ଶନରେ ଚାଇନା ଭାରତ ସହିତ ମିଳିମିଶି କାମ କରିବାକୁ ପ୍ରସ୍ତୁତ। ସେ ଜୋର୍ ଦେଇ କହିଛନ୍ତି ଯେ ଭାରତ ଓ ଚାଇନା ଭଲ ପଡ଼ୋଶୀ ଏବଂ ଏକାଠି ଆଗକୁ ବଢ଼ୁଥିବା ମଜବୁତ ସହଯୋଗୀ ଭାବେ କାର୍ଯ୍ୟ କରିବା ଉଚିତ।
ସେ ଆହୁରି ମଧ୍ୟ କହିଛନ୍ତି ଯେ, ବର୍ତ୍ତମାନର ବିଶ୍ୱସ୍ତରୀୟ ଅସ୍ଥିରତା (ଯେପରିକି ୟୁକ୍ରେନ ଯୁଦ୍ଧ ଏବଂ ମଧ୍ୟପ୍ରାଚ୍ୟ ଉତ୍ତେଜନା) ମଧ୍ୟରେ ବ୍ରିକ୍ସ ଗୋଷ୍ଠୀ ବିକାଶଶୀଳ ଅର୍ଥବ୍ୟବସ୍ଥାଗୁଡ଼ିକ ପାଇଁ ଏକତାର ଏକ ଗୁରୁତ୍ୱପୂର୍ଣ୍ଣ ମଞ୍ଚ। ତେଣୁ ଆଲୋଚନା ଓ ସହଯୋଗ ମାଧ୍ୟମରେ ଦୁଇ ଦେଶ ସମସ୍ତ ସମସ୍ୟାର ଶାନ୍ତିପୂର୍ଣ୍ଣ ସମାଧାନ ବାହାର କରିପାରିବେ।
ଭାରତ ଚଳିତ ବର୍ଷ ବ୍ରିକ୍ସର ଅଧ୍ୟକ୍ଷତା କରୁଥିବା ବେଳେ ସେପ୍ଟେମ୍ବର ୧୨ ଏବଂ ୧୩ ତାରିଖରେ ନୂଆଦିଲ୍ଲୀରେ ଏହି ଶିଖର ସମ୍ମିଳନୀ ଆୟୋଜିତ ହେଉଛି। ଦୀର୍ଘ ଦିନର କୂଟନୈତିକ ଶୀତଳତା ପରେ ଶନିବାର ହେବାକୁ ଥିବା ମୋଦି-ଜିନପିଙ୍ଗ୍ ଆଲୋଚନା ଭାରତ-ଚାଇନା ସମ୍ପର୍କକୁ କେଉଁ ନୂଆ ମୋଡ଼ ଦେଉଛି, ତାହା ଉପରେ ଏବେ ସାରା ବିଶ୍ୱର ନଜର ରହିଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
