ଓଡ଼ିଶାର ଭୁବନେଶ୍ୱରରେ ଜନ୍ମ: କିଏ ସେହି ପ୍ରଜ୍ଞାନ ଓଝା? ଯାହାଙ୍କୁ ଏବେ ଟିମ ଇଣ୍ଡିଆରେ ମିଳିଲା ବଡ଼ ଦାୟିତ୍ୱ

ମୁମ୍ବାଇ,୧୯।୧୦: ନିଜ ସ୍ପିନ ବୋଲିଂରେ ବଡ଼ ବଡ଼ ବ୍ୟାଟରଙ୍କୁ ଫସାଇଥିବା ପ୍ରଜ୍ଞାନ ଓଝା ଏବେ ଭାରତୀୟ କ୍ରିକେଟରେ ଏକ ବଡ଼ ଦାୟିତ୍ୱ ସମ୍ଭାଳିବାକୁ ଯାଉଛନ୍ତି। ପଡ଼ିଆରେ ନିଜ ବୋଲିଂ ପାଇଁ ପରିଚୟ ସୃଷ୍ଟି କରିଥିବା ଓଝାଙ୍କ ସାମ୍ନାରେ ଏବେ ଟିମ ଇଣ୍ଡିଆ ପାଇଁ ଉପଯୁକ୍ତ ଖେଳାଳି ବାଛିବାର ଚ୍ୟାଲେଞ୍ଜ ରହିବ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ୧୯ ଅକ୍ଟୋବର ୨୦୨୬ରେ ତାଙ୍କୁ ପୁରୁଷ ଦଳର ନୂଆ ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତ କରିଥିବା ଖବର ସାମ୍ନାକୁ ଆସିଛି। ଏଭଳି ସ୍ଥିତିରେ କ୍ରିକେଟ ପ୍ରଶଂସକଙ୍କ ମନରେ ପ୍ରଶ୍ନ ଉଠୁଛି, ପ୍ରଜ୍ଞାନ ଓଝା କିଏ ଏବଂ କିପରି ରହିଛି ତାଙ୍କ କ୍ରିକେଟ କ୍ୟାରିୟର?

ପ୍ରଜ୍ଞାନ ଓଝାଙ୍କ ଜନ୍ମ ୫ ସେପ୍ଟେମ୍ବର ୧୯୮୬ରେ ଓଡ଼ିଶାର ଭୁବନେଶ୍ୱରରେ ହୋଇଥିଲା। ସେ ଜଣେ ବାମହାତୀ ସ୍ପିନ ବୋଲର ଥିଲେ। ଘରୋଇ କ୍ରିକେଟରେ ଉତ୍କୃଷ୍ଟ ପ୍ରଦର୍ଶନ କରି ସେ ଭାରତୀୟ ଦଳରେ ସ୍ଥାନ ପାଇଥିଲେ। ନିଜର ସଠିକ ବୋଲିଂ ଏବଂ ଉଇକେଟ୍‌ ନେବାର ଦକ୍ଷତା ପାଇଁ ସେ କ୍ରିକେଟ ଜଗତରେ ଏକ ସୱତନ୍ତ୍ର ପରିଚୟ ସୃଷ୍ଟି କରିଥିଲେ।

ପ୍ରଜ୍ଞାନ ଓଝା ଭାରତ ପାଇଁ ଟେଷ୍ଟ, ଦିନିକିଆ ଏବଂ ଟି-୨୦ ଅନ୍ତର୍ଜାତୀୟ କ୍ରିକେଟ ଖେଳିଛନ୍ତି। ସେ ୨୪ଟି ଟେଷ୍ଟ ମ୍ୟାଚ୍ରେ ୧୧୩ଟି ୱିକେଟ ନେଇଥିବା ବେଳେ ୧୮ଟି ଦିନିକିଆ ମ୍ୟାଚରେ ତାଙ୍କ ନାମରେ ୨୧ଟି ଉଇକେଟ୍‌ ରହିଛି। ସେହିପରି ୬ଟି ଟି-୨୦ ଅନ୍ତର୍ଜାତୀୟ ମ୍ୟାଚରେ ସେ ୧୦ଟି ଉଇକେଟ୍‌ ହାସଲ କରିଥିଲେ।

ତାଙ୍କ କ୍ୟାରିୟରର ସବୁଠାରୁ ସ୍ମରଣୀୟ ପ୍ରଦର୍ଶନ ୨୦୧୩ ନଭେମ୍ବରରେ ୱେଷ୍ଟଇଣ୍ଡିଜ ବିପକ୍ଷରେ ଦେଖିବାକୁ ମିଳିଥିଲା। ମୁମ୍ବାଇରେ କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକରଙ୍କ ବିଦାୟୀ ଟେଷ୍ଟ ମ୍ୟାଚରେ ଓଝା ଉଭୟ ଇନିଂସକୁ ମିଶାଇ ମୋଟ ୧୦ଟି ୱିକେଟ ନେଇଥିଲେ। ଏହି ଚମତ୍କାର ପ୍ରଦର୍ଶନ ପାଇଁ ତାଙ୍କୁ ‘ପ୍ଲେୟାର ଅଫ ଦି ମ୍ୟାଚ’ ପୁରସ୍କାର ମିଳିଥିଲା।

ପ୍ରଜ୍ଞାନ ଓଝା ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ରେ ଡେକାନ ଚାର୍ଜର୍ସ ଏବଂ ମୁମ୍ବାଇ ଇଣ୍ଡିଆନ୍ସ ଭଳି ଦଳ ପାଇଁ ଖେଳିଥିଲେ। ନିଜର ସ୍ପିନ ବୋଲିଂ ଜରିଆରେ ସେ ଅନେକ ମ୍ୟାଚ୍ରେ ଭଲ ପ୍ରଦର୍ଶନ କରିଥିଲେ। ଫେବୃଆରୀ ୨୦୨୦ରେ ସେ କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଥିଲେ।

ପ୍ରଜ୍ଞାନ ଓଝା ପୂର୍ବରୁ ଚୟନ ସମିତିର ସଦସ୍ୟ ଭାବେ ମଧ୍ୟ କାର୍ଯ୍ୟ କରିସାରିଛନ୍ତି। ଟେଷ୍ଟ କ୍ରିକେଟରେ ବରିଷ୍ଠତା ଆଧାରରେ ବିସିସିଆଇ ତାଙ୍କୁ ଚୟନ ସମିତିର ଅଧ୍ୟକ୍ଷ କରିଥିବା ରିପୋର୍ଟରେ ଦାବି କରାଯାଇଛି। ଏବେ ସେ ଭାରତୀୟ ଦଳ ପାଇଁ ଖେଳାଳି ଚୟନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନେବେ।

ମୁଖ୍ୟ ଚୟନକର୍ତ୍ତା ଭାବେ ପ୍ରଜ୍ଞାନ ଓଝାଙ୍କୁ ଖେଳାଳିଙ୍କ ପ୍ରଦର୍ଶନ, ଫିଟ୍ନେସ ଏବଂ ଦଳର ଆବଶ୍ୟକତାକୁ ଧ୍ୟାନରେ ରଖି ନିଷ୍ପତ୍ତି ନେବାକୁ ପଡ଼ିବ। ୨୦୨୭ ଦିନିକିଆ ବିଶ୍ୱକପ ପ୍ରସ୍ତୁତିକୁ ଦୃଷ୍ଟିରେ ରଖି ଚୟନ ସମିତିର ଭୂମିକା ବେଶ ଗୁରୁତ୍ୱପୂର୍ଣ୍ଣ ହେବ।
ଏବେ ଦେଖିବାକୁ ବାକି ରହିଲା, ପ୍ରଜ୍ଞାନ ଓଝାଙ୍କ ନେତୃତ୍ୱରେ ଭାରତୀୟ ଦଳର ଚୟନକୁ ନେଇ କେଉଁ ସବୁ ନିଷ୍ପତ୍ତି ନିଆଯାଉଛି ଏବଂ ଆଗାମୀ ବିଶ୍ୱକପ ପାଇଁ ଦଳ କିପରି ପ୍ରସ୍ତୁତ ହେଉଛି।